جامبىل وبلىسىندا اۋىل تۇرعىندارىنىڭ مەمەلكەتتىك قىزمەتتەرگە قول جەتكىزۋىن جەڭىلدەتۋ ماقساتىندا جۇيەلى جۇمىستار جۇرۋدە. وسى ماقساتتا بيىل اۋليەاتا وڭىرىندە اۋىلدىق كىتاپحانالار بازاسىندا 119 «سيفرلىق اقپاراتتىق ورتالىق» اشىلدى دەپ جازادى Qamshy.kz اقپارات اگەنتتىگى. 

وندا ارناۋلى سايت ارقىلى اۋىل تۇرعىندارىنىڭ كۇندەلىكتى تۇرمىسىنا قاجەتتى ءبىلىم بەرۋ، اۋىل شارۋاشىلىعى، سپورت، جۇمىسقا ورنالاستىرۋ سەكىلدى 13 سالا بويىنشا اقپاراتتار جانە مەكەنجاي، زەينەتاقى اۋدارىمدارى تۋرالى انىقتاما، نەكە تۋرالى ءوتىنىش، بالاباقشاعا كەزەك، جىلجىمايتىن مۇلىك، ازاماتتىڭ سوتتىلىعىنىڭ نەمەسە سوتتىلىعىنىڭ جوقتىعى تۋرالى انىقتاما الۋ مەملەكەتتىك قىزمەتتەرىن پايدالانۋعا مۇمكىندىك جاسالدى. جىل سوڭىنا دەيىن ينتەرنەتى بار بارلىق اۋىل وكرۋگ كىتاپحانالاردا وسىنداي ورتالىقتار اشىلماق. سونداي-اق، «ەلەكتروندىق ارحيۆ» جۇيەسى ورناتىلدى.

بۇدان بولەك، ايماقتا مادەنيەت سالاسىن دامىتۋ بويىنشا ىرگەلى جوبالار قولعا الىنىپ كەلەدى. اتاپ ايتقاندا، جامبىل جابايەۆتىڭ تۋعان كۇنىنە وتكەن جىلى باستالعان رەسپۋبليكالىق اقىندار ايتىسىنىڭ دەڭگەيى كوتەرىلدى. وعان قوسا تالانتتاردى ىرىكتەۋ اۋىل وكرۋگتەرىنەن باستالىپ، اۋدانداردان 90 ۇمىتكەر ونىڭ ىشىنەن ۇزدىك دەپ تانىلعان 31 اقىن وبلىستىق كەزەڭگە قاتىستى. ناتيجەسىندە رەسپۋبليكالىق سايىسقا قاتىسقان 8 اقىننىڭ ءبىرى – جەرلەسىمىز قانات مىرزاxان باس جۇلدە – اۆتوكولىك يەلەندى.

سول سياقتى، «اۋليەاتا بوياۋلارى» اتتى ءى حالىق شىعارماشىلىعى فەستيۆالى ۇيىمداستىرىلدى. وعان اۋدانداردان 300 ۇمىتكەر قاتىسىپ، 134 ۇمىتكەر وبلىستىق كەزەڭگە جولداما الدى. ۇزدىك دەپ تانىلعان 60 سۋرەت، 100 فوتوسۋرەت جانە 15 قولونەر بۇيىمدارى «شاحريستان» ەتنو-مادەني كەشەنىندە جاڭادان اشىلاتىن گاللەرەيا، كورمە زالىن تولىقتىرادى.

كوپتومدىق كىتاپتار شىعارۋ باعىتىندا جۇمىستار جۇرگىزىلىپ، «تاريحي تانىمدىلىق» باعىتى بويىنشا – 15 توم، شىعارماشىلىق باعىتى بويىنشا 35 توم ماتەريالدار جيناقتالدى.

«تالاس تولقىندارى» اتتى ءى وبلىستىق مۋزىكالىق ونەر فەستيۆالى دە قولعا الىندى. ونىڭ اياسىندا قوبىزشىلار كونكۋرسى، ءان كونكۋرسى، ەسترادا ورىنداۋشىلاردىڭ كونكۋرسى، بي كونكۋرسى ۇيىمداستىرىلدى.

ال، تۋريزم سالاسىنا ينۆەستيسيا تارتۋ بويىنشا 12 ارنايى تۋريستىك باعىتتار ايقىندالعان ءىس-شارالار جوسپارى ازىرلەندى. ونىڭ 2-ەۋى الماتى، جامبىل جانە تۇركىستان وبلىستارى اۋماعى ارقىلى وتەتىن «جاڭا جىبەك جولى» ەكسپەديسيالىق باعىتتارى.

«قارالما» تاۋ-شاڭعى بازاسى جوباسى جۇزەگە اسىرىلۋدا.

«تورتكۇل» كەرۋەن سارايىندا «كونە تاراز شەبەرلەرى» جوباسى قولعا الىندى.

تاراز قالاسى جانە قالا اۋماعىندا ورنالاسقان تاريحي-مادەني ەسكەرتكىشتەر مارشرۋتىمەن تەگىن «تۋريستىك 2 اۆتوبۋس» ىسكە قوسىلدى. ولار 5 اي بويى سەنبى، جەكسەنبى، مەملەكەتتىك مەيرام كۇندەرى تەگىن 2 اۆتوبۋس جۇمىس ىسەيدى.