"الپينيستەر بويىنشا: كەشە 14 تامىزدا الپينيستەر جەڭىس شىڭىنا دەيىن شىققانىمەن، 15 تامىزدا قار بورانىنا تاپ بولعانى حابارلانعان بولاتىن. الپينيستەردىڭ ءبىرى قايتىس بولىپ، ەكەۋى كومەك سۇراعان. اتالعان تاۋ شىڭى قىرعىزستان اۋماعىندا ورنالاسقاندىقتان، ەكى كۇن بۇرىن قۇتقارۋ وپەراسياسى قولعا الىنىپ، قىرعىز شەكاراشىلارىنان اۋە كەڭىستىگىن پايدالانۋ رۇقساتى الىنعان. الايدا ءبىزدىڭ قۇتقارۋشى تىكۇشاق قاتتى بوراننىڭ سالدارىنان بيىككە كوتەرىلە المادى. بۇگىن جەرگىلىكتى ۋاقىت بويىنشا ساعات 10.00-دە قۇتقارۋ وپەراسياسى قايتا جانداندى. بورتتا تاجىريبەلى قۇتقارۋشىلار بارشىلىق. تىكۇشاق تاۋلى ايماققا بارىنشا بەيىمدەلگەن"، – دەدى ەرلان تۇرعىمبايەۆ ۇكىمەت وتىرىسىنان كەيىن تىلشىلەردىڭ سۇراعىنا جاۋاپ بەرە وتىرىپ.
دەسە دە، ءمينيستردىڭ ايتۋىنشا، تەڭىز دەڭگەيىنەن 6 مىڭ مەتر بيىكتىككە اۋە كەمەلەرىنىڭ كوبى كوتەرىلە المايدى.
"اۋە كەمەلەرى بارىنشا بيىككە كوتەرىلىپ، قۇتقارۋشىلار ىزدەستىرۋ جۇمىسىن جالعاستىرادى. ەڭ قيىنى، الپينيستەردىڭ ناقتى قاي جەردە ەكەنىن بىلە الماي وتىرمىز. سوندىقتان، بارىنشا اۋقىمدى ىزدەستىرۋ جۇمىستارىن قولعا الامىز. ءقازىر ءبىز GPS ارقىلى جوق دەگەندە بولجامدى ورىنداردى انىقتاۋ ءۇشىن ارنايى قىزمەتتەردى ىسكە تارتىپ جاتىرمىز"، – دەدى ول.
ەسكە سالساق، الماتىلىق الپينيستەر توبى قىرعىز تاۋلارىندا جوعالعان. الماتى قالاسىنىڭ اكىمى باقىتجان ساعىنتايەۆ تاۋدا قازاقستاندىق الپينيستەر توبىنىڭ جوعالىپ كەتۋىنە قاتىستى Instagram پاراقشاسىندا الاڭداۋشىلىق ءبىلدىردى. كەيىنىرەك جوعالعان الپينيستەردىڭ ءبىرىنىڭ قىزى الەۋمەتتىك جەلى ارقىلى قالىڭ كوپشىلىكتەن كومەك سۇرادى. سونداي-اق، ق ر قورعانىس مينيسترلىگى الپينيستەردى قۇتقارۋ وپەراسياسىن باستادى.
ءالي بەكەن ۇلى
قازاقپارات
پىكىر قالدىرۋ