جامبىل وبلىسىندا «رۋحاني جاڭعىرۋ» باعدارلاماسى قابىلدانعان 2 جىل ىشىندە جالپى سوماسى 2 ميلليارد تەڭگە بولاتىن 129 جوبا مەن 13 ءىس-شارا ۇيىمداستىرىلدى. ال جىل باسىنان بەرى «تۋعان جەر» باعدارلاماسىنىڭ «اتامەكەن» كىشى باعدارلاماسىمەن سوماسى 828 ميلليون تەڭگەنى قۇرايتىن 59 جوبا جۇزەگە اسىرىلدى دەپ جازادى Qamshy.kz اقپارات اگەنتتىگى. 

ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىندا «تۋعان جەر» باعدارلاماسىن قولعا الۋدى ۇسىنعان ەدى. ءبىلىم بەرۋ سالاسىندا اۋقىمدى ولكەتانۋ جۇمىستارىن جۇرگىزۋ، ەكولوگيانى جاقسارتۋ مەن ەلدى مەكەندەردى اباتتاندىرۋ، سونداي-اق ەسكەرتكىشتەر مەن مادەني نىسانداردى قالپىنا كەلتىرۋدى جانە تۋعان جەرىن ۇمىتپاي، وعان قامقورلىق جاساعىسى كەلگەن كاسىپكەرلەردى، شەنەۋنىكتەردى، زيالى قاۋىم وكىلدەرىنە جول اشۋ سىندى ماڭىزدى مىندەتتەردى كوزدەگەن باعدارلاما ماقساتىن جامبىلدىقتار دا جاقسى ءتۇسىندى.

اتالمىش ماقالا جارىق كورگەننەن بەرگى ارالىقتا وبلىس اۋماعىندا ودان تۋىنداعان مىندەتتەردى جۇزەگە اسىرۋ ماقساتىندا ءبىرقاتار جۇمىستار قولعا الىندى. ماسەلەن «تۋعان جەر» باعدارلاماسى اياسىندا 2 ميلليارد تەڭگە كولەمىندە 129 جوبا، 13 ءىس-شارا ۇيىمداستىرىلدى. دەمەۋشىلەردىڭ قامقورلىعىمەن 4 تۇرعىن ءۇي، 8 پاتەر، 11 سپورت نىسانى، 2 اللەيا، 1 مۋزەي، 1 مەديسينالىق پۋنكت حالىق يگىلىگىنە بەرىلدى. سول سەكىلدى ينفراقۇرىلىمدى دامىتۋ، الەۋمەتتىك كومەك سىندى جوبالار دا جۇزەگە اسىرىلدى. جىل باسىنان بەرى «رۋحاني جاڭعىرۋ» باعدارلاماسىنىڭ «اتامەكەن» كىشى باعدارلاماسى ارقىلى وڭىردە جالپى سوماسى 828 ميلليون تەڭگە بولاتىن 59 جوبا ىسكە استى.مۇندا قولى اشىق، اتىمتاي جومارتتار ەسەبىنەن 24 تۇرعىن ءۇي، 2 ساياباق، 3 بالاباقشا، 4 سپورتتىق نىسان، 2 مەشىت پايدالانۋعا بەرىلدى. ءبىرقاتار اۋداندارىندا از قامتىلعان جانە كوپبالالى وتباسىلار كوپتەن كۇتكەن باسپانا باقىتىن سەزىنۋگە مۇمكىندىك الدى. ال تالاس اۋدانىندا ۇزاق جىلدار بويى جەرگىلىكتى تۇرعىنداردىڭ باس اۋرۋىنا اينالعان كوشەلەردى اباتتاندىرۋ، جارىقتاندىرۋ جۇمىستارى جۇرگىزىلدى.

جىل سوڭىنا دەيىن وبلىس اۋماعىندا جالپى سوماسى 1،4 ميلليارد تەڭگە بولاتىن 29 جوبانى جۇزەگە اسىرۋ جوسپارلانىپ وتىر. شىندىعىندا بۇل جۇمىستاردى جيناقىلىقپەن جانە جۇيەلىلىكپەن ىسكە اسىرۋدا جامبىلدىقتار ەلباسى كوزدەگەن تالاپتىڭ ۇدەسىنەن شىعا الاتىندىعىنا كۇمان جوق.