جامبىلدىق جاستار گۋمانيتارلىق ءبىلىم باعىتتارى بويىنشا قازاق تىلىندە تولىققاندى ءبىلىم الۋ ءۇشىن جاعداي جاساي وتىرىپ، الەمنىڭ وزىق وقۋلىقتارىن ءتۇپ نۇسقادان قازاق تىلىنە اۋدارۋدى ماقسات ەتكەن «100 جاڭا وقۋلىق» جوباسىن كادەسىنە وڭتايلى جاراتۋدا. كۇنى بۇگىنگە دەيىن جوبا اياسىندا وبلىسقا قازاق تىلىنە اۋدارىلعان 19 كىتاپتىڭ 7000 داناسى كەلدى دەپ جازادى Qamshy.kz اقپارات اگەنتتىگى. 

بارشاعا ءمالىم ەلباسى نۇرسۇلتان نازاربايەۆ «بولاشاققا باعدار: رۋحاني جاڭعىرۋ» باعدارلامالىق ماقالاسىندا «قوعامدىق جانە گۋمانيتارلىق عىلىمدار بويىنشا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىن قولعا الۋ جايىن كوتەرگەن بولاتىن. سايكەسىنشە «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىن ۇلتتىق اۋدارما بيۋروسى قولعا الىپ، الەمنىڭ تانىمال گۋمانيتار-عالىمداردىڭ ءبىرقاتار ەڭبەكتەرىن مەملەكەتتىك تىلگە اۋداردى. قازاق تىلىنە اۋدارىلعان الەم ويشىلدارىنىڭ وقۋلىقتارىنىڭ ءارقايسى 10 مىڭ دانامەن باسىلىپ شىعىپ، ەلىمىزدەگى 115 جوعارى وقۋ ورنىمەن جەرگىلىكتى كىتاپحانالارعا تاراتىلدى. بۇل قاتاردا جامبىل وبلىسىنداعى وقۋ ورىندارى مەن كىتاپحانالارى دا بار.

–قازاق تىلىندەگى اقىل-ويدىڭ الەمدىك كەمەڭگەرلەرىنىڭ قالامىنان تۋعان دۇنيەلەر وبلىستىق، قالالىق، اۋداندىق جانە جوعارى وقۋ ورىندارىنىڭ كىتاپحانالارىنا تولىعىمەن تاراتىلدى. بۇگىندە بۇل كىتاپتاردىڭ ەلەكتروندى نۇسقالارى ازىرلەندى. جوبالىق وفيس كىتاپتاردىڭ QR-كودتارى بار ارنايى تاقتايشالار دايىنداپ، وبلىس، اۋدان ورتالىقتارىنداعى ادام كوپ جۇرەتىن ورىندارعا ورنالاستىرۋ جۇمىستارىن قولعا الدى. سونىمەن بىرگە وڭىردەگى جەتەكشى عىلىمي ورتالىق سانالاتىن م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ قولداۋىمەن اپتا سايىن ءار كىتاپتىڭ تانىستىرىلىمىن وتكىزەمىز،– دەيدى جامبىل وبلىستىق «رۋحاني جاڭعىرۋ» جوبالىق ءوفيسىنىڭ جەتەكشىسى سەرىكبول بەرىكقوجا.

ال ەكونوميست عالىم سۇلتان ابىلدايەۆ «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ ەكونوميكا سالاسىندا مامان دايارلاۋ ىسىنە تىڭ سەرپىن بەرەتىنىن ايتادى.

–ەكونوميست رەتىندە ماعان ماكروەكونوميست گرەگوري مەنكيۋدىڭ «ەكونوميكس» كىتابى قاتتى ۇنادى. مەن بۇعان دەيىن بۇل وقۋلىقتىڭ ورىس تىلىندەگى نۇسقاسىن بىرنەشە رەت وقىعانمىن. «ەكونوميكس» كىتابى الدەقاشان امەريكاندىق ساياساتكەرلەردى ۇستەل كىتابىن» اينالىپ ۇلگەردى. بۇل تۋىندىسىن دا اۆتور ەكونوميكانىڭ نەگىزگى سالالارىمەن بىرگە سالىق جۇيەسى مەن حالىقارالىق ساۋدانىڭ ماسەلەلەرىن دە نازاردان شەت قالدىرمايدى. سول ارقىلى وقۋلىق وقىرماندارعا ەكونوميكالىق شەشىم قابىلداۋدان شىعاتىن ناتيجەنى الدىن الا باعامداۋعا مۇمكىندىك بەرەدى، – دەيدى س.ابىلدايەۆ

ايتا كەتۋ كەرەك جىل سوڭىنا دەيىن «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا اۋدارىلعان كىتاپتاردىڭ جالپى سانىن 30-عا جەتكىزۋ جوسپارلانۋدا.