تاراز قالاسىنداعى ش.ءۋاليحانوۆ اتىنداعى وبلىستىق امبەباپ عىلىمي كىتاپحاناسىنىڭ برودكاستينگ زالىندا قالا اكىمى ق.دوسايەۆتىڭ ارداگەرلەرمەن كەزدەسۋى ۇيىمداستىرىلدى. كەزدەسۋگە وبلىستىق، قالالىق ارداگەرلەر كەڭەسىنىڭ جانە وبلىستىق، قالالىق قوعامدىق كەڭەستىڭ مۇشەلەرى قاتىستى دەپ جازادى Qamshy.kz اقپارات اگەنتتىگى. 

جيىن بارىسىندا سويلەگەن سوزىندە تاراز قالاسىنىڭ اكىمى قايرات دوسايەۆ زيالى قاۋىم وكىلدەرى مەن ارداگەرلەردىڭ حالىقتى ىنتىماق پەن بىرلىككە ۇندەپ، دۇرىس جول سىلتەپ، ءوڭىردىڭ دامۋىنا قوسار ۇلەسى زور ەكەنىنە توقتالدى.

– قالانىڭ تىنىس-تىرشىلىگى، الەۋمەتتىك-ەكونوميكالىق دامۋى سىزدەردى ۇنەمى تولعاندىرىپ، تۇيىتكىلدى ماسەلەلەر وزدەرىڭىزدىڭ قاتىسۋلارىڭىزبەن شەشىمىن تاۋىپ جاتاتىندىعى ايقىن.

وزدەرىڭىزدىڭ قولداۋلارىڭىزبەن قالادا اتقارىلىپ جاتقان جۇمىستار از ەمەس. سىزدەردى وسى يگى باستامالارمەن تانىستىرىپ جانە جوسپارلانىپ وتىرعان جوبالار تۋرالى پىكىر الماسۋدى ءجون كوردىك.

جامبىل وبلىسىنىڭ 80 جىلدىعىنا وراي پايدالانۋعا بەرىلەتىن «شاحريستان» تاريحي كەشەنى بوي كوتەرۋدە.

وبلىس اكىمى اسقار مىرزاحمەتوۆتىڭ يدەياسىمەن «شاحريستان» ساۋدا ورنىن ءتيىمدى پايدالانۋ جوسپارى وتكەن جىلدىڭ ماۋسىم ايىندا قولعا الىندى، – دەدى شاھار باسشىسى ءوز سوزىندە.

سونىمەن قاتار، قايرات اسكەربەك ۇلى كەشەندە ولكەتانۋ مۇراجايى، كورمە پاۆيلونى، «رۋحانيات» ورتالىعى، كوركەمدىك بەينەلەۋ ونەرىنىڭ گالەرەياسى، قولونەر شەبەرلەرىنىڭ گالەرەياسى،«رەترو-فەستيۆال» امفيتەاترى بوي كوتەرەتىنىن ايتىپ، بۇگىنگى كۇنى كەشەننىڭ قۇرىلىسىن «ءومىرزاق» جاۋاپكەرشىلىگى شەكتەۋلى سەرىكتەستىگى جانە «كدسم» جاۋاپكەرشىلىگى شەكتەۋلى سەرىكتەستىگى ەكى اۋىسىمدا قارقىندى جۇرگىزىپ جاتقانىن جەتكىزدى.

بۇدان بولەك، اتالعان نىساندارمەن قاتار، ەتنو-تاريحي كەشەننىڭ اباتتاندىرۋى مەن ينجەنەرلىك كوممۋنيكاسيالىق ينفراقۇرىلىم جەلىلەرىنىڭ قۇرىلىس جۇمىستارىن ىسكە اسىرۋ اعىمداعى جىلى جوسپارلانعان ەكەن. قالانى كوركەيتۋ جۇمىستارىن جالعاستىرۋ ماقساتىندا، وسى جىلى تولە بي داڭعىلى بويىمەن سىپاتاي باتىر كوشەسىنەن باستاپ «قاراحان» كەسەنەسىنە دەيىنگى سكۆەرى، جاياۋ جۇرگىنشىلەر ايماعى مەن اللەياسى (اربات) جانە «مامىر» ساياباعىن اباتتاندىرۋ مەن «كونە-تاراز» كەشەنىنىڭ ماڭىندا بيىكتىگى 40 مەتردەن تۇراتىن «ساعات» ستەللاسى ورناتىلاماق.

جيىندا ق. دوسايەۆ قالاداعى ءجۇرىپ جاتقان قۇرىلىس جۇمىستارى مەن ينفراقۇرىلىم تارتۋ ءىسى جايىندا دا مولىنان اقپار بەردى.