مىنە، ساناۋلى كۇندەردەن كەيىن ەلىمىزدەگى بارلىق مەكتەپتەردە «العاشقى قوڭىراۋ» سوعىلىپ، جاڭا وقۋ جىلى باستالادى. بۇل تۇرعىدا بالالاردى مەكتەپكە دايىنداۋ دا قالتاعا اجەپتەۋىر سالماق سالاتىندىعى ايتپاسا دا تۇسىنىكتى. اسىرەسە، كوپبالالى جانە تۇرمىسى تومەن وباسىلار ءۇشىن وڭاي سوقپايدى. وسى ورايدا «مەكتەپكە جول» اكسياسىنىڭ تيگىزەر كومەگى كوپ. بۇل ىسكە جامبىلدىقتار دا ايرىقشا اتسالىسىپ، وزىندىك ۇلەستەرىن قوسۋدا.
قالىپتاسقان ءداستۇر بويىنشا اتالمىش اكسيا 1 شىلدەدەن «مەكتەپكە جول» باستاۋ الىپ، بالالارعا قۋانىش سىيلايدى. بۇل ءۇردىس ءبىزدىڭ جامبىل وبلىسىندا دا لايىقتى جالعاسىن تاۋىپ، مۇقتاج وتباسىلارعا كوپ كومەگىن تيگىزۋدە. وسى ورايدا ارنايى ءىس-شارالار جوسپارى ازىرلەنىپ، وبلىس اكىمدىگى تاراپىنان بەكىتىلگەن.
وبلىس اكىمدىگى ءبىلىم باسقارماسى بەرگەن مالىمەتكە سۇيەنسەك، اكسيا اياسىندا بيىلعى 1 شىلدە – 15 تامىز ارالىعىندا وبلىس بويىنشا 1129 رەيدتىك ءىس-شارا جۇرگىزىلگەن.
– رەيدتىك ءىس-شارالارعا ءبىلىم بەرۋ جانە بالالاردىڭ قۇقىعىن قورعاۋ ۇيىمدارىنىڭ، ازاماتتىق قوعام ينستيتۋتتارىنىڭ، بۇقارالىق اقپارات قۇرالدارىنىڭ وكىلدەرى، پوليسيا ءبولىمىنىڭ قىزمەتكەرلەرى، حالىقتى الەۋمەتتىك قورعاۋ سالاسىنىڭ ماماندارى، اتا-انالار، بارلىعى 1689 تۇلعا قاتىستى. اكسيا اياسىندا 2019 جىلعى 1 شىلدە – 15 تامىز ارالىعىندا بارلىعى 18 577 بالاعا 210 ميلليون 665 مىڭ تەڭگە، ونىڭ ىشىندە 17 592 بالاعا 197 ميلليون 869 مىڭ تەڭگە جەرگىلىكتى بيۋدجەت ەسەبىنەن، ال 985 بالاعا 12 ميلليون 795 مىڭ تەڭگە دەمەۋشىلەر ەسەبىنەن ماتەريالدىق كومەك كورسەتىلدى. بۇگىنگى كۇنگە كوپ بالالى جانە از قامتىلعان وتباسىنان شىققان بالالاردىڭ سانى 28230 قۇرايدى، – دەيدى وبلىستىق ءبىلىم باسقارماسىنىڭ باس مامانى گاۋحار بايتەلييەۆا.
جالپى، وتكەن جىلى «مەكتەپكە جول» اكسياسى بارىسىندا 32 106 كوپ بالالى جانە از قامتىلعان وتباسىلاردان شىققان، جەتىم جانە اتا-اناسىنىڭ قامقورلىعىنسىز قالعان بالالارعا 324 ميلليون 752 مىڭ تەڭگەگە ماتەريالدىق كومەك كورسەتىلىپتى. ەندى الداعى ۋاقىتتا وڭىرلىك ءىس-شارالار جوسپارىنا سايكەس بۇل باعىتتاعى جۇمىستار جالعاسا بەرمەك. ايتا كەتەرلىگى، ءبىلىم باسقارماسىندا جىل بويى ازاماتتاردىڭ وتىنىشتەرى بويىنشا جەدەل شارا قولدانۋ ماقساتىندا بايلانىس تەلەفوندارى قىزمەت ەتەدى. اتالعان شارا تۋرالى بىلگىسى كەلگەن ازاماتتار 43-88-32، 43-88-42، 43-88-41 تەلەفوندارى ارقىلى كوكەيىندەگى سۇراقتارىنا جاۋاپ تابا الادى. وسىنداي بايلانىس تەلەفوندارى بارلىق ءبىلىم بولىمدەرىندە دە قىزمەت ەتەدى.
