جامبىل وبلىسىنىڭ اكىمى اسقار مىرزاحمەتوۆتىڭ تىكەلەي تاپسىرماسىنا سايكەس، وڭىردەگى سۋ قويمالارىنىڭ تيىمدىلىگىن ارتتىرۋعا باسا نازار اۋدارىلۋدا دەپ جازادى Qamshy.kz اقپارات اگەنتتىگى. 

جامبىل وبلىسى اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنا قاراستى «جامبىل سۋ قويمالارى» مەملەكەتتىك مەكەمەسى قۇرىلعان 2012 جىلى ونىڭ تەڭگەرىمىندە 30 سۋ قويماسى بولعان ەكەن. بىلتىر ولاردىڭ سانى 73-كە جەتسە، بيىل 100-دەن اسىپ جىعىلىپتى. بۇل يەسىز، بەلگىسىز جاتقان سۋ قويمالارىن انىقتاۋ جۇمىستارىنىڭ ناتيجەسى ەكەندىگى داۋسىز. سونداي-اق «جامبىل سۋ قويماسى» مەكەمەسىنىڭ ماماندارى «قازسۋشار» سەكىلدى رەسپۋبليكالىق كاسىپورىنداردىڭ قاراماعىنداعى سۋ قويمالارىن ءوز تەڭگەردەرىمىنە الۋدىڭ تيىمدىلىگى مول ەكەنىن ايتادى.

وبلىس اكىمى اسقار مىرزاحمەتوۆ مەكەمەنىڭ تەڭگەرىمىندەگى سۋ قويمالاردىڭ سانى ۇلعايعاندىقتان، ايرىقشا قولداۋ ءبىلدىرىپ، ماتەريالدىق-تەحنيكالىق بازاسىن كۇشەيتۋ ماقساتىندا جەرگىلىكتى بيۋدجەتتەن 38 ميلليون تەڭگە قارجى بولۋگە ىقپال ەتىپتى. سونىڭ ارقاسىندا ماتەريالدىق بازا كۇشەيتىلىپ، بولىنگەن قارجىعا قاجەتتى قۇرال-سايماندار الىنعان. ودان بولەك، جاڭا تەحنيكالارمەن قامتاماسىز ەتىلىپ، سۋ قويمالاردىڭ تەحنيكالىق جاعدايىن ءوز دەڭگەيىندە قاداعالاۋ ماقساتىندا قوسىمشا 15 شتاتتىق بىرلىك بەرىلىپتى.

بۇگىندە مەكەمەنىڭ تەڭگەرىمىندەگى سۋ قويمالارى مەن بوگەتتەر 5 اۋداندىق بولىمشەلەرگە ءبولىنىپ بەرىلگەن. بۇل بولىمشەلەردە قازىرگى تاڭدا جالپى سانى 36 قىزمەتكەر جۇمىس اتقارادى. وبلىس اكىمىنىڭ تاپسىرماسىنا سايكەس سۋارمالى ەگىستىك جەرلەردىڭ القابىن ۇلعايتۋ ماقساتىندا سۋ قويمالارىنىڭ تەحنيكالىق جاعدايىن جاقسارتۋ بويىنشا ناقتى تاپسىرمالار دا جۇكتەلگەن.

ءقازىر سۋ قويمالارىنىڭ جاعدايى جەرگىلىكتى بيلىكتىڭ باستى نازارىندا. ويتكەنى، وڭىردەگى سۋارمالى ەگىستىك البىنىڭ كولەمىن ارتتىرۋ ءۇشىن بۇل نىسانداردىڭ تيگىزەر پايداسى مول. سوندىقتان دا جوندەۋ جۇمىستارىنا كوڭىل بولىنۋدە. بىلتىر ايماقتاعى 5 سۋ قويماسىنا «جامبىل سۋ قويمالارى» مەكەمەسىنىڭ كۇشىمەن اعىمداعى جوندەۋ جۇمىستارى جۇرگىزىلگەن.

مىسالى، بايزاق اۋداندىق بولىمشەسىنە قاراستى «كوشەنەي» سۋ قويماسىنىڭ سىيىمدىلىعى 800 مىڭ تەكشەمەتر. ونىڭ 800 مەتر بوگەتىنىڭ 36 مەترىنە توپىراق تاستالىپ، جالى بيىكتەتىلگەن. ال «شالكە» سۋ قوماسىنىڭ سىيىمدىلىعى 550 تەكشەمەتر. ونىڭ دا 1 شاقىرىم 800 مەتر بولاتىن بوگەتىنىڭ 148 مەترى جوندەلىپتى. اتالمىش سۋ قويمالارىن جوندەۋ ءۇشىن «جامبىل سۋ قويماسى» كاسىپورنىنىڭ 1 ەكسكوۆاتورى، اۋدانداعى بولىمشە ماماندارى جۇمىلدىرىلىپ، ءبىرلى-جارىم شارۋاشىلىقتىڭ تەحنيكاسى پايدالانىلىپ، جۇمىسشىلارى كومەك بەرگەن. «كوشەنەي» سۋ قويماسىنىڭ سۋى ەگىستىككە پايدالانىلسا، «شالكە» سۋ قويماسى بالىق شارۋاشىلىعى جانە باسقا سۋ قويمالارىنا سۋ جىبەرىپ وتىرۋعا ارنالعان ەكەن. بوگەتتەر 2 مەترگە دەيىن بيىكتەتىلگەن.

بۇل باعىتتاعى جۇمىستار الداعى ۋاقىتتا جالعاسا بەرەتىن بولادى.