جامبىل وبلىسىندا اتاقتى سازگەر التىنبەك قورازبايەۆ انگە قوسقان «قارا كەمپىرگە» ەسكەرتكىش قويىلعانىن بىرەۋ بىلسە، بىرەۋ بىلمەس. الايدا انگە ارقاۋ بولعان كەيۋانانىڭ قاسىرەتتى تاعدىرى كىم-كىمدى بولسا دا بەي-جاي قالدىرمايدى. 1993 جىلى تۇرعىزىلعان ەسكەرتكىش مەركى اۋدانىنىڭ جاڭاتوعان اۋىلىندا ورنالاسقان دەپ جازادى Qamshy.kz اقپارات اگەنتتىگى.
تەگىندە تاۋەلسىزدىككە دەيىن قازاق دالاسىندا نەبىر زۇلمات پەن ناۋبەتتىڭ ورىن العانى تاريحتان بەلگىلى. حح عاسىردىڭ وزىندە ءامىرشىل جۇيەنىڭ بىرىنەن كەيىن ءبىرى جۇرگىزگەن رەتسىز رەفورمالارى، ازاماتتىق سوعىس، اشارشىلىق، ساياسي قۋعىن سۇرگىن، دۇنيەجۇزىلىك سوعىس قاسىرەتى مىڭداعان قازاق وتباسىنىڭ ارقاسىن ايازداي قارىدى. ءتىپتى كەي وتباسىلاردىڭ وتى ءوشىپ، قازانى توڭىرىلگەن كۇيدە قالدى. وسى ءبىر زامان سازىن نازىك ىرعاقپەن شەرتە العان التىنبەك قورازبايەۆتىڭ «قارا كەمپىر» ءانى وتكەن عاسىردا كوپشىلىكتىڭ كوزىنە جاس الدىرعانى ءمالىم. الايدا سول كوپشىلىك بۇل انگە جامبىل وبلىسىنداعى مەركى اۋدانىنداعى قىزىلساي اۋىلىنداعى قالي انانىڭ مۇڭلى تاعدىرى ارقاۋ بولعانىنان حابارسىز. جەرگىلىكتى تۇرعىندار اراسىندا «قارا كەمپىر» جايىنداعى اڭىز ءالى كۇنگە ايتىلىپ ءجۇر. سۇراپىل سوعىسقا اتتانعان جەكسەنقۇل، قوسشىعۇل اتتى قوس ۇلىنان قاتار ايىرىلعان قالي انانىڭ ءىشقۇسا بولعان انانىڭ زارى مەن كۇيىگىنەن «قارا كەمپىر» ءانى تۋادى. ال 993 جىلى «قارا كەمپىر» ءانىنىڭ كەيىپكەرىنە ەسكەرتكىش تۇرعىزىلادى.
سوعىستان قايتپاي قالعان قوس ۇلىنىڭ جولىنا تەلمىرۋىمەن وتكەن اناعا ارنالعان مەموريالدىق كەشەننىڭ بيىكتىگى 4 مەتردى قۇرايدى. بەتوننان قۇيىلعان ءتورتبۇرىش تۇعىردىڭ ۇستىنە ورناتىلعان. توبەنىڭ ەتەگىندە ەسكەرتكىشكە باراتىن، ساتىلى جولدىڭ بويىندا:
«وووي، دۇنيە-اي!
قارايمىن باتىس جاققا كەلە مە دەپ،
اناسىن قايعى شەككەن كورە مە دەپ.
سۇرايمىن وتكەننەن دە، كەتكەننەن دە
حابارىن قوس قوزىمنىڭ حابارىن بەرەمە دەپ» – دەگەن ءبىر شۋماق ولەڭ قىزىل تاسقا قاشالىپ جازىلعان. بۇل ءاننىڭ ءسوزىن جەرگىلىكتى اقىن جاقسىلىق ساتىبەكوۆ جازعان.
ال قالي انا بەينەسى ۇلتتىق ناقىشتا كيىنگەن، اعاش بۇتاعىنا سۇيەنىپ تۇرعان كۇيىندە بەينەلەنگەن. وسى كەيپىمەن-اق ءمۇسىن ادامنىڭ جۇرەگىن تەبىرەنتىپ، كوڭىلىنە مۇڭ ۇيالاتادى. باجايلاپ قاراعان جان كەيۋانا جۇزىنەن ۋايىم مەن قاجۋدىڭ تابى بايقاپ، ءومىردىڭ قۇندىلىقتارى، انانىڭ بالا دەگەن رياسىز ماحابباتى جايىندا تۇڭعيىق ويعا بەرىلەدى. ازىرگە بۇل ەل اۋماعىنداعى ءان كەيىپكەرىنە قويىلعان ەسكەرتكىشتىڭ بىردەن ءبىر نۇسقاسى بولىپ ەسەپتەلەدى.
پىكىر قالدىرۋ