قازاقستاندا اۋماعىندا «قىز اۋليە» اتالاتىن جەرلەر وتە كوپ. ولاردىڭ ءبارى دە ەل باسىنا كۇن تۋعاندا ەتىگىمەن سۋ كەشكەن ەرلەرمەن تىزە بىرىكتىرە اتقا قونىپ، قولىنا قارۋ العان جاۋجۇرەك ارۋلارعا ارنالعان. «رۋحاني جاڭعىرۋ» باعدارلاماسى اياسىندا حالىق جادىندا قايتا جاڭعىرعان سونداي ورىننىڭ ءبىرى جۋالى ولكەسىندەگى قۇلان تاۋىنىڭ «قىز اۋليە» شاتقالى سانالادى دەپ جازادى Qamshy.kz اقپارات اگەنتتىگى. 

«قىز اۋليە» شاتقالى ماڭىنان باستالعان بۇلاق تاۋدىڭ ەتەگىندەگى ەگىندى القاپتاردى سۋارۋعا كادەگە جارايدى. بۇلاق باستاۋىندا فلورانىڭ مول ءتۇرىن كەزىكتىرۋگە بولادى. «قىز اۋليەگە» شاتقالى زيارات ەتە بارعاندار ونىڭ باسىنداعى تالعا اق ماتا بايلاپ، بۇلاق سۋىن ەمگە پايدالانادى. ەل اراسىندا «قىز اۋليەگە شىن نيەتىمەن بارعانداردىڭ بويىنداعى، ومىرىندەگى تۇيىندەر تارقاتىلادى ەكەن»، دەگەن اڭعىزعا بەرگىسىز اڭگىمەلەر دە ءجيى ايتىلادى.

ال «قىز اۋليەگە» قاتىستى ايتىلاتىن اڭىزداردىڭ ءبىر نۇسقاسىندا قىرىق قىز كومەكشىلەرىن ەرتكەن ءبىر حاننىڭ قىزى شاتىر تىگىپ وتىرعانى ءسوز بولادى. وسى ماڭداعى اۋىلدا تۇراتىن كونەكوز قاريا دەربىش ەسىمدى قاريانىڭ اۋزىنان جازىپ الىنعان ەستەلىكتە «قىز اۋليە» تۋرالى اڭىزدى بىلاي باياندالادى: «ىلگەرىدە وسى مەكەندە ءبىر قىز ءومىر سۇرگەن دەسەدى. ول جاستايىنان كەلەشەكتى بولجايتىن كورىپكەلدىك قاسيەتكە يە بولىپتى. قىزعا كەلىپ بال اشتىرىپ، ونىڭ ايتقانىنىڭ ءدال كەلەتىنە وسى ماڭنىڭ تۇرعىندارى ءتانتى بولعان ەكەن. كۇندەردىڭ كۇنىندە وسى ءوڭىردى جايلاپ وتىرعان ءبىر بايدىڭ تابىن جىلقىسى جوعالىپ كەتەدى. اينالانى تۇگەل شولىپ، اقىرى امالى تاۋسىلعاسىن باي جىلقىلاردىڭ قولدى بولعاندىعىن سەزىپ، الگى قىزعا كەلىپ بال اشتىرادى. سوندا كورىپكەل قىز ۇزاق ويلانباستان: «ءسىزدىڭ تىلەگىڭىزدى ورىندايىن، الايدا قوياتىن ءبىر شارتىم بار. مەن جىلقىلاردى تاۋىپ بەرگەنىممەن ومىرىمە سول قاراقشىلاردان ۇلكەن ءقاۋىپ تونگەلى تۇر. سوندىقتان دا ءسىز مەنىڭ ءومىرىم مەن قاۋىپسىزدىگىمدى قورعاۋىڭىز كەرەك» – دەگەن شارت قويادى. تەك بايۋدى عانا ويلاعان باي ويلانباستان قىزعا كەلىسىمىن بەرەدى. جىلقىلارى تابىلىپ، قاراقشىلاردىڭ قىلمىسى اشكەرە بولادى. العاشىندا قىزعا بەرگەن ۋادەسىن بەرىك ورىنداعان باي ۋاقىت وتە ءوزىنىڭ كۇيكى تىرلىگىنىڭ قامىمەن كەتىپ قىزدىڭ شارتى ۇمىتىلىپ كەتەدى. ەل – جۇرتتىڭ الدىندا ۇرلىقتارى اشكەرە بولىپ، ماسقارا بولعان قاراقشىلار ءبىر ۇرىمتال قاراڭعى ءتۇندى پايدالانىپ، قىزدى بۋىندىرىپ ءولتىرىپ كەتەدى. سول ۋاقىتتان باستاپ جەردىڭ اتاۋى «قىز اۋليە» شاتقالى دەپ اتالىپ كەتكەن»، دەيدى قاريا.

قالاي دەسەكتە جەرگىلىكتى تۇرعىندار وسى شاتقالىن كيەلى سانايدى. اۋىرعاندارى دەرتىنە داۋا سۇرايدى. ءتىپتى «قىز اۋليە» شاتقالىنىڭ ماڭىندا وسكەن اعاشتىڭ ءبىر شىبىعىنا دا قول سۇقپايدى.