2004 جىلدىڭ 28 تامىزىن قازاقستاندىق بوكس جانكۇيەرلەرى ءالى كۇنگە ەستەن شىعارمايدى. ويتكەنى ءدال وسى كۇنى افينا وليمپياداسىنداعى ۇلتتىق قۇراما قورجىنىنداعى جالعىز التىن القانى جامبىلدىق باقتيار ارتايەۆ جەڭىپ العان ەدى دەپ جازادى Qamshy.kz اقپارات اگەنتتىگى.
كۇللى الەم كوز تىككەن بۇل باسەكەدە اۋەسقوي بوكسدان 69 كەلى سالماق دارەجەسىندە ەل نامىسىن قورعاعان باقتيار ۋكراينانىڭ ۇكىلەگەن ءۇمىتى ۆيكتور پولياكوۆپەن قولعاپ ءتۇيىستىردى. بۇل سايىستا ءوزىن بارىنشا ەركىن ۇستاعان قازاق سپورتشىسى كەزدەسۋ تاعدىرىن ءۇشىنشى راۋندتا شەشتى. ارينە اۋەسقوي بوكستا جەكپە-جەكتىڭ راۋند مارەسىنە جەتپەي اياقتالۋى نەعايبىل. الايدا باقتيار ءبىر مەزەتتە قارسىلاسىنا ۇزدىكسىز جۇمساعان سوققىلارى ەسەبىنەن 6 ۇپاي ولجالاعان تورەشى كەزدەسۋدى توقتاتۋعا ءماجبۇر بولدى. ال جارتىلاي فينالدا جامبىلدىق جامپوز بالا كۇنىنەن ءوزى ەلىكتەگەن رەسەيلىك ولەگ سايتوۆپەن جەكپە-جەككە شىقتى. ەكى مارتە وليم شىڭىن باعىندىرىپ، ەكى مارتە ەۋروپا بىرنشىلىگىن وزا شىققان سايتوۆتاي سايىپقىراندى ءتورت راۋند بويى ەس جيعىزباي سوققىنىڭ استىنا العان باقتياردىڭ بۇل ارەكەتى كوپتى ءسۇيسىنتتى. سولاي سايتوۆتىڭ رەسەي بوكس تاريحىنداعى ءۇش دۇركىن وليمپيادا چەمپيونى بولۋ دەگەن اسقاق ارمانى كوككە ۇشتى.
ال فينالدىق جەكپە-جەكتى ارتايەۆ كۋبالىق اراگونعا قارسى وتكىزدى. ءا- دەگەننەن جەكپە-جەككە قارقىنمەن كىرىسكەن باقتيار كۋبالىق بوكسشىنىڭ تىنىسىن تارىلتتى. بۇعان دەيىنگى سايىستارىندا ءوزىن رينگتىڭ قوجايىنىنداي سەزىنەتىن اراگون بۇل جولى شىنداپ ساستى. قازاق بوكسشىسىنىڭ كوز ىلەسپەس قيمىلى ءتورت راۋند بويى تومپەشتەگەن ول كۇمىستى قاناعات تۇتۋعا ءماجبۇر بولدى. دەلبەسى قوزعان جانكۇيەرلەر دە ەلەكتروندى تابلوداعى ەسەپتى كورگەندە بارىپ قازاق بوكسشىسىنىڭ وليمپيادا چەمپيونى بولعانىن ءتۇسىندى.
قارسىلاسىنان 10 ۇپاي ايىرماسىمەن باسىم تۇسكەن ارتايەۆ وسىلايشا افينا وليمپياداسىنداعى ۇلتتىق قۇراما قورجىنىنداعى جالعىز التىنعا يە
بولدى. التىن القامەن قوسا ارتايەۆ سول جولى شارشى الاڭداعى شەبەرلىگى شاربولاتتاي شىڭدالعان بوكسشىلارعا عانا بەرىلەتىن ۆەل باركەر كۋبوگىن يەلەندى. وسى جەڭىستەن كەيىن جازعى وليمپيادا ويىندارىنداعى اۋەسقوي بوكستا 69 كەلى سالماق دارەجەسى «قازاقتىڭ جەڭىس سالماعىنا» اينالدى. ودان كەيىنگى وليمپيادا ويىندارىندا ءدال وسى سالماقتا ونەر كورسەتكەن باقىت سارسەكبايەۆ، سەرىك ساپييەۆ، دانيار ەلەۋسىنوۆ قازاق ءانۇرانىن ءوليمپتىڭ بيىك تۇعىرىندا تۇرىپ شىرقادى.
پىكىر قالدىرۋ