اقتاۋ قالاسىندا وزبەكستان رەسپۋبليكاسىنىڭ باس كونسۋلدىعى اشىلدى. بۇل باۋىرلاس قازاق پەن وزبەك ەلدەرىنىڭ اراسىنداعى دوستىق قارىم-قاتىناستى ودان ءارى نىعايتۋ جولىنداعى ماڭىزدى شارالاردىڭ ءبىرى. تاريحي ءساتتىڭ تاعى ءبىر ەرەكشەلىگى - وزبەكستان رەسپۋبليكاسىنىڭ باس كونسۋلدىعى قازاقستان رەسپۋبليكاسىنىڭ كونستيتۋسياسى كۇنى جانە وزبەكستان رەسپۋبليكاسىنىڭ تاۋەلسىزدىگى كۇنى اياسىندا اشىلۋدا. سونداي-اق، 2019 جىلى وزبەكستان ەلىندە قازاقستاننىڭ جىلى دەپ جاريالانىپ، جوعارى دەڭگەيدە ۇيىمداستىرىلۋدا. 
- بۇگىن قاسيەتتى ماڭعىستاۋ وڭىرىندە تاريحي ءساتتىڭ كۋاسى بولىپ وتىرمىز. جوسپارلى تۇردە ەكى حالىق اراسىنداعى ەجەلگى، تەرەڭ تاريحى بار مادەني جانە رۋحاني بايلانىسىمىز ودان ءارى كەڭەيىپ كەلەدى. ەكى ەل اراسىنداعى دوستىق قارىم-قاتىناسىمىز ودان ءارى نىعايا بەرگەي، - دەپ قۇتتىقتادى ماڭعىستاۋ وبلىسىنىڭ اكىمى سەرىكباي ترۇموۆ. 
ايتا كەتەيىك، اعىمداعى جىلدىڭ 17 شىلدەسى كۇنى ەكى ەلدىڭ ۇكىمەت باسشىلارىنىڭ قاتىسۋىمەن «بەينەۋ-اقجىگىت-وزبەكستان» رەسپۋبليكالىق ماڭىزى بار اۆتوجولى سالتاناتتى تۇردە اشىلدى. بۇل ەكى مەملەكەت اراسىنداعى ەكونوميكالىق جوبالاردى ىسكە اسىرۋعا ۇلكەن سەرپىلىس بەرەتىنى انىق. 
2019 جىلدىڭ تەك ءبىرىنشى جارتىجىلدىعىندا ماڭعىستاۋ وبلىسىنىڭ وزبەكستان رەسپۋبليكاسىنىڭ اراسىنداعى تاۋار اينالىمى 1،5 ملن. اقش دوللارىن قۇرادى. بۇل كورسەتكىش وتكەن جىلمەن سالىستىرعاندا 4،3% جوعارى.
سونىمەن قوسا، ماڭعىستاۋ وبلىسىندا بۇگىنگى كۇنى ءارتۇرلى سالادا وزبەك كاپيتالىنىڭ قاتىسۋىمەن 33 بىرىككەن كاسىپورىندارى جۇمىس جاسايدى. 
پىكىر قالدىرۋ