الدامەن ميكرو جانە شاعىن بيزنەستى تابىسقا سالىناتىن سالىقتان 3 جىلعا بوساتۋدى تاپسىرىلدى. سونداي-اق جۇمىس بەرۋشىنىڭ جۇمىسشىعا قوسىمشا 5 پايىز زەينەتاقى اۋدارۋى 2023 جىلعا شەگەرىلدى.

جولداۋ جاريالانعان جيىندا پرەزيدەنت بيزنەسكە بولىنەتىن قاراجاتتىڭ ءتيىمدى جۇمسالۋىن قاتاڭ باقىلاۋدى تاپسىردى. بۇل مىندەت ەسەپ كوميتەتى مەن قارجى مينيسترلىگىنە جۇكتەلدى.

"ءتيىمدى شاعىن جانە ورتا بيزنەس – قالا مەن اۋىلدى دامىتۋدىڭ بەرىك نەگىزى. شاعىن، اسىرەسە ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن اۋىل تۇرعىندارىنا تۇراقتى جۇمىس بەرىپ، جۇمىسسىزدىقتى ازايتادى. سونداي-اق، جاپپاي كاسپىكەرلىكتى دامىتۋ – ساناعا سىڭگەن پاتروناليستىك پيعىل مەن ماسىلدىقتان ارىلۋعا مۇمكىندىك بەرەدى. سوندىقتان، مەملەكەت الداعى ۋاقىتتا دا بيزنەسكە قولداۋ كورسەتەدى. ۇلتتىق قوردان 100 ملرد تەڭگەگە جۋىق قارجى ءبولىندى. ءبىراق، ساراپشىلاردىڭ پىكىرىنشە، قارجىلاي قولداۋدىڭ يگىلىگىن جەرگىلىكتى بيلىكپەن بايلانىسى بار شارۋاشىلىقتار عانا كورىپ وتىر. شىن مانىندە جاڭا جوبالار بويىنشا كومپانيالار قۇرىلىپ، جۇمىس ورىندارى اشىلۋى كەرەك ەدى. ءبىراق، جەرگىلىكتى اكىمدەر ۇيىمداستىرۋ جۇمىستارىن تالاپقا ساي ورىنداماعان. سونىڭ سالدارىنان سالىق جانە زەينەتاقى تولەمدەرىن ارتتىرىپ، جەرگىلىكتى بيۋدجەتتى نىعايتۋعا جاعداي جاسالىپ وتىرعان جوق"، – دەدى مەملەكەت باسشىسى قازاقستان حالقىنا جولداۋىندا.

سونداي-اق ق.توقايەۆ بيزنەستىڭ دامۋىنا كەدەرگى كەلتىرۋ – مەملەكەتكە قارسى قىلمىس جاساۋمەن بىردەي ەكەنىن ايتتى.

"شاعىن جانە ورتا بيزنەسكە قاتىستى رەيدەرلىك جيىلەپ كەتتى. مەنىڭ بۇل ماسەلە بويىنشا ۇستانىمىم ايقىن. بيزنەستىڭ دامۋىنا، اسىرەسە شاعىن جانە ورتا بيزنەستىڭ دامۋىنا كەدەرگى كەلتىرۋگە باعىتتالعان كەز كەلگەن ارەكەت مەملەكەتكە قارسى قىلمىس رەتىندە قارالۋى كەرەك. وسىعان بايلانىستى زاڭنامالىق تۇرعىدا قوسىمشا شارالار قابىلداۋ كەرەك. پارلامەنت پەن ۇكىمەت بۇل ماسەلەنى شەشۋدىڭ جولىن ۇسىنۋى قاجەت. سونىمەن بىرگە، كولەگەيلى ەكونوميكاعا قارسى ىس-ارەكەتتى كۇشەيتىپ، كاپيتالدى سىرتقا شىعارۋعا جانە سالىق تولەۋدەن جالتارۋعا قارسى كۇرەستى قاتاڭداتۋ كەرەك»، – دەدى پرەزيدەنت.