2020 جىلدان باستاپ جىل سايىن 10 مىڭ وتباسى "باقىتتى وتباسى" باعدارلاماسى ارقىلى باسپانالى بولادى. بۇل تۋرالى قاسىم-جومارت توقايەۆ قازاقستان حالقىنا جولداۋىندا ايتتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
"ۇكىمەتكە تۇرعىن ءۇي قۇرىلىسىنىڭ ءبىرىڭعاي مودەلىن دايىنداپ، ءوزارا الشاق باعدارلامالار قابىلداۋدان كەتۋدى تاپسىرامىن. مىسالى، "7-20-25" باعدارلاماسى و باستا الەۋمەتتىك باعدارلاما بولادى دەپ كۇتىلگەن. قارىز الۋشىنىڭ وتباسىلىق ورتاشا تابىسى ايىنا 320 مىڭ تەڭگە بولۋى كەرەك ەدى. تابىسى ماردىمسىز ادامداردىڭ قالتاسى ول باعدارلاماعا قاتىسۋدى كوتەرمەيتىن بولىپ شىقتى. سوندىقتان، بيىل ەلباسىنىڭ باستاماسىمەن جەڭىلدىك مولشەرلەمەسى 2 پايىز، العاشقى جارناسى 10 پايىز بولاتىن "باقىتتى وتباسى" اتتى جاڭا باعدارلاما ىسكە قوسىلدى. بۇل ايتارلىقتاي ءتيىمدى شارت. جىل سوڭىنا دەيىن التى مىڭعا جۋىق وتباسى وسى باعدارلاما بويىنشا باسپانالى بولادى. ءبىرىنشى كەزەكتە كوپبالالى وتباسىلار مەن مۇگەدەك بالا اسىرۋشى جانۇيالار قامتىلادى. 2020 جىلدان باستان جىل سايىن 10 مىڭ وسىنداي وتباسى باسپانامەن قامتىلادى"، – دەگەن پرەزيدەنت ۇكىمەتكە باعدارلاماعا قاتىسۋدىڭ ايقىن كريتەرييلەرىن دايىنداۋدى جۇكتەدى.
"قولداۋ تەك شىنىمەن دە مۇقتاج ادامدارعا كورسەتىلۋى ءتيىس. ۇكىمەتكە الداعى 3 جىلدا كەزەكتە تۇرعان از قامتىلعان، كوپبالالى وتباسىلاردى باسپانامەن قامتۋ ماسەلەسىن شەشۋدى تاپسىرامىن. ولاردىڭ سانى ءقازىر 30 مىڭعا جۋىق. تابىسى جوق ازاماتتارعا جەكە باسپانا ساتىپ الۋ ءۇشىن الەۋمەتتىك ارەندا شارتى بويىنشا مۇمكىندىك بەرۋ كەرەك. بۇل ماقساتقا 2022 جىلعا قاراي 240 ملرد تەڭگە قاراستىرىلعان"، – دەدى قاسىم-جومارت توقايەۆ.
پىكىر قالدىرۋ