مەملەكەتتىك ەڭبەك ينسپەكسياسى باسقارماسىنىڭ باسشىسى يگىلىك اۋباكيروۆتىڭ ايتۋىنشا، جەدەل جەلى قىزمەتكەرلەردىڭ قۇقىقتارى بۇزىلۋ فاكتىلەرىنە دەر كەزىندە جاۋاپ قاتۋ ءۇشىن قوسىلعان، – دەپ حابارلايدى اتىراۋ وبلىسىنىڭ وڭىرلىك كوممۋنيكاسيالار قىزمەتى.

ي.اۋباكيروۆ ەڭبەك ينسپەكسياسىنىڭ مىناداي نەگىزگى مىندەتتەرىن اتاپ ءوتتى: ​ ​ ​ ​ ​ ​

– ق ر ەڭبەك زاڭناماسىنىڭ ساقتالۋىنا مەملەكەتتىك باقىلاۋدى قامتاماسىز ەتۋ؛

– قىزمەتكەرلەردىڭ قۇقىقتارى مەن ەركىندىكتەرىنىڭ (سونىڭ ىشىندە، ءقاۋىپسىز ەڭبەك جاعدايلارىنىڭ) ساقتالۋى مەن قورعالۋىن قامتاماسىز ەتۋ؛

– ق ر ەڭبەك زاڭناماسىنىڭ ماسەلەلەرى بويىنشا قىزمەتكەرلەر مەن جۇمىس بەرۋشىلەردىڭ وتىنىمدەرىن، مالىمدەمەلەرىن، ارىزدارىن قاراۋ.

– جەدەل جەلىدە 1302 تەز قوڭىراۋ شالۋ ءنومىرىن، سونداي-اق، WhatsApp-تا 87719927263 ءنومىرىن ىسكە قوستىق. سولار ارقىلى وبلىستىڭ تۇرعىندارى وزدەرىن قىزىقتىراتىن بارلىق ماسەلەلەر بويىنشا ەركىن اقىل-كەڭەس الا الادى، – دەدى يگىلىك اۋباكيروۆ. – تۇسكەن سيگنالداردىڭ بارلىعىنا ءبىز ۋاقتىلى جاۋاپ قاتامىز.​ ​ ​ ​ ​

​سونداي-اق، ي.اۋباكيروۆتىڭ ايتۋىنشا، ءقازىر تەڭىز كەن ورنىندا مەملەكەتتىك ەڭبەك ينسپەكسياسىنىڭ كەڭسەسى اشىلعان. قىزمەتكەرلەر تاراپىنان ەڭبەك قۇقىقتارىنا قاتىستى ساۋالدار تۋىنداعان جاعدايدا، ۆاحتالىق پوسەلكەدەگى ينسپەكتورلار ۋاقتىلى جاۋاپ قاتا الادى. ​

– الداعى ۋاقىتتا بارلىق ءىرى ۆاحتالىق پوسەلكەلەردە ينسپەكتورلاردى ورنالاستىرۋدى جوسپارلاپ وتىرمىز، – دەپ وي ءبولىستى باسقارما باسشىسى. –ەڭبەك ينسپەكتورلارى جەرگىلىكتى جەرلەردە تۇسكەن ارىزداردىڭ بارلىعىنا جاۋاپ قاتىپ وتىرادى. تەڭىز كەن ورنىندا ولار ءوزىنىڭ تيىمدىلىگىن دالەلدەپ ۇلگىردى.​ ​ ​ ​

سونداي-اق، ي.اۋباكيروۆتىڭ ايتۋىنشا، مۇناي سالاسىنداعى قىزمەتكەرلەردىڭ كونتراكتىلەرىنىڭ اياقتالۋىنا بايلانىستى كوپ سۇراقتار تۋىندايدى. ​ ​ ​ ​

– وسى جەردە كەلەسىدەي ماسەلەنىڭ باسىن اشىپ الۋ قاجەت: ەگەر ادام ءبىر جىلعا كونتراكتىگە تۇرىپ، ول اياقتالعاسىن، جۇمىس كولەمىنىڭ ورىندالۋىنا بايلانىستى قىزمەتكەرمەن ەسەپ ايىرىسۋ جاسالسا، بۇل زاڭ بۇزۋشىلىق بولىپ تابىلمايدى. ءبىراق، قىزمەتكەردى كونتراكتىسى بىتكەنشە لاۋازىمىنان بوساتىپ جاتسا، بىزگە حابارلاسسىن. ءبىز تەكسەرۋ جۇرگىزىپ، ونىڭ قۇقىقتارىن قورعاۋ ءۇشىن بار مۇمكىندىكتەردى پايدالانامىز، – دەپ سەندىردى اتىراۋ وبلىسى مەملەكەتتىك ەڭبەك ينسپەكسياسى باسقارماسىنىڭ باسشىسى. ​