جامبىل وبلىسىندا تابيعي ورتتەردىڭ الدىن الۋ ماقساتىندا اۋداندىق تج بولىمدەرى، جەرگىلىكتى پوليسيا قىزمەتى جانە جەرگىلىكتى اتقارۋشى ورگاندار جەكە قۇرامىنىڭ كۇشىمەن جالپى سانى 97 ادامنان تۇراتىن 17 بىرلەسكەن ۇتقىر توپ قۇرىلدى. ولار باقىلانبايتىن اۋىل شارۋاشىلىعى ورتتەرىنىڭ الدىن الۋ جانە ورماندى دالا القاپتارىندا ءورت قاۋىپسىزدىگى تالاپتارىن ساقتاۋ بويىنشا 498 رەيدتىك ءىس-شارالاردى جۇزەگە اسىردى. قۇرعاق ءشوپ پەن قوقىستى ورتەۋ ءۇشىن 95 جەكە تۇلعا اكىمشىلىك جاۋاپكەرشىلىككە تارتىلدى، ونىڭ ىشىندە 58–ءى جالپى سوماسى 268 مىڭ 912 تەڭگە ايىپپۇل سالىندى جانە 37 - ءى ەسكەرتۋ بەرىلدى دەپ جازادى Qamshy.kz اقپارات اگەنتتىگى. 

كۇزگى-قىسقى كەزەڭدە جينالعان شوپتەردىڭ جانۋ وقيعالارى ءجيى ورىن الادى. دەگەنمەن، مۇنداي ورتتەر كوكتەمدە نەمەسە جازدا دا بولۋى مۇمكىن.

ادامداردىڭ مال ازىعىن دايىنداعان كوپ كۇندىك ەڭبەگى كەيدە زايا كەتەدى. سونىمەن، 2019 جىلدىڭ باسىنان جامبىل وبلىسىندا ءشوپ جيناۋ ورىندارىندا 87 ءورت وقيعاسى تىركەلىپ، ورلاردىڭ سالدارىنان 4،5 مىڭ توننادان استام ءشوپ جانىپ كەتتى، ال ماتەريالدىق شىعىنى 21 ملن. استام تەڭگەنى قۇرادى. وتكەن جىلدىڭ ۇقساس كەزەڭىندە ءشوپ جيناۋ ورىندارىندا 98 ءورت ورىن الىپ، 1،8 مىڭ توننادان استام ءشوپ جويىلدى.

ءشوپ پەن سابان جانۋىنىڭ نەگىزگى سەبەپتەرى – تۇرعىنداردىڭ وتپەن ابايسىز بولۋى نەمەسە قاساقانا وت قويۋ. جەم-شوپتەر كوبىنەسە جولعا وتە جاقىن جينالادى، ال ابايسىزدا نەمەسە ادەيى تاستالعان تەمەكى تۇقىلى ورتكە اكەلىپ سوعادى. مۇنداي وقيعالاردىڭ الدىن الۋ ءۇشىن ەڭ الدىمەن ورتكە قارسى ەرەجەلەر مەن نورمالاردى قاتاڭ ساقتاۋ قاجەت. ءشوپحانا ەلەكتر وتكىزۋ جەلىلەرىنەن مەيلىنشە الىس جانە قورشالعان جەرلەردە ورنالاسۋى ءتيىس. ەگەر جاقىن جەردە سۋ قورى بولسا، توتەنشە جاعداي ورنى العان جاعدايدا وتتى تەز سوندىرۋگە بولادى.

قوجالىق جانە فەرمەرلىك شارۋاشىلىقتاردا توتەنشە جاعدايلار كەزىندە ارنايى ءورت سوندىرۋگە يكەمدەلگەن تەحنيكا دايىن تۇرۋى قاجەت، ال ەگىن مەن استىق جيناۋعا جۇمىلدىرىلعان كولىكتەر ۇشقىن وشىرگىشتەرمەن جانە ءورت ءسوندىرۋ قۇرالدارىمەن جابدىقتالۋى ءتيىس.

تۇرعىن ءۇيدىڭ مەكەن ۋچاسكەلەرىندە شوپتەردى جيناۋ عيماراتقا جانە اۋلا الدىنداعى قۇرىلىستارعا دەيىن كەمىندە 15 مەتر قاشىقتىقتا ورىندالادى. اتالعان قاشىقتىقتا شوپتەردى جيناۋ مۇمكىن بولماعان جاعدايدا جيناۋ ورنىن كەمىندە 500 ليتر سۋى بار قوسىمشا ىدىسپەن قامتاماسىز ەتكەن جاعدايدا قاشىقتىقتى 5 مەترگە دەيىن قىسقارتۋعا بولادى.