تاراز قالاسىنداعى م.ح. دۋلاتي اتىنداعى تاراز مەملەكەتتىك ۋنيۆەرسيتەتىنىڭ م. ف. ۇركىمبايەۆ اتىنداعى جاستار سارايىندا "تۇركسوي" جاستار كامەرالىق وركەسترىنىڭ كونسەرتى ءوتتى دەپ جازادى Qamshy.kz اقپارات اگەنتتىگى.
تۇركى كەڭەسىنىڭ 10 جىلدىعىنا ارنالعان تۇركسوي جاستار كامەرالىق وركەسترىنىڭ كونسەرتتىك تۋرنەسى تۇركىستان قالاسىنان باستالعان بولاتىن. كونسەرتتىك باعدارلاما قازاقستاننىڭ تۇركىستان، شىمكەنت، تاراز، الماتى قالالارىندا، قىرعىزستاننىڭ بىشكەك جانە ازەربايجاننىڭ باكۋ قالالارىندا جالعاساتىن بولادى.
بۇگىنگە دەيىن قۇرامىندا 10 ەلدىڭ 100-دەن استام تالانتتى جاستارى ونەر كورسەتكەن وركەسترگە بۇل جولى تاتارستاننان رەنات سالاۆاتوۆ، قازاقستاننان انۆار اكباروۆ، ازەربايجاننان مۇستافا مەحمەنداروۆ ديريجەرلىك ەتتى.
"تۇركسوي" حالىقارالىق ۇيىمى 1993 جىلى تۇركى تىلدەس حالىقتار اراسىنداعى ورتاق تاريحى مەن مادەنيەتى بار رۋحاني بايلانىستاردى قالپىنا كەلتىرۋ ماقساتىندا قۇرىلدى. ۇيىمنىڭ قامقورلىعىمەن حالىقارالىق كامەرالىق وركەستر، جاستار كامەرالىق حورى، حالىق اسپاپتار وركەسترى قۇرىلدى جانە الەم بويىنشا گاسترولدە ونەر كورسەتەدى.
"تۇركسوي" حالىقارالىق جاستار كامەرالىق وركەسترى تۇركسوي باس حاتشىسى دۇيسەن قاسەيىنوۆ مىرزانىڭ باستاماسىمەن 2010 جىلى قۇرىلدى. اتالعان مۋزىكالىق ۇجىمدى قۇرۋدىڭ ماقساتى – اتالعان ۇيىمعا كىرەتىن تۇركى الەمى مۋزىكانتتارىنىڭ بىرلەستىگى جانە تۇركى تىلدەس ەلدەر كومپوزيتورلارىنىڭ مۋزىكاسىن ناسيحاتتاۋ.
– بۇل وركەستر - مادەني قۇندىلىقتارىمىزعا نەگىزدەلگەن ماقساتتى جۇمىسىمىزدىڭ كوزگە كورىنگەن ناقتى ناتيجەسى. «تۇركسوي» جاستار كامەرالىق وركەسترىنىڭ ورتالىق ازياعا العاش رەت تۋرنەگە شىعىپ وتىر. وركەسترىمىز قۇرىلعان كۇننەن بۇل كۇنگە دەيىن الەمنىڭ تۇكپىر-تۇكپىرىندە كونسەرتتەر بەردى. الايدا ءوز ايماعىمىزدا وسىنداي ءىرى تۋرنە ۇيىمداستىرماپ ەدىك. بۇل تۋرنە - ءبىز ءۇشىن تۋعان ايماعىمىزداعى العاشقى تۋرىمىز بولادى، - دەدى حالىقارالىق تۇركى مادەنيەتى ۇيىمىنىڭ باس حاتشىسى دۇيسەن قاسەيىنوۆ.
وركەستر مۋزىكانتتارىنىڭ قۇرامىندا ءازىربايجان، قازاقستان، قىرعىزستان، تۇركمەنستان، تۇركيا، رەسەي فەدەراسياسىنان – باشقۇرتستان رەسپۋبليكاسى جانە تاتارستان رەسپۋبليكاسىنىڭ ازاماتتارى بار. ۇجىم رەپەرتۋارىندا - الەمدىك كلاسسيكانىڭ شىعارمالارى جانە تۇركى تىلدەس ەلدەر كومپوزيتورلارىنىڭ شىعارمالارى ورىندالدى.
حالىقارالىق «تۇركسوي» ۇيىمىنىڭ جۇزەگە اسىرعان كونسەرتتىك تۋرنەلەرىندە الەمدىك دەڭگەيدەگى ساحنا ساڭلاقتارىمەن بىرگە ونەر كورسەتىپ، تاجىريبە جيناعان جاس تالانتتار تىڭداۋشىلارىن تۇركى الەمى مۋزىكاسىنىڭ سيقىرلى سازىنا ساياحات جاساۋعا شاقىرادى.
جاستار كامەرالىق وركەسترى كوپتەگەن ەلدەردە مۋزىكا ونەرىنىڭ تابىنۋشىلارىن قۋانتاتىن تابىستى حالىقارالىق ۇجىم بولىپ تابىلادى.
پىكىر قالدىرۋ