مەملەكەت باسشىسى قاسىم-جومارت توقايەۆ كۇنى كەشە عانا حالىققا جاساعان العاشقى جولداۋىندا ءتىل ساياساتى تۋرالى تەرەڭ وي قوزعاعانى بەلگىلى. پرەزيدەنت انا ءتىلىمىزدى قۇرمەتتەي وتىرىپ، وزگە ءتىلدى دە ءبىلۋ بۇگىنىمىز بەن كەلەشەگىمىزدىڭ كەپىلى ەكەنىن اڭعارتتى. ال جامبىل وبلىسىندا ءۇش تۇعىرلى ءتىلساياساتى بايىردان جۇيەلى باعدارىن تاۋىپ كەلەدى دەپ جازادى Qamshy.kz اقپارات اگەنتتىگى. 

«تىلگە قۇرمەت – ەلگە قۇرمەت». ءتىل- ءار ۇلتتىڭ جانى، مىنەزى،پەيىلى، ونىڭ كوپ عاسىرلىق تاريحى. قازاقستان رەسپۋبليكاسىنىڭ مەملەكەتتىك ءتىلى–قازاق ءتىلى، مەملەكەتتىك ءتىل رەتىندە قازاق ءتىلىنىڭ جاۋاپكەرشىلىگى وراسان زور. حالىق تاۋەلسىزدىگىنىڭ ەڭ باستى بەلگىسى - ونىڭ انا ءتىلى، ۇلتتىق مادەنيەتى. ءوزىنىڭ انا ءتىلى، ۇلتتىق مادەنيەتى جوق ەل ءوز الدىنا مەملەكەت بولىپ ءومىر سۇرە المايدى. ءاربىر ادامعا انا سۇتىمەن بىرگە ەنىپ، قالىپتاساتىن قاسيەتتى ۇعىم – ءوز انا ءتىلىمىز. انا ءتىلىن سۇيگەن ادام – تۋعان جەرىن، ەلىن، وتانىن، اتامەكەنىن سۇيەدى دەگەن ءسوز. ال، بۇلاردىڭ ءبارى – ادام بالاسى ءۇشىن ەڭ قاسيەتتى ۇعىمدار. ءومىردىڭ الماستاي قىرىن، ابزال سىرىن تۇسىنە بىلۋىنە باستى سەبەپكەر – انا ءتىلى.

مەملەكەتتىڭ ۇستانعان ءتىل ساياساتى بۇگىندە ءوز جەمىسىن بەرىپ وتىر. كوپتەگەن ەتنومادەني بىرلەستىكتەر وكىلدەرى، اسىرەسە جاستاردىڭ مەملەكەتتىك ءتىلدى ۇيرەنۋگە دەگەن ىنتاسى مەن قۇرمەتى ارتىپ كەلەدى. مەملەكەتتىك ءتىل ءار ادامعا ءوزىنىڭ قايراتكەرلىك مۇمكىندىگىن كەڭەيتۋ ءۇشىن قوعام، مەملەكەت ىسىندە ءوزىن-وزى كورسەتە ءبىلۋ ءۇشىن ەل تاعدىرىندا ىقپالدى تۇلعاعا اينالۋى ءۇشىن كەرەك. جاڭا الەمدەگى جان-جاقتى دامىعان، باسەكەگە قابىلەتتى جاڭا قازاقستان تۇعىرى رۋحاني قۇندىلىقتارعا نەگىزدەلگەن، بۇل ءبىزدىڭ مەملەكەتىمىز ۇستانىپ وتىرعان ساياساتتىڭ باستى قاعيداسى.

ەلباسى ن.ءا.نازاربايەۆ «قازاقستاننىڭ بولاشاعى – قازاق تىلىندە» دەگەن تۇجىرىمدامانى ۇنەمى ايتىپ كەلەدى. قازاق ءتىلى ماسەلەسى مەملەكەتتىك دەڭگەيگە كوتەرىلگەن كەيىنگى جىلدارى بۇقارا جۇرتشىلىق تا انا ءتىلى ءۇشىن بەلسەندىلىك تانىتۋدا. وسى ورايدا، «رۋحاني جاڭعىرۋ» باعدارلاماسىنىڭ ءبىر تارماعى «قازاقتانۋ» بويىنشا جامبىل وبلىسى قازاقستان حالقى اسسامبلەياسى قوعامدىق بىرلەستىكتەرى مۇشەلەرى مەن ەتنومادەني بىرلەستىكتەرى وكىلدەرىنىڭ اراسىندا، سونىمەن بىرگە وبلىستىق «جاڭعىرۋ جولى» جاستار قوزعالىسى مەن «اق جەلكەن» جاستار ليگاسى جاستارىنىڭ قاتىسۋىمەن «تىلگە قۇرمەت – ەلگە قۇرمەت» اتتى ينتەرنەت-اكسيا وتكىزىلۋدە.

بۇل اكسيانىڭ كوپشىلىككە بەرەرى كوپ ەكەنى انىق. سەبەبى ەڭ ءبىرىنشى ءتىلدى قۇرمەتتەۋ بارشامىزدىڭ ازاماتتىق پارىزىمىز.