جامبىل وبلىسى ت. رىسقۇلوۆ اۋدانىنداعى جالپاقساز اۋىلىنىڭ ۇستازدارى مەن وقۋشىلارى ءبىلىم كۇنىن زاماناۋي ۇلگىدە سالىنعان جاڭا مەكتەپ عيماراتىندا وتكىزدى. مەكتەپتىڭ اشىلۋىنا اۋدان اكىمى ەربولات سادىرقۇلوۆ، اۋداندىق ءماسليحات حاتشىسى تۇرسىنحان جامانبايەۆ، وبلىستىق ءبىلىم باسقارماسىنىڭ باس مامانى جاننا قالىبايەۆا، اۋدان اكىمىنىڭ ورىنباسارى بەيسەنبەك الپەيىسوۆ، اۋداندىق ءبىلىم ءبولىمىنىڭ باسشىسى ەركىن سەيتجاپاروۆ،جەرلەس اقىن شىرىن ماماسەرىكوۆا جانە اۋىلدىق ارداگەرلەر كەڭەسىنىڭ ءتوراعاسى سەيدىمبەك شىلدەبايەۆتار ارنايى كەلىپ قاتىستى دەپ جازادى Qamshy.kz اقپارات اگەنتتىگى.
سالتاناتتى جيىن بارىسىندا شاقىرىلعان قوناقتار قۇتتىقتاۋ ءسوز سويلەپ، ىزگى تىلەكتەرىن ارنادى. العاشقى ءسوز اۋدان اكىمى ەربولات سادىرقۇلوۆقا بەرىلدى. «بۇگىن ەلىمىزدىڭ ءار تۇكپىرىندە سان مىڭداعان ءبۇلدىرشىن ءبىلىم كۇنىن قارسى الىپ، مەكتەپ تابالدىرىعىن اتتاۋدا. وسى ءساتتى ءتيىمدى پايدالانا وتىرىپ مەن بىلىمگە جانى قۇشتار وقۋشىلارىمىزدى ءتول مەرەكەلەرىمەنقۇتتىقتاعىم كەلەدى. وزدەرىڭىز بىلەتىندەي سوڭعى جىلدارى ەلىمىزدە ءبىلىم سالاسىنا ايتارلىقتاي كوڭىل بولىنۋدە. بۇگىن وقۋشىلارعا ەسىگىن ايقارا اشقان زاماناۋي مەكتەپتى پايدالانۋعا بەرىپ وتىرمىز. وسى مەكتەپتە ءبىلىم العان بالالارىمىز الداعى ۋاقىتتا تەك اۋدانىمىزدىڭ عانا ەمەس، وبلىسىمىزدىڭ، رەسپۋبليكامىزدىڭ دامۋىنا سۇبەلى ۇلەس قوساتىنىنا سەنىمدىمىن. جاڭا وقۋ جىلى ۇستازدار قاۋىمى ءۇشىن جەمىستى بولسىن» ەپ، عيماراتتىڭ قۇرىلىس جۇمىستارىن جۇرگىزگەن «قۇرىلىس تەد» جاۋاپكەرشىلىگى شەكتەۋلى سەرىكتەستىگىنىڭ ۇجىمىنا ءوز العىسىن ءبىلدىردى.
باقىتجان جاقسىلىقوۆ باسشىلىق ەتەتىن سەرىكتەستىك قىزمەتكەرلەرى 48 بالاعا ارنالعان مەكتەپتى ءوز مەرزىمىندە اياقتادى. جوبانىڭ جالپى قۇنى – 338 ملن. تەڭگەنى قۇرايدى. شارا بارىسىندا سەرىكتەستىك باسشىسى دا ءسوز سويلەپ، مەكتەپ مەڭگەرۋشىسى گۇلزينا ساتىلعانوۆاعا عيماراتتىڭ سيمۆوليكالىق كىلتىن تابىس ەتتى. ال، مەكتەپتىڭ لەنتاسىن اۋدان اكىمى ەربولات سادىرقۇلوۆ پەن جەرلەس اقىن شىرىن ماماسەرىكوۆا جانە اۋىلدىق ارداگەرلەر كەڭەسىنىڭ ءتوراعاسى سەيدىمبەك شىلدەبايەۆ قيدى. سودان سوڭ كوپتەن كۇتكەن كۇمىس قوڭىراۋ سوعىلىپ، سالتاناتتى شاراعا قاتىسۋشىلار ساۋلەتى كەلىسكەن عيماراتتى ارالاپ كوردى.
جالپاقسازدىق بالالار وسى كۇنگە دەيىن اپاتتى جاعدايدا تۇرعان، نەبارى ءتورت بولمەدەن قۇرالعان شاعىن مەكتەپتە وقىپ كەلگەن. ال، جاڭا وقۋ جىلىنان باستاپ ولار ءسان-سالتاناتى كەلىسكەن جاڭا نىساننىڭ قابىرعاسىندا ساپالى ءبىلىم الاتىن بولادى. ايتا كەتەيىك، جاڭا عيماراتتا وقۋشىلار مەن ۇستازدارعا بارلىق جاعداي جاسالعان. وندا كيىم ىلەتىن ارنايى ورىن، وقۋ زالى بار كىتاپحانا، وقۋ بولمەلەرى، ينتەراكتيۆتى تاقتاسى بار كابينەت، اسحانا، سپورت
زال جانە بارلىق تالاپقا ساي جابدىقتالعان كومپيۋتەرلىك سىنىپ بار. سونىمەن قاتار، سان ءتۇرلى ادىستەمەلىك قۇرالدارمەن قامتاماسىز ەتىلگەن مۇعالىمدەر بولمەسى دە كوپشىلىكتىڭ كوڭىلىنەن شىقتى. مەكتەپ قابىرعاسىندا مەديسينالىق ستاندارتتارعا ساي مەدبيكە بولمەسى دە بار. مەكتەپ سىرتىندا ويىن الاڭدارى مەن كەلۋشىلەرگە ارنالعان اۆتوتۇراق ورنالاسقان.
«جاڭا مەكتەپ عيماراتىندا ءبىلىم الامىز» دەگەن ۇلكەن قۋانىشتى ءبىلىم ورداسىنىڭ تابالدىرىعىن العاش رەت اتتاعان وقۋشىلاردىڭ جانارىنان بايقاۋعا بولادى. جاڭا مەكتەپ پارتاسىنا وتىرعان ولار جيىن سوڭىندا «سانالى – ۇرپاق جارقىن بولاشاق!» تاقىرىبىندا وتكەن العاشقى تاربيە ساباعىنا قاتىسىپ، ۇلاعاتتى ۇستازدارىمەن قاۋىشتى.
