جامبىل وبلىسىندا «بولاشاققا باعدار: رۋحاني جاڭعىرۋ» باعدارلاماسى اياسىندا قولعا الىنعان «قازاقستاننىڭ كيەلى جەرلەرى» جوباسىنىڭ وڭىرلىك بالاماسىنا نەگىزىنەن ەل تاعدىرى ءۇشىن ايانباي ەڭبەك ەتىپ، ۇرپاق جادىندا قالعان تاريحي تۇلعالاردىڭ كەسەنەلەرى كىرگىزىلگەن. سونىڭ ءبىرى مويىنقۇم اۋدانىنداعى حانتاۋى اۋىلى ماڭىنداعى بينازار باتىردىڭ بەيىتى، دەپ جازادى Qamshy.kz اقپارات اگەنتتىگى. 

قوقان حاندىعىنا قارسى كۇرەستە باتىرلىعىمەن كوزگە تۇسكەن بينازار اقەدىل ۇلى تۇلكىباس وڭىرىنەن شۋ القابىنا كوشىپ بارىپ، ەگىنشىلىكتى دامىتۋ ارقىلى وتىرىقشىلىق شارۋاشىلىقپەن اينالىسقان. باتىردىڭ ەگىستىس القاپتارىنا سۋ جەتكىزگەن جۇيەلەرى بينازار كانالى كۇنى بۇگىنگە دەيىن پايدالانىلىپ كەلەدى. ال ونىڭ باتىرلىعى ارقادان ىعىسا كوشكەن كەنەسارى حاننىڭ يىعىنان سۇيەپ، قولداۋ بىلدىرۋىمەن تىعىز بايلانىستى. باتىر ءوز رۋىنىڭ قارۋلى جىگىتتەرى حان اسكەرىنە قوسقان. سونداي-اق كەنەسارى اسكەرىن ازىق-تۇلىكپەن قامتاماسىز ەتىپ وتىرعان. ءوز كەزەگىندە بينازار باتىر اعىباي، سىپاتاي باتىرلارمەن وتە جاقىن قارىم-قاتىناستا بولعان.

ەل اراسىندا بينازار باتىردىڭ ەرەن ەرلىگىن دارىپتەيتىن اڭىزدىڭ بىرىندە بولتىرىك شەشەن ەكەۋىنىڭ جولعا قاتار شىعۋى ءسوز بولادى. جول بويىندا بەل سۋىتىپ وتىرعان ەكى باتىرعا جەتى بىردەي اتتىلى جىگىتتەر تاراپ باسا سالادى. اياق قولدارىن بايلاپ، كوزدەرى تاڭۋلى بولتىرىك پەن بينازاردى الگى جىگىتتەر ەرمەك ەتۋگە كوشەدى. «ءبىزدىڭ كوڭىلىمىزدى كوتەرىپ، ولەڭ ايتىڭدار» – دەپ قينايدى الگىلەر. سوندا بولتىرىك: «سەندەر بولساڭدار قارۋ-جاراقتى جەتەۋسىڭدەر، ال ءبىز قارۋسىز ەكەۋمىز، ەكى شالدى بايلاپ قويىپ، ولەڭ ايت دەۋگە – نامىستانبادىڭدار ما؟ بىزدەن نەسىنە قورقاسىڭدار، قولدى بوساتىڭدار، ولەڭدى سودان كەيىن ايتايىق»، – دەيدى. «راسىمەن دە، بۇل ەكەۋىنەن نە ءۇشىن قورقامىز؟» – دەپ ەكەۋىنىڭ قولىن بوساتادى. ىلە-شالا ولەڭدەتە ءجۇرىپ بينازار باتىر وزىنە قارسى وتىرعان ءتورت جىگىتتى الىپ ۇرادى. ءوز كەزەگىندە بولتىرىك شەشەن دە ءۇش جىگىتتى استىنا باسادى.

ەل اراسىندا يگى اتى قالعان بينازاردىڭ جەرلەنگەن ورنىنا باتىردىڭ 190 جىلدىعى قارساڭىندا كەسەنە تۇرعىزىلدى. دەمەۋشىلەردىڭ ىقپالىمەن كەسەنە ماڭىنا ءتاۋ ەتە كەلۋشىلەرگە ارنالعان قوناق ءۇي دە سالىنعان. بۇل كەسەنەدە 2 جىل بۇرىن «بولاشاققا باعدار: رۋحاني جاڭعىرۋ» باعدارلاماسى اياسىندا «قازاقستاننىڭ كيەلى جەرلەرىنىڭ گەوگرافياسى» جوباسى بويىنشا قازاقستاننىڭ وڭىرلىك قاسيەتتى نىساندار تىزىمىنە ەنگىزىلدى.