ەلباسىنىڭ «ۇلى دالانىڭ جەتى قىرى» اتتى باعدارلامالىق ماقالاسىندا «قازاقستان –الما مەن قىزعالداقتىڭ وتانى» دەپ اتالاتىن تاراۋ بار. مۇندا ەلىمىزدىڭ تابيعي، گەوگرافيالىق ەرەكشەلىكتەرىنە بايلانىستى الما مەن قىزعالداقتىڭ بىرنەشە ءتۇرىنىڭ ءوسىپ، الەمنىڭ تۇپكىر-تۇپكىرىنە تارالىپ وتىرعانى ايتىلادى. سايكەسىنشە جامبىل وبلىسىنىڭ اگرارلىق الەۋەتىندە الما شارۋاشىلىعىنىڭ الاتىن ورنى ەرەكشە، دەپ جازادى Qamshy.kz اقپارات اگەنتتىگى. 

جامبىل وبلىسىنداعى مەركى اۋدانىنداعى «مەركى تاجىريبە شارۋاشىلىعى» جاۋاپكەرشىلىگى شەكتەۋلى سەرىكتەستىگى الما ءوسىرىپ، ودان مول ءونىم الىپ وتىرعان بىردەن ءبىر اگروقۇرىلىم سانالادى. سەرىكتەستىكتە دايىن الما جەمىسىنەن بولەك ونىڭ كوشەتى دە وبلىستىڭ بارلىق اۋداندارىنا ساتىلادى. وسىلايشا ءبىر عانا تاجىريبە شارۋاشىلىعى نەگىزىندە وبلىس ديقاندارى الما جەمىسىنىڭ ەكونوميكالىق تۇرعىدان تيىمدىلىگى مەن دەنساۋلىققا پايدالىلىعىن ەسكەرىپ ونى كوپتەپ وسىرۋگە كوڭىل بولۋدە. ءتىپتى تابيعاتى ءشول جانە شولەيتتى ايماققا جاتاتىن مويىنقۇم اۋدانىندا الما شارۋاشىلىعىندا ىلگەرىلەۋشىلىك بايقالادى. ءبىر كەزدەرى اۋداندا «جاسۇلان» كەڭشارى 200 گەكتار جەرگە الما باعىن ورناتىپ، ودان مول ءونىم العان. ءتىپتى مويىنقۇمنىڭ الماسى جامبىل وڭىرىنەن بولەك ەلىمىزدىڭ سولتۇستىك وڭىرلەرىندە ۇلكەن سۇرانىسقا يە بولعانى بار. سونداي-اق كەڭەس وداعى تۇسىنداعى اۋدانداعى ايدارلى، مويىنقۇم، جازىلبەك قۋانىشبايەۆ اتىنداعى كەڭشارلار دا الما باعى بولعان ەكەن. الايدا تاۋەلسىزدىكتىڭ العاشقى جىلدارىندا تىستەگەننىڭ اۋزىندا، ۇستاعاننىڭ قولىندا جەتكەن گيدروقۇرلىم جۇيەلەرى بۇل باقتاردا سۋ تاپشىلىعىنىڭ ورىن الۋىنا ىقپال ەتتى. ءقازىر اۋدان اكىمى مادەن مۇسايەۆتىڭ باسشىلىعىمەن وڭىردەگى كانالداردىڭ الەۋەتىن تولىق پايدالانۋ ماسەلەسى كۇن تارتىبىنە قويىلدى. سونىڭ ەسەبىنەن اۋداندا سۋارمالى ەگىستىك كولەمىن ارتتىرۋ ءۇشىن ەگىنگە سۋدى ۋاقىتتىلا بەرۋ جۇمىستارىنىڭ بويىنا قان جۇگىردى. اۋدان بەلسەندىلەرى ەندى مويىنقۇمدا الما باقتارىنىڭ كولەمىن كوبەيتۋ قاجەتتىگى تۋرالى باستاما كوتەرىپ ءجۇر. سوندا ءبىر كەزدەرى كۇللى رەسپۋبليكانى «جاسۇلاننىڭ الماسى-اي» دەگىزگەن الما شارۋاشىلىعىنداعى مويىنقۇمنىڭ داڭقى قايتا كوككە ورلەمەك.

بۇگىندە جامبىل وبلىسىنىڭ جامبىل، بايزاق، مەركى اۋداندارىندا الما باقتارىنىڭ ونىمدەرى جەرگىلىكتى تۇرعىندار سۇرانىسىن وتەپ كەلەدى. سونداي-اق الما شارۋاشىلىعىن ۇدەمەلى ب ا ق تەحنولوگياسى ەنگەلى دە بۇل ىستە ىلگەرىلەۋشىلىك بايقالدى. ەندىگى جەردە وبلىستىڭ الما شارۋاشىلىعىنداعى اتىن شىعارۋعا مويىنقۇم اۋدانى ۇلەس قوسۋدان ءۇمىتتى.