ەلباسى-تۇڭعىش پرەزيدەنتتىڭ «ۇلى دالانىڭ جەتى قىرى» اتتى باعدارلامالىق ماقالاسىندا اتقا ءمىنۋ مادەنيەتى جايىندا كەڭىنەن ءسوز قوزعاپ، بۇل ءۇردىستى الەمدىك وركەنيەتكە ەنگىزۋدەگى قازاق حالقىنىڭ تاريحي رولىنە ايرىقشا توقتالعانى ءمالىم. وسى ورايدا، جامبىل وبلىسىندا جۇمىس جاسايتىن «اۋليە-اتا» كاسىپقوي كلۋبىنىڭ جەتىستىكتەرى ات سپورتىندا جامبىلدىقتاردىڭ الدىنا قارا قالمايتىنىن ايعاقتايدى، دەپ جازادى Qamshy.kz اقپارات اگەنتتىگى. 

«ەلىمىزدىڭ سولتۇستىك وڭىرىندەگى ەنەوليت داۋىرىنە تيەسىلى «بوتاي» قونىسىندا جۇرگىزىلگەن قازبا جۇمىستارى جىلقىنىڭ تۇڭعىش رەت قازىرگى قازاقستان اۋماعىندا قولعا ۇيرەتىلگەنىن دالەلدى... ات ۇستىندە جۇرگەن كوشپەندىلەر بيىك ەر-تۇرمان مەن ۇزەڭگىنى ويلاپ تاپتى...بابالارىمىز شاپقان اتتىڭ ۇستىندە ساداق تارتۋدى بارىنشا جەتىلدىردى. سوعان بايلانىستى قارۋدىڭ قۇرىلىمى دا وزگەرىپ، كۇردەلى ىڭعايلى ءارى قۋاتتى بولا ءتۇستى. ماساعىنا قاۋىرسىن تاعىلىپ، مەتالمەن ۇشتالعان جەبە بەرەن ساۋىتتى تەسىپ وتەتىن جەبەبۇزارعا اينالدى» دەيدى ەلباسى-تۇڭعىش پرەزيدەنتىنىڭ ماقالاسىندا.

راسىندا قازاق حالقىنىڭ تاۋەلسىزدىك جولىنداعى سان عاسىرلىق كۇرەسكەرلىك عۇمىرى اتتىڭ ۇستىندە وتكەنى بەلگىلى. كەيىننەن كوشپەندى تۇرمىستى قولايلى كورگەن حالىق ءۇشىن دە جىلقى مالىنىڭ ءمىنىس كولىك رەتىندە ءرولى ايرىقشا بولدى. سونىڭ ەسەبىنەن قازاق بالاسى اتتىڭ قۇلاعىندا ويناپ، كوكپار، بايگە سپورتتارىنىڭ بەل ورتاسىندا ءجۇرىپ ەسەيدى.

–وتكەن جىلى كوكپاردا وتكەن ازيا چەمپيوناتىندا، 2017 جىلعى الەم چەمپيوناتىندا ەلىمىزدىڭ ۇلتتىق قۇراماسىنىڭ ساپىن تولىقتىرعان 4 اۋليەاتالىق شاباندوز جەڭىس تۇعىرىنان كورىندى. ابزال تۇرلىبەكوۆ، ەلدوس باداشيەۆ سىندى جامبىلدىق سپورتشىلار ات ۇستىندە ساداق اتۋ سپورتىنان وڭتۇستىك كورەيادا وتكەن الەم چەمپيوناتىنان ۇزدىك شىقتى. ەندىگى ويىمىز جاستار اراسىندا كوكپاردان وتەتىن ازيا چەمپيوناتىندا، ەرەسەكتەر اراسىنداعى الەم چەمپيوناتىندا ولجا سالۋ. وسى جەتىستىكتەرىمىزدىڭ ءوزى وڭىردەگى ۇلتتىق ات سپورتىنىڭ الەمدىك ارەنادا وزىندىك مارتەبەلى ورىنعا يە ەكەندىگىن كورسەتەدى،–دەيدى «اۋليە-اتا» كاسىپقوي كلۋبى» مەملەكەتتىك مەكەمەسى ديرەكتورىنىڭ ورىنباسارى تولەگەن جۇماتايەۆ.

سارى قۇرلىق پەن الەم بىرىنشىلىگىنەن بولەك «اۋليە-اتا» كاسىپقوي كلۋبىنىڭ» مۇشەلەرى ات سپورتىنىڭ كوكپار، تەڭگە ءىلۋ، اۋدارىسپاق سىندى تۇرلەرىندە كاسىبي دەڭگەيدە مەڭگەرگەن. كلۋب جەتەكشىسىنىڭ ورىنباسارى مۇنى وڭىردەگى ات باپتاۋشىلار سانىنىڭ ارتقاندىعىمەن بايلانىستىردى.