جامبىل وبلىسىنىڭ بايزاق اۋدانىندا ەكى كادەت سىنىبى جۇمىس جاسايدى. ءقازىردىڭ وزىندە مۇنداعى ءار سىنىپتا 20-25 بالا ءتالىم الۋدا، دەپ جازادى Qamshy.kz اقپارات اگەنتتىگى.
ەلباسى-تۇڭعىش پرەزيدەنت نۇرسۇلتان نازاربايەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا ۇرپاقتى ساناسىندا پاتريوتيزم ۇعىمىن قالىپتاستىرۋعا ايرىقشا توقتالعان. ءدال وسى ماقساتتا ىشكى ىستەر مينيسترلىگىمەن وڭىرلەردە كادەتتەر سىنىبىن اشۋ جۇمىستارى جۇرگىزىلىپ جاتىر. كادەتتەر سىنىبىن اشۋداعى باستى ماقسات مەكتەپ وقۋشىلارى اراسىندا قۇقىق قورعاۋ قىزمەتىنىڭ بەدەلىن ارتتىرا وتىرىپ، ولارعا اسكەري-پاتريوتتىق تاربيە بەرۋ بولىپ تابىلدى. مۇنداعى تاربيەلەنۋشىلەر دەنە شىنىقتىرۋ، العاشقى اسكەري دايىندىق، جولدا ءجۇرۋ ەرەجەسى سىندى پاندەر بويىنشا تەرەڭدەتىلگەن ءبىلىم بەرىلەدى.
ال جامبىل وبلىسىندا بۇل قاناتقاقتى جوبانى وبلىس اكىمىدىگىنىڭ ءبىلىم باسقارماسى مەن پوليسيا دەپارتامەنتى بىرلەسە قولعا العان. اتالعان جوبا اياسىندا وڭىردە العاشقىلاردىڭ ءبىرى بولىپ ەكى كادەت سىنىبى بايزاق اۋدانىنىڭ ورتالىعى سارىكەمەر اۋىلىندا اشىلدى.
–كادەتتەر سىنىبىنا ۇلدار دا، قىزدار دا قابىلدانا بەرەدى. ياعني تاربيەلەنۋشىلەردى ىرىكتەۋدە ەشقانداي شەكتەۋ جوق. ولار بۇل سىنىپتاردا مەكتەپتى ءتامامداعانعا دەيىن اسكەري-قۇقىقتىق تاربيە الاتىن بولادى. بۇل سىنىپتاردىڭ ساپىن تولىقتىرۋعا نيەتتى وقۋشىلاردىڭ قاتارى قالىڭ. كادەت سىنىبى اشىلعان العاشقى كۇننەن مۇندا 20-25 تاربيەلەنۋشى كەلدى. تاربيەلەنۋشىلەرگە قۇقىق قورعاۋ ورگاندارىنىڭ اتقارار قىزمەتى تەرەڭدەتىلە وقىتىلادى. سوندىقتان مۇندا تالاپ پەن ءتارتىپتىڭ قاتاڭ بولۋى زاڭدىلىق،– دەيدى بايزاق اۋداندىق پوليسيا ءبولىمى باستىعىنىڭ كادر ماسەلەلەرى جونىندەگى ورىنباسارى، پوليسيا مايورى عالىمجان ورازبەكوۆ.
كادەت سىنىبىنداعى تاربيەلەنۋشىلەر ءدارىس كەزىندە ءبىرىڭعاي اسكەري فورما كيەدى. سونداي-اق ولار ءتيىستى قىزمەت وكىلدەرىمەن بىرگە قوعام تىنىشتىعىن كۇزەتۋ ىسىنە دە تارتىلماق.
ايتا كەتۋ كەرەك كادەت سىنىپتارىنىڭ تاربيەلەنۋشىلەرى ءوز بولاشاعىن قۇقىق قورعاۋ ورگاندارىمەن دە بايلانىستىرا الادى. ءارى ولارعا مۇندا ەلىمىزدەگى ارناۋلى جوعارى وقۋ ورىندارىنىڭ ماماندىقتار تىزبەسى مەن ءتۇسۋ تالاپتارى تانىستىرىلادى. وبلىس اۋماعىندا ەلباسى-تۇڭعىش پرەزيدەنتتىڭ جولداۋىندا ايتىلعان جاستار اراسىندا ءپاتريوتيزمدى ناسيحاتتاۋ شارالارى بەلسەندى قولعا الىنعان. ماسەلەن وڭىردە مەكتەپ وقۋشىلارى «جاس سارباز» قوزعالىسىنىڭ جۇمىسىنا كوپتەپ تارتىلىپ جاتىر.
پىكىر قالدىرۋ