ەل تاۋەلسىزدىگى جاريالانعاننان بەرى جامبىل وبلىسى اۋماعىندا 146 ەلدى مەكەننىڭ، 1924 كوشەنىڭ، 172 نىسانىڭ اتاۋى قايتا جاڭعىرتىلعان. رەسمي مالىمەتتەر تەك 1992 جىلى وبلىس اۋماعىندا 131 ويكونيم ورىس تىلىندە بولعانىن راستايدى، دەپ جازادى Qamshy.kz اقپارات اگەنتتىگى. 

تەك وتكەن جىلدىڭ وزىندە جامبىل وبلىسى اكىمدىگى جانىنداعى ونوماستيكالىق كوميسسياسىندا ەلدى مەكەندەر مەن ولاردىڭ قۇرامداس بولىكتەرىنىڭ اتاۋىن وزگەرتۋ تۋرالى 291 ۇسىنىس قارالعان ەكەن. ونىڭ ىشىندە 1 ۇسىنىس اۋىلدىق وكرۋگتىڭ اتاۋىن قايتا اتاۋعا قاتىستى بولسا 4 ۇسىنىستا ەلدى مەكەن اتاۋىن وزگەرتۋ جايى ايتىلعان. ناتيجەسىندە وبلىس اكىمدىگىنىڭ قاۋلىسى جانە وبلىستىق ءماسليحات شەشىمىمەن 1شاعىن اۋدان، 25 كوشە مەن قايتا اتاۋدى قاجەت ەتكەن 200 كوشەنىڭ اتاۋى وزگەرتىلگەن.

ال 2018 جىلدىڭ 9 تامىزىندا رەسپۋبليكالىق ونوماستيكالىق كوميسسيانىڭ وڭ قورىتىندىسى نەگىزىندە جامبىل وبلىستىق فيلارمونياسىنا كەنەن ازىربايەۆتىڭ، تاراز قالالىق مادەنيەت ۇيىنە ىقىلاس دۇكەن ۇلىنىڭ، تاراز قالاسىنداعى №10 مەكتەپكە ساعادات نۇرماعانبەتوۆتىڭ ەسىمىن بەرۋ تۋرالى قازاقستان رەسپۋبليكاسى ۇكىمەتىنىڭ قاۋلىسى شىقتى.

–تاۋەلسىزدىكتىڭ العاشقى جىلدارىنان وبلىس جالپى رەسپۋبليكانىڭ ومىرىندەگى ءتۇرلى سالالارعا تىڭنان تۇرەن سالعان ءتۇرلى جاڭالىقتار ورىن الدى. اسىرەسە ەلدىڭ رۋحاني ءومىرى كەمەلدەنە ءتۇستى. بۇرىن قىلىشىنان قان تامعان كەڭەستىكتىك جۇيەنىڭ تۇلعالارىنا، پارتيا بەلسەندىلەرىنە بەرىلىپ كەتكەن ەلدى مەكەندەردىڭ، كوشەلەردىڭ مەكەمەلەردىڭ اتتارى قازاقشالاندى. قۇر قازاقشالانىپ قانا قويعان قازاق حالقىنىڭ وتارلاۋشى يمپەريا باسىپ-جانشىپ وشىرمەكشى بولعان ساناسىنا سىڭگەن تاريحي اتاۋلار، تاريحي تۇلعالاردىڭ اتى قايتا ورالدى. ءبىر عانا جامبىل وبلىسىندا بۇل باعىتتا كوپتەگەن شارۋا اتقارىلعانى ءمالىم. ماسەلەن جامبىل اتانعان وبلىس ورتالىعى تاراز دەپ اتالاتىن تاريحي اتاۋىنا قول جەتكىزدى. قالاداعى كوشە اتاۋلارىنا تولە، قازىبەك، ايتەكە بيلەردىڭ اتتارى بەرىلدى. اۋىلدار مەن ەلدى مەكەندەرگە، كوشەلەرگە توپونيميكالىق اتاۋلارى قايتا ورالىپ، تۇتاس حالىقتىڭ رۋحاني يگىلىنە اينالدى. ءارى بۇل جۇمىستار ەلباسى-تۇڭعىش پرەزيدەنتتىڭ «رۋحاني جاڭعىرۋ» باعدارلاماسىمەن دە ۇندەسەدى ،– دەيدى فيلولوگ-عالىم ز.قۇلامانوۆا.

ايتا كەتۋ كەرەك ەلىمىزدە 2013 جىلى «ونوماستيكا تۋرالى» زاڭ قابىلدانىپ وندا توپونوميكالىق اتاۋلاردىڭ بەرۋدىڭ بارلىق زاڭدىلىقتارى انىق جازىلدى. سونداي-اق ەلدى مەكەندەردى، كوشەلەردى تاريحي تۇلعالاردىڭ اتىمەن اتاۋ، تاريحي اتاۋىن قايتارۋدىڭ دا تالاپتارى كورسەتىلدى.