جامبىل وبلىسىنىڭ جامبىل اۋدانىنداعى ۇيىرمە بالالاردى قۇراق كورپە تىگۋگە باۋلۋدا. «اينالايىن» دەپ اتالاتىن ونەر ورتالىعىندا بۇگىندە 200-دەن استام بالا حورەوگرافيا، اعىلشىن ءتىلى، ەرىكتىلەر كلۋبى، تەاتر، قورشاعان ورتا، كەستەلەۋ، ديزاين، بالالار كىتاپحاناسى،فوتوكلۋب باعىتىنداعى جۇمىس جاسايتىن ۇيىرمەلەرگە بەلسەنە تارتىلعان، دەپ جازادى Qamshy.kz اقپارات اگەنتتىگى. 

ەلباسىنىڭ «ۇلى دالانىڭ جەتى قىرى» باعدارلامالىق ماقالاسىندا قازاق حالقىنىڭ ەرتەدەن وركەنيەتتىڭ وزىق ۇلگىسىمەن ەتەنە تانىس بولعاندىعى ايتىلادى. ءارى ونى كوشپەندىلەر ومىرىندە وڭتايلى پايدالانۋدىڭ ءادىسىن جەتىلدىرگەن دە قازاقتار ەكەنى امبەگە ايان. ءبىر عانا كيىز باسۋ، كيىز ءۇي تىگۋ كوشپەندىلەر ءومىرىنىڭ اجىراماس بولىگى سانالادى. ءارى بۇل ادىسپەن تىگىلگەن ۇيلەردىڭ ءتۇرلى تەحنوگەندىك اپاتتارعا ءتوزىمدى ەكەنىن دە ۋاقىت وتە دالەلدەندى. سوندىقتان دا وسى ءبىر يگى ءداستۇردى ۇرپاق ساناسىندا جاڭعىرتۋدىڭ بەرەرى مول بولماق. بۇل جۇمىسقا 2004 جىلى جامبىل وبلىسىنىڭ جامبىل اۋدانىندا ايگۇل رازاقوۆانىڭ باستاماسىمەن قۇرىلعان «اينالايىن» بالالار مەن جاسوسپىرىمدەر ورتالىعى اۋقىمدى جۇمىس اتقارىپ كەلەدى. ءقازىر بۇل ورتالىقتا بالاردىڭ قارىم-قابىلەتىنە قاراي 9 ءتۇرلى ۇيىرمە جۇمىس جاساۋدا. جاز ايلارىندا ورتالىق جانىنا شاعىن لاگەر قۇرىلادى. ورتالىق تا كيىز ءۇي جاساۋ، قىز جاساۋىن ازىرلەۋ، بالالارعا ارنالعان ۇلتتىق ناقىشتاعى اشەكەيلەردى تىگىلەدى. مىنە وسى جۇمىسقا بەلسەنە ات سالىساتىن جامبىلدىق ورەندەر كورپە-جاستىقتار، ىدىستار مەن دوربالار،قورجىنداردى ءوز قولىمەن ازىرلەيدى. ورتالىق جەتەكشىسى ايگۇل رازاقوۆا بۇل باستامانىڭ بالالاردىڭ ۇلتتىق قۇندىلىقتاردى تانىپ بىلۋدەگى ءرولىنىڭ ەرەكشە ەكەنىن ايتادى.

–ۇلتتىق ناقىشتاعى كورپە-جاستىقتاردى، كادەسىيلاردى تىگۋ جۇمىستارىنا قاتىسۋ بالالاردىڭ قولونەرگە قۇشتارلىعىن ارتتىرادى. ودان سوڭ وسى تەحنولوگيالار ارقىلى ولار اتا-بابامىزدىڭ سان عاسىر تۇرمىس-تىرشىلىگىمەن ەتەنە تانىسىپ، ءسالت-داستۇر، ادەپ-عۇرىپقا جاقىن بولادى. ورتالىقتا بالالاردىڭ قولىمەن ازىرلەنگەن بۇيىمدار شەتەلدىك تۋريستەر مەن جەرگىلىكتى تۇرعىندار اراسىندا سۇرانىسقا يە. بۇيىمداردى ساتۋدان تۇسكەن پايدا قايىرىمدىلىق اكسيالار مەن اقىسىز ۇيىرمەلەردى ۇيىمداستىرۋعا جۇمسالادى. ءقازىردىڭ وزىندە ءبىزدىڭ بالالاردىڭ قولىنان شىققان بۇيىمدار وڭىردەگى قىمىزحانالاردىڭ اجارىن اشىپ تۇر،–دەيدى ا.رازاقوۆا.