اعىمداعى جىلى قۇرىلعانىنا 80 جىل بولاتىن جامبىل وبلىسىنىڭ مەرەيتويىنا ءتۇرلى تارتۋلار جاسالۋدا. ءوڭىردىڭ قۇرىلعان كۇنىنە وراي ەستە قالارلىق تارتۋ جاساۋشىلاردىڭ قاتارىندا قاراپايىم وبلىس تۇرعىندارى دا بار.تاراز قالاسىنىڭ تۇرعىنى جاقسىلىق مامىربەك ۇلى وبلىس مەرەيتويىنا وراي 80 شاقىرىمدىق مارافونمەن جۇگىرىپ وتۋگە نيەت تانىتىپ وتىر، دەپ جازادى Qamshy.kz اقپارات اگەنتتىگى.
مەرەيتوي قۇرمەتىنە ارنالعان مارافوندى جاقسىلىق مامىربەك ۇلى ءوزى تۋىپ وسكەن تالاس اۋدانىنداعى تامدى اۋىلىنان باستاۋدى ءجون دەپ تاپقان. وسىلايشا مەرەيتوي قارساڭىندا مارافونشى تامدىدان تارازعا دەيىنگى جولدى جاياۋ جۇگىرىپ وتپەك. مارافونشىنىڭ ايتۋىنشا ونىڭ بۇل باستاماسىنا وبلىس اكىمىندىگىنىڭ دەنە شىنىقتىرۋ جانە سپورت باسقارماسى قولداۋ بىلدىرمەك.
ايتا كەتۋ كەرەك جاقسىلىق مامىربەك ۇلىنىڭ بۇعان دەيىن ەل ومىرىندەگى ايتۋلى داتالارعا وراي مارافون جۇگىرىسىنا قاتىسىپ كەلەدى. 65 جاستاعى مارافونشى نۇر-سۇلتان قالاسىندا ەكسپو-2017 حالىقارالىق مامانداندىرىلعان كورمەسىندە مارافونعا 4 نەمەرەسىمەن قاتىسىپ وزگەگە ۇلگى بولارلىق ءىس جاساعان ەدى.
–مەن مۇنداي مارافوندارعا تۇراقتى قاتىسىپ تۇرامىن. الماتى قالاسىندا وتكەن 7 مارافوندا جارىس جولىنان تابىلدىم. ونىڭ ۇشەۋىندە نەمەرەلەرىممەن بىرگە جۇگىردىم. جالپى جاياۋ ءجۇرۋدىڭ، جۇگىرۋدىڭ ادام دەنساۋلىعىنا پايداسى ۇشان تەڭىز. مەن زەينەتكەرلىككە شىققالى جۇگىرۋمەن شۇعىلدانىپ كەلەمىن. العاشىندا 10-15 شاقىرىمدى جۇگىرىپ وتەتىنمىن. ءقازىر 25 شاقىرىمعا دەيىن جۇگىرە الامىن،– دەيدى زەينەت جاسىنداعى مارافونشى.
جالپى وبلىستاعى ەلەۋلى وقيعالار قارساڭىندا جەكە ادامداردىڭ باستاماسىمەن مارافوندار ۇيىمداستىرۋ بۇرىننان تاجىريبەدە بار. تاراز قالاسىنىڭ 2000 جىلدىق مەرەيتويىندا سارىسۋ اۋدانى، جاڭاتاس قالاسىنىڭ تۇرعىنى تۇرار مىسىقبايەۆتىڭ كەنشىلەر قالاسىمەن تاراز قالاسىنداعى 170 شاقىرىم جولدى جۇگىرىپ وتكەنى ءالى ەستە. ءوز كەزەگىندە سارىسۋلىق ءتىس دارىگەرىنىڭ بۇل باستاماسىن كوپشىلىك سالاۋاتتى ءومىر سالتىن ناسيحاتتاۋدىڭ وزىق ۇلگىسى رەتىندە قابىلداعان. سول سەكىلدى وبلىستىڭ 80 جىلدىق مەرەيتويىندا 80 شاقىرىم جولدى جۇگىرىپ ءوتۋدى ءجون كورگەن جاقسىلىق مامىربەك ۇلىنىڭ ارەكەتى دە جاس ۇرپاققا ساناسىنا سپورتتىڭ دەنساۋلىققا پايدالى ەكەندىگىن سىڭىرۋدەگى ناتيجەلى قادامعا اينالارى داۋسىز.
پىكىر قالدىرۋ