جامبىل وبلىسىندا ەلباسى-تۇڭعىش پرەزيدەنتتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان تۋىنداعان «قازاقستاننىڭ قاسيەتتى جەرلەرى كارتاسى» جوباسىن ناسيحاتتاۋ جۇمىستار كەڭ كولەمدە قولعا الىنعان. وڭىردە باعدارلامانىڭ «قاسيەتتى قازاقستان» بازالىق باعىتىمەن تانىسۋعا مۇمكىندىك بەرەتىن qasiettitaraz.kz ۆەب-پورتالى ىسكە قوسىلعان، دەپ جازادى Qamshy.kz اقپارات اگەنتتىگى.
«بولاشاققا باعدار: رۋحاني جاڭعىرۋ» باعدارلامالىق ماقالاسىنان تۋىنداعان مىندەتتەردى جۇزەگە اسىرۋ ماقساتىندا قولعا الىنعان «قازاقستاننىڭ قاسيەتتى جەرلەرى كارتاسى» جوباسىنا جامبىل وبلىسىنان 8 تاريحي-مادەني، ارحەولوگيالىق ەسكەرتكىش ەنگىزىلگەن. ەندىگى كەزەكتە جامبىلدىقتار مەن ءوڭىر تۇرعىندار اتالعان ورىنداردىڭ تاريحى جايىنداعى دەرەكتەرمەن ونلاين رەجيمدە تانىسۋ مۇمكىندىگىنە يە. جامبىل وبلىسى اكىمدىگىنىڭ مادەنيەت، ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىبايەۆ وڭىردەگى قاسيەتتى ورىنداردىڭ ونلاين پلاتفورماسىن جاساۋ باستاماسىنىڭ حالىققا بەرەرى كوپ ەكەندىگىن تىلگە تيەك ەتەدى.
–بۇنداي باستامالاردىڭ حالىققا بەرەرى مول. بۇرىن-سوڭدى ءوڭىردىڭ قاسيەتتى جەرلەرى قامتىلعان 3D فورماتتاعى ونلاين كارتا سايتى بولماعان. سوندىقتان بۇل جاڭا دۇنيەنى جاساپ شىعۋ ۇلكەن ەڭبەكتى قاجەت ەتتى،–دەدى باسقارما باسشىسى.
ال بۇل جوبانى ىسكە اسىرىپ، تۋعان ولكە تاريحىن تانۋداعى بالاماسى جوق سايتتى قۇراستىرعان باعدارلاماشى ايبار قاسەنالين ونلاين پلاتفورما جۇمىسىنىڭ سان الۋاندىعىنا باسا نازار اۋداردى.
–ءقازىر الەۋمەتتىك جەلى قوعام ءومىرىنىڭ اجىراماس بولىگىنە اينالدى. الدەبىر اقپاراتتى الۋدا جەلى قولدانۋشىلارى مىندەتتى تۇردە ەڭ اۋەلى سايتتاردىڭ كومەگىنە جۇگىنەدى. سوندىقتان ءبىز ءوز سايتىمىزدىڭ كونتەنتىن الەۋمەتتىك جەلىگە دە ىڭعايلاپ جاسادىق. ارينە جۇمىستىڭ باعاسىن سايت قولدانۋشىلارى بەرە جاتار،–دەدى ا.قاسەنالين.
سايت جاساۋدا باعدارلاماشىلار سەگىز اي بويى وڭىردەگى قاسيەتتى جەرلەرگە جۇرگىزىلگەن ەكسپەديسيا جۇمىسىنىڭ ناتيجەلەرىن باسشىلىققا العان. سونىڭ ناتيجەسىندە سايتقا كىرگەن سايت پايدالانۋشىسى جامبىل وبلىسىنداعى «قازاقستاننىڭ قاسيەتتى جەرلەرى كارتاسى» جوباسىنا ەنگىزىلگەن ەسكەرتكىشتەر جايىنداعى دەرەكتەرمەن تانىسىپ قانا قويمايدى. اتالعان نىسانداردىڭ فوتوسۋرەتتەرىن ءتۇرلى راكۋرستان 3د فورماتىندا تاماشالاپ، ونلاين ساياحاتتاي الادى.
پىكىر قالدىرۋ