ەلىمىزدە بيىلعى كۇزگى اسكەرگە شاقىرۋ ناۋقانى «ەل تىرەگى – 2019» رەسپۋبليكالىق اكسيا شەڭبەرىندە وتكىزىلمەكشى. مىنە وسى اكسيا شەڭبەرىندە جامبىل وبلىسى اكىمىنىڭ ءبىرىنشى ورىنباسارى – وبلىستىق اسكەرگە شاقىرۋ كوميسسيا ءتوراعاسى بەكبولات ورىنبەكوۆتىڭ باسشىلىعىمەن، جامبىل وبلىسى قورعانىس ىستەرى جونىندەگى دەپارتامەنتىندە ازاماتتاردى 2019 جىلعى كوكتەمگى مەرزىمدى اسكەرگە شاقىرۋدى قورىتىندىلاي وتىرىپ، كۇزگى اسكەرگە شاقىرۋعا تاپسىرمالار قويۋ بويىنشا نۇسقاۋلىق-ادىستەمەلىك ساباعى ءوتتى.

جيىنعا تاراز قالاسى جانە اۋدان اكىمدەرىنىڭ ورىنباسارلارى، قالالىق جانە اۋداندىق اسكەرگە شاقىرۋ كوميسسيالارى ءتوراعالارىنىڭ، قۇقىق قورعاۋ ورگاندارى باسشىلارىنىڭ، اسكەرلەر مەن ۆەدومستۆولاردىڭ وكىلدەرىنىڭ، وبلىستىق قورعانىس ىستەرى جونىندەگى قالا باسقارماسى مەن اۋدان بولىمدەرى باستىقتارىنىڭ، اسكەري قىزمەتشىلەردى قابىلداۋ جانە اسكەرگە شاقىرۋ ءبولىم مەن بولىمشە باستىقتارىنىڭ، دەنساۋلىق ساقتاۋ ءبولىم باسشىلارىنىڭ ورىنباسارلارى-مەديسينالىق كوميسسيا ءتوراعالارى قاتىستى. نۇسقاۋلىق-ادىستەمەلىك ساباقتار بارىسىندا وبلىستىق جەرگىلىكتى اسكەري باسقارۋ ورگاندارى باسشىلارىنىڭ دايىندىقتارى تۋرالى باياندامالارى تىڭدالدى جانە ولار ءوز ەسەپتەرىندە الدىڭعى اسكەرگە شاقىرۋ ناۋقانىندا ورىن العان ماسەلەلى سۇراقتاردى قامتىدى.

جامبىل وبلىستىق قورعانىس ىستەرى جونىندەگى دەپارتامەنت باستىعى پولكوۆنيك ە. جابىقبايەۆ ازاماتتاردى كوكتەمگى مەرزىمدى اسكەرگە شاقىرۋ قورىتىندىسى بارىسىندا جوعارعى كورسەتكىشتەرگە قول جەتكىزگەن بايزاق، ت. رىسقۇلوۆ، قورداي، مەركى، شۋ، جامبىل جانە مويىنقۇم اۋداندارىن اتاپ ءوتتى. سول سياقتى اسكەرگە شاقىرۋعا دايىندىق بارىسىندا جامبىل وبلىسىنىڭ مەملەكەتتىك مەكەمەلەرىمەن، ازاماتتاردى مەرزىمدى اسكەري قىزمەتكە شاقىرۋ ءىس-شارالارىنىڭ جوسپارى قۇرىلىپ، بەكىتىلگەندىگىن، اسكەرگە شاقىرىلاتىن ازاماتتاردىڭ دەنساۋلىق، وتباسى جاعدايى، ءبىلىم دەڭگەيى تۋرالى مالىمەتتەر ساراپتالاتىندىعىن ايتتى.

جالپى، جامبىل وبلىسىنان 2019 جىلدىڭ كۇزىندە كەيىنگى قالدىرىلۋعا، نەمەسە بوساتىلۋعا جاتپايتىن مەرزىمدى اسكەري قىزمەتكە 18 بەن 27 جاس ارالىعىنداعى شامامەن ءبىر جارىم مىڭ ازامات شاقىرىلادى. زاڭعا ساي مەرزىمدى اسكەري قىزمەتتەن دەنساۋلىق، وتباسىلىق جاعدايىنا، وقۋدى جالعاستىرۋعا دالەلدى سەبەپتەر بويىنشا بوساتىلادى. سوڭعى اتالعاندارعا اۋىلدىق جەردەگى مۇعالىمدەر، دارىگەرلەر كىرەدى.

ساباقتى قورىتىندىلاي كەلە، وبلىستىق اسكەرگە شاقىرۋ كوميسسياسى ءتوراعاسى بەكبولات ورىنبەكوۆ جيىنعا قاتىسۋشىلارعا ساتتىلىك تىلەپ، اسكەرگە شاقىرۋ كەزەڭىندە قاتىستىرىلاتىن لاۋازىمدى ادامدارعا جەكە جاۋاپكەرشىلىكتەرى تۋرالى جەتكىزدى.