جامبىلدا «رۋحاني جاڭعىرۋ» باعدارلاماسى اياسىندا «عيبراتتى ونەر كەرۋەنى» مادەني-الەۋمەتتىك جوباسى قولعا الىنعان. وبلىستىڭ مادەني سالاسىنداعى اۋقىمدى جوبا حالىقتى ءسالت-داستۇر، توي-تومالاق وتكىزۋدىڭ ءجون-جورالعىسى، جاستار تاربيەسىنىڭ بۇگىنگى باعىتى سىندى تاقىرىپتاردا اقپاراتتاندىرۋدى كوزدەيدى، دەپ جازادى Qamshy.kz اقپارات اگەنتتىگى. 

وبلىستىڭ زيالى قاۋىم وكىلدەرىنەن، ارداگەرلەر كەڭەسىنەن بەلسەندىلەرىنەن، ءدىن سالاسىنىڭ ماماندارىنان، مادەني قىزمەتكەرلەر مەن تانىمال ازاماتتاردان تۇراتىن قۇرالعان كەرۋەن وبلىس ورتالىعىنان الدىن الا بەكىتىلگەن كەستەگە ساي اۋىلدارعا جول تارتۋدا. 100 ادامنان تۇراتىن كوش باعىتى ءار اۋداننىڭ ەكى ءىرى اۋىلىنا بەت تۇزەيدى.

–مۇندا «عيبراتتى ونەر كەرۋەنى» جوباسىنىڭ قاتىسۋشىلارى اۋىل تۇرعىندارىمەن ءسال-داستۇردىڭ جاستار تاربيەسىندەگى ءرولى، توي-تومالاقتاردىڭ ونەگەلىلىك ءمان-مازمۇنىن ارتتىرۋ، ءدىن، قوعام ساناسىنىڭ رۋحاني جاڭعىرۋى توڭىرەگىندە وي بولىسەدى. سونداي-اق جەر-جەردەگى ونەردىڭ ۇمىت قالعان ەسكىت تۇرلەرىن دامىتۋ، سيرەك كەزدەسەتىن اسپاپتاردا وينايتىن تالانتتاردى تانۋدا كەرۋەن جۇمىسىنىڭ نەگىزگى باعىتى،– دەيدى وبلىس اكىمدىگىنىڭ مادەنيەت، قۇجاتتاما جانە ارحيۆتەر باسقارماسىنىڭ باسشىسى دۇيسەنالى بىقىبايەۆ.

جالپى وبلىستىڭ مادەني رۋحاني ومىرىندە ەلباسىنىڭ «بولاشاققا باعدار:رۋحاني جاڭعىرۋ»، «ۇلى دالانىڭ جەتى قىرى» باعدارلامالىق ماقالالارى اياسىندا حالىق ونەرىنىڭ مول مۇراسىن ناسيحاتتاۋعا ارنالعان ءبىرقاتار اۋقىمدى جوبالار جۇزەگە اسىرىلۋدا. ماسەلەن وتكەن جىلى «جامبىل - مەنىڭ جاي اتىم، حالىق - مەنىڭ شىن اتىم» رەسپۋبليكالىق ايتىسى العاش رەت ايماقتىق، اۋداندىق دەڭگەيدە ىرىكتەۋ سىندارىنان باستاۋ الدى. سول سەكىلدى «اۋليەاتا بوياۋلارى»، «تاراز سيمفونياسى» كلاسسيكالىق ونەر فەستيۆالى، «تالاس تولقىندارى»، «كونە تاراز كۇمبىرى» فەستيۆالدەرىنىڭ دە مازمۇندىق دەڭگەيى جوعارى بولدى. اتالعان شارالار قازاق حالقىنىڭ ەتنوگرافيالىق جانرداعى ان-كۇي، بيلەرىن جاڭعىرتىپ قانا قويماي جاس تالانتتاردى تانىپ، ۇلكەن ساحناعا جولداما بەرۋىمەن ەرەكشەلەنىپ جاتىر.

وتكەن جىلى وبلىستا اتالعان باعدارلامالىق ماقالادان تۋىنداعان مىندەتتەردى ىسكە اسىرۋ ماقساتىندا 7 ۇلتتىق جانە 30-دان استام ايماقتىق ءىس-شارا وتكىزىلگەن بولاتىن. سول سەكىلدى كەنەن ازىربايەۆتىڭ اتىن يەلەنگەن وبلىستىق فيلارمونيانىڭ ماتەريالدىق-تەحنيكالىق بازاسىن جەتىلدىرۋگە باسا نازار اۋدارىلعان.