جىل باسىندا الماتى وبلىسىنىڭ شەكاراسىن وزگەرتۋ تۋرالى ۇكىمەت قاۋلىسىنا قول قويىلدى. اتالعان قاۋلىعا ساي بۇعان دەيىن الماتى وبلىسىنىڭ اكىمشىلىك اۋماعى سانالىپ كەلگەن ق ر قورعانىس مينيسترلىگىنىڭ اۋداندىق گۆارديالىق ەكسپلۋاتاسيالىق ءبولىمى، بيولوگيالىق قاۋىپسىزدىك پروبلەمالارىن عىلىمي-زەرتتەۋ ينستيتۋتى سىندى نىساندار مەن بۇرىنعى «الماتى» اسكەري كەڭشارى ەندى جامبىل وبلىسىنىڭ مەنشىگىنە وتەدى، دەپ جازادى Qamshy.kz اقپارات اگەنتتىگى. 

ەڭ باستىسى اتالعان اۋماق تۇرعىندارى ەندى مەملەكەتتىك قىزمەت تۇرلەرىن الۋ ءۇشىن 150 شاقىرىم جەردەگى ۇزىناعاش اۋىلىنا سابىلماي، ىرگەدەگى وتاردان-اق شارۋاسىن تىندىرادى. جەرگىلىكتى بيلىككە اكىمشىلىك-اۋماقتى وزگەرتۋ تۋرالى تالاپتى تۇرعىندار توعىز جىلدان بەرى قويىپ كەلگەن. الايدا ءارتۇرلى سەبەپتەرمەن كەيىنگى قالدىرىلىپ كەلگەن ماسەلە وسىلايشا وڭ شەشىمىن تاپتى. وعان قوسا كۇنى بۇگىنگە دەيىن «ءماتىبۇلاق» پوليگونىندا وتەتىن حالىقارالىق دەڭگەيدەگى اسكەري وقۋ-جاتتىعۋ جيىندارىنىڭ كەي شىعىندارىنا ءبىزدىڭ ءوڭىر قازىناسىنان قارجى جۇمسالىپ كەلگەن ەدى.

–راسىندا جەرگىلىكتى تۇرعىندار تاراپىنان اكىمشىلىك-اۋماقتى وزگەرتۋ تۋرالى وتكىر ماسەلەلەر كوتەرىلىپ كەلدى. جاڭادان قابىلدانعان اۋماق بۇعان دەيىن الماتى وبلىسى، جامبىل اۋدانىنا قاراعان. دەمەك تۇرعىندارعا مەملەكەتتىك قىزمەت الۋدا، دارىگەر كومەگىنە جۇگىنۋدە 150 شاقىرىم قاشىقتىقتاعى اۋدان ورتالىعى ۇزىناعاش اۋىلىنا بارۋعا تۋرا كەلگەن. وعان قوسا «ءماتىبۇلاق» پوليگونىندا اسكەري ويىنداردى وتكىزۋ كەزىندە اسكەري نىسان اۋماعىن ينفراقۇرىلىمدارمەن جابدىقتاۋ ءىسى بۇعان دەيىن جامبىل وبلىسى بيۋدجەتى ەسەبىنەن جۇرگىزىلدى. سونىمەن قاتار وسى اسكەري كەشەندەگى اسكەري قىزمەتكەرلەردىڭ 80 پايىزى كەلىسىم شارتپەن جۇمىس جاساپ جاتىر. ولاردىڭ كوبى وتباسىلى. سوندىقتان مۇندا بالاباقشا ورىندارىنىڭ تاپشىلىعى، مەكتەپتىڭ تارلىعى سىندى ماسەلەلەر دە قالىپتاسقان. اتالعان جايتتاردى ەسكەرىپ ءبىز «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» زاڭىن باسشىلىققا الىپ الماتى وبلىسىنىڭ اكىمدىگىنە قايىرىلدىق. ءبىزدىڭ بۇل ۇسىنىسىمىزدى الماتى وبلىسى اكىمدىگى مەن ءماسليحاتىنىڭ بىرلەسكەن شەشىمىمەن قابىلداندى، –دەيدى وبلىس اكىمدىگىنىڭ جەر قاتىناستارى باسقارماسى باسشىسىنىڭ ورىنباسارى بەردىبەك مولداباي.

ەندى ەكى وبلىستىڭ وكىلدەرى بەرىلگەن جەردى وتكىزۋ، قابىلداپ الۋ راسىمدەرىن وتكىزەدى.