قازاقستان پرەزيدەنتى قاسىم-جومارت توقايەۆ قحر ءتوراعاسى سي سزينپينمەن كەلىسسوزدەر جۇرگىزدى دەپ حابارلايدى Qamshy.kz اقپارات اگەنتتىگى اقوردانىڭ رەسمي سايتىنا سىلتەمە جاساپ.
سالتاناتتى شارا اياقتالعان سوڭ قاسىم-جومارت توقايەۆ پەن سي سزينپين كەلىسسوز زالىنا ءوتتى.
قازاقستان پرەزيدەنتى جۇڭگو كوشباسشىسىمەن بىشكەكتە وتكەن شانحاي ىنتىماقتاستىق ۇيىمىنىڭ سامميتىنەن كەيىن اراعا بىرنەشە اي سالىپ، قايتا جولىققانىنا وتە قۋانىشتى ەكەنىن ايتتى. قاسىم-جومارت توقايەۆ قحر ءتوراعاسىنا قوناقجايلىق كورسەتكەنى ءۇشىن ريزاشىلىق ءبىلدىرىپ، جۇڭگو كوشباسشىسىنىڭ دوسى، قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ سالەمى مەن ىستىق ىقىلاسىن جەتكىزدى.
– ءبىزدىڭ كەزدەسۋىمىز قحر-نىڭ 70 جىلدىق مەرەيتويى قارساڭىندا ءوتىپ وتىر. وسى ءساتتى پايدالانىپ، ءسىزدى جانە تۇتاس جۇڭگو حالقىن ايتۋلى داتامەن قۇتتىقتاعىم كەلەدى. جۇڭگو بۇل مەرەيتويعا الەۋمەتتىك-ەكونوميكالىق جانە ساياسي دامۋ تۇرعىسىنان زور جەتىستىكپەن جەتىپ وتىر. وسى وقيعا تەك جۇڭگو حالىق رەسپۋبليكاسى ءۇشىن عانا ەمەس، كۇللى الەم ءۇشىن تاريحي مانگە يە دەپ ويلايمىن. ءسىزدىڭ مەملەكەتتىڭ دامۋى دۇنيەجۇزىنىڭ ءجىتى نازارىندا،– دەپ اتاپ ءوتتى مەملەكەت باسشىسى.
مەملەكەت باسشىسىنىڭ ايتۋىنشا، وسى جەتپىس جىلدىق جول جۇڭگو ءۇشىن وتە اۋىر بولدى. ءبىراق 1970 جىلداردىڭ سوڭىندا دەن ءسياوپيننىڭ باسشىلىعىمەن قولعا الىنعان رەفورمالاردىڭ ارقاسىندا جۇڭگو حالقى ءوز دامۋىندا وراسان زور جەتىستىككە جەتتى.
– قىتايدىڭ تابىستارى مەملەكەتتەرىمىز اراسىنداعى ىنتىماقتاستىقتى دامىتۋ ءۇشىن بەرىك نەگىز بولادى دەپ سانايمىز. بۇگىن ءبىز بىرلەسكەن مالىمدەمەگە قول قويامىز. بۇل قۇجات بويىنشا قازاقستان مەن جۇڭگو ۇزاقمەرزىمدى، ستراتەگيالىق جانە جان-جاقتى سەرىكتەستىكتى دامىتۋعا بەيىلدى ەكەنىن كورسەتەدى. جوعارى دەڭگەيدە قول جەتكىزگەن ۋاعدالاستىق ەكى ەل اراسىنداعى ىنتىماقتاستىقتى ودان ءارى دامىتۋ ءۇشىن سالماقتى قۇقىقتىق جانە ساياسي بازا بولىپ تابىلادى، – دەدى قازاقستان پرەزيدەنتى.
قحر ءتوراعاسى سي سزينپين ءوز سوزىندە قازاقستاننىڭ ورتالىق ازياداعى ءىرى ەل سانالاتىنىن جانە ورتالىق ەۋرازيادا ۇلكەن ىقپالى بار ەكەنىن ايتتى.
– قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ باسشىلىعىمەن ەلدەرىڭىز زور تابىسقا قول جەتكىزدى، ۇلتتىق ەرەكشەلىككە نەگىزدەلگەن دامۋ ۇلگىسىن قۇردى. ءسىز پرەزيدەنت بولعاننان كەيىن ءوزىڭىزدىڭ ساباقتاستىق، ادىلەتتىلىك جانە ىلگەرىلەۋ جونىندەگى ءۇش ۇستانىمىڭىزدى جاريالادىڭىز. ەكونوميكانى دامىتۋدى، جۇمىس ورىندارىن اشۋدى، سىبايلاس جەمقورلىقپەن كۇرەسۋدى، الەۋمەتتىك قورعاۋ دەڭگەيىن كوتەرۋدى الدىڭىزعا ماقسات ەتىپ قويدىڭىز. بۇل – قازاقستان حالقىنىڭ ءۇمىتىن اقتايدى. ءسىزدىڭ بارلىق باستامالارىڭىز وسىعان باعىتتالعان. دوستاس قازاقستان حالقىنا باق-بەرەكە جانە تابىس تىلەيمىن، – دەدى جۇڭگو كوشباسشىسى.
قازاقستان پرەزيدەنتى قاسىم-جومارت توقايەۆ پەن جۇڭگو حالىق رەسپۋبليكاسىنىڭ ءتوراعاسى جۇرگىزگەن كەلىسسوزدەر قورىتىندىسى بويىنشا مىناداي قۇجاتتارعا قول قويىلدى:
- مەملەكەتتەر باسشىلارىنىڭ بىرلەسكەن مالىمدەمەسى؛
- قازاقستان رەسپۋبليكاسىنىڭ ۇكىمەتى مەن جۇڭگو حالىق رەسپۋبليكاسى ۇكىمەتىنىڭ اراسىنداعى اۆياسيالىق ىزدەۋ جانە ازاماتتىق اۋە كەمەلەرىن قۇتقارۋ سالاسىنداعى ىنتىماقتاستىق تۋرالى كەلىسىم؛
- قازاقستان رەسپۋبليكاسىنىڭ ۇكىمەتى مەن جۇڭگو حالىق رەسپۋبليكاسى ۇكىمەتىنىڭ اراسىنداعى «نۇرلى جول» جاڭا ەكونوميكالىق ساياساتى (نج جەس) مەن «جىبەك جولىنىڭ ەكونوميكالىق بەلدەۋى» (ججەب) قۇرىلىسىن ۇشتاستىرۋ جونىندەگى ىنتىماقتاستىق جوسپارىن جۇزەگە اسىرۋعا بايلانىستى ءوزارا كومەك تۋرالى مەموراندۋم؛
- قازاقستان رەسپۋبليكاسىنىڭ ۇكىمەتى مەن جۇڭگو حالىق رەسپۋبليكاسى ۇكىمەتىنىڭ اراسىنداعى قحر ۇكىمەتىنىڭ قازاقستان تاراپىنا سۋپەركومپيۋتەر بەرۋ جوباسى جونىندەگى ىنتىماقتاستىق تۋرالى كەلىسىم؛
- قازاقستان رەسپۋبليكاسىنىڭ ساۋدا جانە ينتەگراسيا مينيسترلىگى مەن جۇڭگو حالىق رەسپۋبليكاسىنىڭ كوممەرسيا مينيسترلىگى اراسىنداعى ءوزارا تۇسىنىستىك تۋرالى مەموراندۋم؛
- قازاقستان رەسپۋبليكاسىنىڭ اۋىل شارۋاشىلىعى مينيسترلىگى مەن جۇڭگو حالىق رەسپۋبليكاسىنىڭ باس كەدەن باسقارماسى اراسىنداعى جۇڭگو حالىق رەسپۋبليكاسىنا قازاقستان رەسپۋبليكاسىنان ەكسپورتتالاتىن ءسۇت ونىمدەرىنە قويىلاتىن ينسپەكسيالىق، كارانتيندىك جانە ۆەتەرينارلىق-سانيتارلىق تالاپتار جونىندەگى حاتتاما؛
- قازاقستان رەسپۋبليكاسىنىڭ اۋىل شارۋاشىلىعى مينيسترلىگى مەن جۇڭگو حالىق رەسپۋبليكاسىنىڭ باس كەدەن باسقارماسى اراسىنداعى جۇڭگو حالىق رەسپۋبليكاسىنا قازاقستان رەسپۋبليكاسىنان ەكسپورتتالاتىن ءجۇن شيكىزاتىنا قويىلاتىن ينسپەكسيالىق، كارانتيندىك جانە ۆەتەرينارلىق-سانيتارلىق تالاپتار جونىندەگى حاتتاما؛
- قازاقستان رەسپۋبليكاسىنىڭ قارجى مينيسترلىگى مەن جۇڭگو حالىق رەسپۋبليكاسىنىڭ باس كەدەن باسقارماسى اراسىنداعى زياتكەرلىك مەنشىك قۇقىعىن شەكارا ماڭى قورعاۋ سالاسىنداعى ىنتىماقتاستىقتى نىعايتۋ جونىندەگى مەموراندۋم؛
- قازاقستان رەسپۋبليكاسىنىڭ اۋىل شارۋاشىلىعى مينيسترلىگى مەن جۇڭگو حالىق رەسپۋبليكاسىنىڭ باس كەدەن باسقارماسى اراسىنداعى جۇڭگو حالىق رەسپۋبليكاسىنا قازاقستان رەسپۋبليكاسىنان ەكسپورتتالاتىن زىعىرعا قويىلاتىن ينسپەكسيالىق، كارانتيندىك جانە ۆەتەرينارلىق-سانيتارلىق تالاپتار جونىندەگى حاتتاما؛
- قازاقستان رەسپۋبليكاسى مەن جۇڭگو حالىق رەسپۋبليكاسى اراسىنداعى كەدەن شەكاراسى ارقىلى تاۋارلار مەن كولىك قۇرالدارىن الىپ ءوتۋ تۋرالى الدىن الا اقپارات الماسۋ جونىندەگى تەحنيكالىق سپەسيفيكاسيا.
پىكىر قالدىرۋ