ىرگەتاسى وبلىس قۇرىلعان ساتتە قالانعان وڭىردەگى قان قىزمەتىنە 80 جىل.1939 جىلدىڭ 1 قاراشاسىندا قان قۇيۋ بويىنشا تىرەك پۋنكتىنىڭ وبلىستىق قان قۇيۋ بەكەتىنەن باستالعان بۇل تاريحتىڭ وڭىردەگى دەنساۋلىق سالاسىنداعى الار ورنى ەرەكشە. العاشقى جىلدىڭ وزىندە وبلىستىق قان قۇيۋ بەكەتىندە 81 مارتە قان قۇيۋ ءىس-شاراسى جۇرگىزىلىپتى، دەپ جازادى Qamshy.kz اقپارات اگەنتتىگى. 

وبلىستىق قان قۇيۋ بەكەتىن سۇراپىل سوعىس جىلدارى دا ءوز مىندەتىن ءمىنسىز اتقاردى. سوعىستىڭ العاشقى جىلدارى بەكەتتە 168 ليتر قان دايىندالسا، 1946 جىلى مۇنداعى قاننىڭ قورى 178 ءليتردى قۇرادى.

1971 جىلى ستانسيادا كس-30 قۇرىلعىسىنىڭ كومەگىمەن قۇرعاق پلازمالاردى ازىرلەۋ جۇرگىزىلدى. وسى جىلدارى مۇندا قان قۇيۋ ماسەلەسىمەن اينالىساتىن ورتا مەديسينالىق بۋىن قىزمەتكەرلەرىنىڭ بىلىكتىلىگىن ارتتىرۋ كۋرسى جۇمىسى قولعا الىندى. سايكەسىنشە قاندى دايىنداۋ، قايتا وڭدەۋدىڭ قارقىنى ارتتى. ال 25 جىل بۇرىن وبلىستىق قان قۇيۋ بەكەتى وبلىستىق قان ورتالىعى اتاۋىنا يە بولدى. بۇدان 8 جىل بۇرىن ورتالىقتىڭ زاماناۋي ۇلگىدەگى وزىق مەديسينالىق جابدىقتالعان جاڭا عيماراتى پايدالانۋعا بەرىلدى.

بۇگىندە وبلىستىق قان ورتالىعىنىڭ قۋاتتىلىعى جىلىنا 15 مىڭ ليتر قان مەن ونىڭ قۇرامداس بولىكتەر ازىرلەۋگە جەتەدى. وڭىردەگى قان قىزمەتىنىڭ 80 جىلدىق تاريحى مەملەكەتتىك وڭىرلەردە ءدال وسى سالانىڭ دامۋىنا ايرىقشا كوڭىل ءبولىپ وتىرعانىن ايعاقتادى.

سوڭعى 3 جىلدا ورتالىق قىزمەتىنە 50 مىڭ دونور جۇگىندى. وسى ارالىقتا ورتالىق قىزمەتىنىڭ ناتيجەسىندە 6398 اۋرۋ ساۋىعىپ قاتارعا قوسىلدى. تەرىس-رەزۋس فاكتور كورسەتكەن 7433 جۇكتى ايەل زاماناۋي دياگنوستيكامەن قامتىلدى، دەيدى وبلىستىق قان ورتالىعىنىڭ ديرەكتورى گۋلام وماروۆ.

ورتالىق سوڭعى 3 جىل ىشىندە وڭىردەگى 28 مەديسينالىق ۇيىمنىڭ سۇرانىسىنا ساي ترانسفۋزيولوگيالىق كومەك ءۇشىن 52 436 قاننىڭ مولشەرى مەن قۇرامداس بولىكتەرىن دايارلادى. سونداي-اق ورتالىقتا قان تاپسىرۋشىلار مەن وعان مۇقتاجداردىڭ ورتاق بازاسىن قالىپتاستىرۋدا «ينفو-دونور» اقپاراتتىق جۇيەسىنىڭ مۇمكىندىگى كەڭىنەن قولدانىلىپ جاتىر. بۇل جۇيە دونورلىق قاندى ازىرلەۋدىڭ ءار ساتىسىن مۇقيات باقىلاۋعا مۇمكىندىك بەرۋىمەن ەرەكشەلەنەدى. مۇنان وزگە دونورلىق قان توپتارىنىڭ سايكەس كەلۋىن زەردەلەۋ ماقساتتارىندا

«Info-Grantum»،«Info-Blood» باعدارلامالارىنىڭ مۇمكىندىگى دە كادەگە جاراۋدا. جالپى ورتالىق قىزمەتىن ۇيىمداستىرۋ، ونىڭ دەنساۋلىق ساقتاۋ سالاسىنداعى ەڭ جاۋاپتى ميسسياسىن مۇلتىكسىز ورىنداۋى جولىندا ءبىرقاتار بىلىكتى دارىگەرلەر مەن مەدبيكەلەر زور ەڭبەك سىڭىرگەنىن اتاپ وتكەن ءجون.