قارقىندى دامىعان جانە ينكليۋزيۆتى ەكونوميكا ەل كەلەشى ەكەنى داۋسىز. بۇل ەل پرەزيدەنتىنىڭ جولداۋىندا دا باسا ايتىلدى. وسى ورايدا اۋليەاتا جەرىندە ءوڭىر ەكونوميكاسىن ورىستەتۋ دە وڭ وزگەرىستەر بار دەپ جازادى Qamshy.kz اقپارات اگەنتتىگى. 

ەسەپتى كەزەڭنىڭ قورىتىندىسى بويىنشا ونەركاسىپ ءونىمىنىڭ كولەمى 2018 جىلدىڭ وسى كەزەڭىمەن سالىستىرعاندا 3،2%-عا، اۋىل شارۋاشىلىعى – 2،7%-عا، قۇرىلىس – 1،2%-عا، ينۆەستيسيالار – 9،9%-عا، ساۋدا - 7،5%-عا، كولىك قىزمەتى - 1،6%-عا جانە بايلانىس قىزمەتى - 5،4%-عا، ورتاشا جالاقى 13،7%-عا ءوستى. 264 مىڭ 200 ءجۇز شارشى مەتر تۇرعىن ءۇي پايدالانۋعا بەرىلدى، بۇل 2018 جىلدىڭ ءتيىستى كەزەڭىنەن 2،2 %-عا ارتىق.

شيكىزاتقا بايلانعان مەنتاليتەتتەن باس تارتىپ، ەكونوميكانى ءارتاراپتاندىرۋ بويىنشا يندۋستريالاندىرۋ كارتاسى اياسىندا ىسكە اسىرىلىپ جاتقان جوبالاردىڭ ۋاقتىلى ىسكە قوسىلۋى – نەگىزگى كورسەتكىشتىڭ ءبىرى. سوندىقتان، تاراز قالاسى مەن اۋداندار اكىمدەرى، كاسىپكەرلىك جانە يندۋستريالدى-يننوۆاسيالىق دامىتۋ باسقارماسى مەن ينۆەستورلارعا قىزمەت كورسەتۋ ورتالىعى جوبالاردىڭ ىسكە اسىرىلۋ بارىسىن كۇندەلىكتى باقىلاۋدا ۇستاپ، تۋىنداعان پروبلەمالىق ماسەلەلەردىڭ جىلدام شەشىلۋىنە بارلىق شارالاردى قابىلدايتىن بولادى.

مەملەكەت باسشىسى يندۋستريالىق-يننوۆاسيالىق دامۋ باعدارلاماسى اياسىندا ونىمدىلىگى جوعارى ورتا بيزنەسكە قولداۋ كورسەتۋدىڭ كەشەندى شارالارىن ازىرلەۋدى تاپسىردى. بۇل باعىتتاعى ەڭ ءتيىمدى شارالاردىڭ ءبىرى – يندۋستريالىق ايماقتار قۇرۋ.

شۋ اۋدانىندا «تاراز حيميالىق پاركى» ارنايى ەكونوميكالىق ايماعىنىڭ ينفراقۇرىلىم قۇرىلىسى اياقتالۋدا.

كاسىپكەرلىك جانە يندۋستريالدى-يننوۆاسيالىق دامىتۋ باسقارماسى «تاراز حيميالىق پاركى» باسقارۋشى كومپانياسىمەن بىرلەسىپ، جوبالاردى ۋاقتىلى ىسكە اسىرۋ ءۇشىن، زاڭناماعا سايكەس بارلىق مەملەكەتتىك قولداۋ شارالارىن كورسەتەتىن بولادى.

تاراز قالاسىنىڭ اۋماعىندا رەسپۋبليكالىق ماڭىزى بار يندۋستريالىق ايماق قۇرۋ جۇمىستارىن اياقتاۋ مىندەتى تۇر.

بۇگىنگى كۇنگە تىركەلگەن 84 مىڭنان اسا شاعىن جانە ورتا كاسىپكەرلىك سۋبەكتىلەرىنىڭ ىشىندەگى جۇمىس جاسايتىندارىنىڭ ۇلەسى 80،3%-عا جەتتى. ول، وتكەن جىلدىڭ وسى كەزەڭىمەن سالىستىرعاندا 11،4 %-عا ارتىپ وتىر.

«بيزنەستىڭ جول كارتاسى - 2020» باعدارلاماسى اياسىندا اعىمداعى جىلدىڭ 8 ايىندا 4،5 ملرد. تەڭگەگە 290 جاڭا جوبا ىسكە اسىرىلۋدا.