مەملەكەت باسشىسى ق.توقايەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا شاعىن جانە ورتا كاسىپكەرىكتى دامىتۋعا ايرىقشا نازار اۋدارىلعانى بەلگىلى. پرەزيدەنت بۇل تۇرعىدا «شاعىن، اسىرەسە، ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن، اۋىل تۇرعىندارىنا تۇراقتى جۇمىس بەرەدى، جۇمىسسىزدىقتى ازايتادى. سونىمەن قاتار، سالىق بازاسىن قۇراپ، جەرگىلىكتى بيۋدجەتتى نىعايتادى» دەپ اتاپ كورسەتتى.

بۇگىندە جامبىل وبلىسىندا شاعىن جانە ورتا كاسىپكەرلىك دامىتۋ باعىتىندا جۇيەلى جۇمىستار اتقارىلۋدا. بيزنەستىڭ قانات جايۋىنا «اتامەكەن تاراز» جاۋاپكەرشىلىگى شەكتەۋلى سەرىكتەستىگى دە ءوز ۇلەسىن قوسۋدا. شاعىن نەسيەلەۋ ۇيىمىنىڭ اشىلعانىنا كوپ ۋاقىت وتە قويعان جوق. دەيتۇرعانمەن سەرىكتەستىك باسشىلىعى كاسىپتىڭ كوزىن تاپقاندارعا نەسيە بەرۋ ارقىلى وبلىستىڭ كاسىپكەرلىك سالاسىنىڭ دامۋىنا وڭ سەپتىگىن تيگىزۋدە.

اتالمىش قارجى ۇيىمىنىڭ شاراپاتىن سەزىنىپ ۇلگەرگەن اگروقۇرىلىمنىڭ ءبىرى-بايزاق اۋدانىنداعى «بىرلىك» شارۋا قوجالىعى. نيكولاي راحمەتىلدايەۆ جەتەكشىلىك ەتىپ كەلە جاتقان قوجالىق نەسيە قاراجاتىنىڭ نەگىزىندە ونىمدىلىكتى ارتتىرىپ، شارۋاشىلىقتىڭ اياسىن كەڭەيتە ءتۇسىپتى.

– «جامبىل مونوليت ستروي» ترەست-ى بانكروتقا ۇشىراعاننان كەيىن مەن 1998 جىلى وسى «بىرلىك» شارۋا قوجالىعىن ۇيىمداستىردىم. باستاپقى قادامدى پياز، كوپجىلدىق ءشوپ، جۇگەرى وسىرۋدەن باستادىق. العاشقى ەگىس القابىمىز نەبارى 10-اق گەكتاردى قۇراعان. جىلدار وتە القاپ اۋماعىن كەڭەيتىپ 70 گەكتارعا دەيىن جەتكىزدىك. ارينە، العاشىندا اقشادان ازداپ قىسىلدىق. كەيىن دە قارجى جەتىسپەۋشىلىگى سەزىلىپ ءجۇردى. دەگەنمەن، قول قۋسىرىپ قاراپ وتىرا بەرگەننەن ءتۇپ شىقپاسىن ءبىلىپ، بەلدى بەكەم بۋىپ بانكتىڭ ەسىگىن قاقتىم. ءبىراق ءبىر سەبەپتەرمەن نەسيەگە قول جەتكىزە الماي، بانكتەن تاۋىم شاعىلىپ شىقتىم. وسى ارالىقتا تانىستارىم «اتامەكەن» كاسىپكەرلەر پالاتاسى اياسىنداعى «بيزنەس كەڭەسشى» جوباسى بويىنشا كاسىپكەرلىك نەگىزدەرىنىڭ كۋرسىن وقىپ، نەسيە الۋعا بولاتىنىن ايتىپ ءۇمىت وتىن جاندىردى. وسىلايشا ءتيىستى كۋرستان ءوتىپ «اتامەكەن تاراز» جاۋاپكەرشىلىگى شەكتەۋلى سەرىكتەستىگىنەن 3 500 000 تەڭگە كولەمىندە نەسيە الدىم. قارجى ۇيىمىنىڭ تالابى كوڭىلدەن شىقتى. ەشقانداي بيۋروكراتياسىز-اق، سابىلا كۇتپەي-اق 4 پايىزدىق ستاۆكامەن قارجى الىپ، سول مۇمكىندىكتىڭ ارقاسىندا بيىل تامشىلاتىپ سۋارۋ ادىسىمەن قانت قىزىلشاسى مەن پياز ەكتىم. سونداي-اق، تامشىلاتۋ تەحنولوگياسىنسىز-اق قارا توپىراققا قاراپايىم ادىسپەن جۇگەرى، پياز، جوڭىشقانى دا سەۋىپ تاستادىم. ەندى مىنە وسى ەڭبەكتىڭ جەمىسىن كورىپ، كوڭىلىم مارقايىپ وتىر، – دەيدى ن.راحمەتىلدايەۆ.

بۇل ءبىز ءسوز ەتكەن ءبىر عانا شارۋاشىلىق. ال جامبىل جەرىندە قارجىلاي قولداۋدىڭ ناتيجەسىندە تىرلىگىن تىكتەي بىلگەن اگروقۇرىلىمداردىڭ قاتارى جىلدان جىلعا كوبەيىپ كەلەدى. ەڭ باستىسى ەل-جۇرتتىڭ ەڭبەككە دەگەن قۇلشىنىسى جوعارى.