«تىرلىكتىڭ كوزىن تاپقان بايلىقتىڭ ءوزىن تابادى» دەيدى دانا قازاق. راسىندا دا ەرىنبەي ەڭبەك ەتكەن ادامنىڭ ەڭسەسى بيىك. سوندىقتان دا قول قۋسىرىپ قاراپ وتىرماي، قارەكەت قىلۋ قاجەت. بۇل تۇرعىدا مەملەكەت تاراپىنان كورسەتىلەتىن قولداۋ-كومەك تە كوپ. مەملەكەت باسشىسى قاسىم-جومارت توقايەۆ تا قازاقستان حالقىنا جولداۋىندا ءتيىمدى شاعىن جانە ورتا بيزنەس – قالا مەن اۋىلدى دامىتۋدىڭ بەرىك نەگىزى بولاتىندىعىن تارقاتا ايتىپ، ۇكىمەت پەن اكىمدەرگە ناقتى مىندەتتەر جۇكتەدى.

قازىرگى تاڭدا جولداۋ جۇكتەگەن مىندەتتەر جامبىل وبلىسىندا دا جۇيەلى جۇزەگە اسۋدا. اسىرەسە، بيزنەس قۇرىلىمدارىن قارجىلاي قولداۋدىڭ ناقتى تەتىكتەرى ايقىندالىپ، جەمىسىن بەرۋدە. بۇل تۇرعىدا وبلىستىق كاسىپكەرلەر پالاتاسى جانىنان قۇرىلعان «اتامەكەن تاراز» جاۋاپكەرشىلىگى شەكتەۋلى سەرىكتەستىگىنىڭ كاسىپكەرلەرگە تيگىزىپ جاتقان كومەگى كوپ. وسى ۇيىمنىڭ ارقاسىندا تاراز توڭىرەگىندە بالىققا قۇمار قارماقشىلارعا ارنالعان دەمالىس اۋماعى مەن ۇندىك شارۋاشىلىعى جۇمىسىن جولعا قويىپ العانىن ماقتانىشپەن ايتۋعا بولادى.

مىسالى «ارنۇر» جەكە كاسىپكەرلىگىنىڭ قوجايىنى رۋسلان ساۋرامبايەۆ كاسىبىنىڭ باياندى بولاشاعى ءۇشىن باتىل قادامعا بارىپ، «اتامەكەن تاراز» ۇيىمىنان 4 پايىزدىق ستاۆكامەن 5 جىلعا 20 ميلليون تەڭگە نەسيە راسىمدەگەن. سول ارقىلى يەلەگىندەگى شاعىن كولدە تۇقى مەن الابالىق ءوسىرۋدى كوزدەپتى.

مۇنداي مۇمكىندىكتىڭ كومەگىمەن كاسىپكەر ر.ساۋرامبايەۆ تارازدىقتار مەن ىرگەلەس اۋدانداردىڭ بالىق اۋلاۋشىلارىنا جايلى جاعداي جاساپ، بالىق شارۋاشىلىعىنىڭ دامۋىنا ۇلەس قوسقىسى كەلەدى. ول العان قارجىعا الابالىق ۇستاۋعا ارنالعان ۇلكەن باسسەين سالىپتى جانە دەمالۋشىلار ءۇشىن فۋتبول الاڭشاسىن دا توسەپ قويعان. ازىرگە دەمالىس اۋماعى ۋاقىتشا جابىق تۇر ەكەن. ويتكەنى وندا قوناق ءۇي قۇرىلىسى مەن اۋماقتى كوگالداندىرۋ جۇمىستارى قولعا الىنعان.

بالىق قورى مولايتىلعان كولگە جاز بويى بالىقشىلار ءبىر تولاستاماعان. كاسىپكەر شاباقتاردى كورشى قىرعىز ەلى مەن تۇركىستان وبلىسىنداعى شاردارا سۋ ايدىنىنان جەتكىزەدى. وسىندا ەسەيتىپ، كولگە جىبەرەدى. ول ەندى شارۋاشىلىق قۋاتىن ارتتىرۋدى، ياعني تۇقى بالىقتارىن جىلىنا 120 توننا، الابالىقتى 70 تونناعا جەتكىزۋدى كوزدەپ وتىر. ءقازىردىڭ وزىندە رۋسلان ساۋرامبايەۆقا جان-جاقتان، ونىڭ ىشىندە الماتى وبلىسىنان تاپسىرىستار ءتۇسىپ وتىر.