ەلىمىزدە شاعىن جانە ورتا كاسىپكەرلىكتى دامىتۋ ماسەلەسى كۇن تارتىبىنەن تۇسكەن ەمەس. نارىقتىق قاتىناستاردىڭ العاشقى كەزەڭىنەن وسى سالاعا مەملەكەت تاراپىنان ايرىقشا قامقورلىق تا جاسالىپ كەلەدى. وعان ەلباسى ن.نازاربايەۆتىڭ تىكەلەي تاپسىرمالارىنىڭ ناتيجەسىندە ومىرگە كەلگەن باياندى باعدارلامالار دالەل. مەملەكەت باسشىسى ق.توقايەۆ تا بۇرىننان قالىپتاسقان ستراتەگيالىق ماقساتتاردى ساباقتاستىرا وتىرىپ، بيزنەستىڭ ورىستەۋىنە كوڭىل بولۋدە. پرەزيدەنت قازاقستان حالقىنا العاشقى جولداۋىندا دا وسى سالاعا ارنايى باسىمدىق بەردى. بۇل ارينە، نەگىزسىز ەمەس. ويتكەنى، كاسىپكەرلىك دامىسا جاڭا جۇمىس ورىندارى اشىلادى، سالىقتىق تۇسىمدەر ارتادى. سول ارقىلى الەۋمەتتىڭ الەۋەتى دە كوتەرىلەدى.

ارينە، بيزنەس الەمىندە باسەكەگە قابىلەتتىلىكتىڭ قاتار جۇرەتىنى بەلگىلى. كىم ەلدە جوق كاسىپپەن اينالىسادى، سونىڭ ساۋداسى جۇرەدى. ساپالى ءونىم ۇسىناتىنداردىڭ دا تۇتىنۋشى كوپ بولادى. بۇل تۇرعىدا نارىقتى تەرەڭ تالداپ، ماركەتينگكە ءمان بەرەتىندەر ۇتادى. وسى ورايدا ۇندىك باعىپ تا بايىپ جاتقانداردىڭ تىرلىگى كوپكە ۇلگى. سالا ماماندارى بۇل قۇس ءتۇرىن باعۋدى اۋىل شارۋاشىلىعىنىڭ تابىستى دا ءتيىمدى سەكتورىنا جاتقىزادى. ولار از شىعىنمەن كوپ تابىس تابۋعا بولاتىن جوبانى سارالاۋ بارىسىندا وسىنداي قورىتىندىعا كەلىپ وتىر.

مىنە سونداي كاسىپكەردىڭ ءبىرى- جامبىل وبلىسىنىڭ بايزاق اۋدانىنداعى «مەركۋريي» شارۋا قوجالىعىنىڭ جەتەكشسى گۇلنارا سىزدىقوۆا. ول «اتامەكەن تاراز» جاۋاپكەرشىلىگى شەكتەۋلى سەرىكتەستىگىنەن العان 10 ميلليون تەڭگە نەسيە قارجىسىنا ءبىراز جوسپار قۇرىپ ۇلگەرىپتى. وعان الدىمەن ءۇي قۇستارىنىڭ قاتارىن كوبەيتۋ ماقساتىندا ينكۋباتور ساتىپ الۋدى كوزدەپتى.

– بۇل قۇس ءتۇرىن دۇرىس تاڭداماساڭ دا كەيىن ءونىم كورسەتكىشىن تومەندەتىپ، باستاعان ءىسىڭنىڭ بەرەكەسىن كەتىرىپ جىبەرەدى. اسىقپاي زەرتتەي كەلە مەن ەتى ءدامدى ءارى تەز وسەتىن «بيگ-6» دەگەن ۇندىك ءتۇرىن تاڭدادىم. بۇلاردىڭ اتالىعى 25 كەلىگە دەيىن سالماق تارتسا، انالىعى 11 كەلىگە دەيىن بارادى. ودان بولەك ودان شىعاتىن ءونىمنىڭ تازا سالماعىنىڭ 80-85 پايىزعا دەيىن جەتۋى – رەكوردتىق كورسەتكىش. ءتىپتى بۇل كورسەتكىشپەن ەشقانداي ءۇي جانۋارىن سالىستىرۋعا كەلمەيدى. دەگەنمەن، ۇندىكتىڭ بۇل ءتۇرىن كوبەيتۋدە ءبىر كەلەڭسىزدىك بار. ول – وزدىگىنەن، ياعني تابيعي جولمەن باياۋ كوبەيەتىندىگى. سول سەبەپتى قولمەن جۇمىرتقا باستىرىپ، كوبىرەك بالاپان شىعارماساڭ كاسىبىڭنىڭ ونىمدىلىگى ءتۇسىپ كەتەدى. مىنە، ءبىز وسى ماقساتتا پالاتا جانىنداعى قارجى ۇيىمىنان قوماقتى نەسيە الىپ، ينكۋباتور جانە وزگە دە كەرەك-جاراقتاردى ساتىپ الدىق، – دەگەن گۇلنارا سىزدىقوۆانىڭ كاسىپكەرلىك پالاتا وكىلدەرىنە جانە سەرىكتەستىك ۇجىمىنا ايتار العىسى شەكسىز.

ايتا كەتۋ كەرەك، «مەركۋريي» شارۋا قوجالىعى الداعى قازان ايىندا 3 مىڭعا جۋىق توننا ەت الۋعا دايىندالىپ وتىر.