بۇگىندە جامبىل وبلىسىنىڭ اۋماعىندا 524 مادەنيەت، ارحيۆ مەكەمەلەرى حالىققا قىزمەت كورسەتۋدە. ونىڭ 26-سى وبلىس اكىمدىگى مادەنيەت، ارحيۆتەر جانە قۇجاتتاما باسقارماسىنا قاراستى بولسا، قالعان 498ء-ى تاراز قالاسى مەن اۋدان اكىمدىكتەرىنە باعىنىستى. بۇل قاتارعا بيىل جەڭىس كۇنىنە وراي اشىلعان «داڭق» زالىنىڭ قوسىلعاندىعىن ايتا كەتۋ كەرەك. سونىمەن قاتار بۇل ءتىزىم جۋىردا تاعى دا تولىعا تۇسپەك. ويتكەنى، جامبىل وبلىسىنىڭ 80 جىلدىق مەرەيتويىن مەرەكەلەۋ اياسىندا ءبىرقاتار جاڭا نىساندار يل يگىلىگىنە ۇسىنىلماق. ولاردىڭ ىشىندە مادەني كەشەندەر دە بارشىلىق. بۇل تۋرالى وبلىس اكىمدىگى مادەنيەت، ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىبايەۆ تارقاتا ايتىپ بەردى.

–كونە قالانىڭ تاريحي كەسكىنىن قايتا جاڭعىرتىپ، تۋريستەردىڭ نازارىن اۋدارۋ ماقساتىندا شىعىستىق ۇلگىدەگى «شاحريستان» ەتنو-تاريحي كەشەنىنىڭ قۇرىلىسى قارقىندى جۇرگىزىلۋدە. وندا «رۋحانيات جانە تاريحتانۋ» ورتالىعى، تاريحي-ولكەتانۋ مۋزەيى، كورمە ورتالىعى، كوركەمسۋرەت گالەرەياسى، امفيتەاتر، جەرگىلىكتى قولونەرشىلەردىڭ شەبەرحاناسى سىندى نىساندار ورنالاساتىن بولادى. سونداي-اق «تەكتۇرماس» تاريحي-ەتنوگرافيالىق كەشەنى سالىنىپ، وندا ورتاعاسىرلىق ۇلگىدەگى قورعانىس بەكىنىسى تۇرعىزىلىپ، وتكەن عاسىرلاردا وبلىس اۋماعىندا بولعان ءىرى تاريحي وقيعالاردىڭ پانوراماسى كورىنىس تابادى. اتاپ ايتقاندا، يسلام ءدىنىنىڭ ورتالىق ازياعا تارالۋىندا شەشۋشى ءرول اتقارعان اتلاح شايقاسىنىڭ، تاۋەلسىزدىگىمىزدى ساقتاپ قالۋدا ەرەكشە ورنى بار اڭىراقاي شايقاسىنىڭ جانە قازاق حاندىعىنىڭ العاش تۋى تىگىلگەن قوزىباسىداعى سالتاناتتى ساتتەردىڭ كورىنىستەرى ايشىقتالادى. تەكتۇرماستىڭ ەڭ بيىك شوقىسىنان «اۋليەاتانىڭ» تۇلعالىق ەسكەرتكىشى ورناتىلىپ، ەسكەرتكىشكە اپارار باسپالداقتىڭ ەكى جاعىندا تۇرىك قاعاندارىنىڭ ءاتى-جونى جازىلعان تاس تۇعىرلارى ورناتىلادى،-دەيدى وبلىس اكىمدىگى مادەنيەت، ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىبايەۆ.

راسىندا دا جامبىل وبلىسىندا مادەنيەت سالاسىن دامىتۋ باعىتىندا اتقارىلىپ جاتقان جۇمىستار از ەمەس. مۇنىڭ بارلىعى دا ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىمەن ساباقتاسىپ، جۇرتشىلىقتىڭ يگىلىگىنە باعىتتالۋدا. جۇيەلى جۇمىستاردىڭ الداعى ۋاقىتتا دا جەمىستى جالعاسا بەرەتىندىگىنە سەنىم مول.