ەلىمىزدىڭ استاناسى نۇر-سۇلتان قالاسىندا وتكەن اپتادان بەرى بىرنەشە كۇرەس تۇرلەرىنەن الەم چەمپيوناتى ءوتىپ جاتقانى بەلگىلى. سونىڭ بىرى-گرەك-ريم كۇرەسى. وسى كۇرەس ءتۇرى بويىنشا ۇلتتىق قۇراما ساپىندا مويىنقۇم اۋدانىنىڭ بالۋاندارى دا ەل نامىسىن قورعاۋدا. ونىڭ ءبىرى قارابوگەت اۋىلىنىڭ تۋماسى قورلان قانات ۇلى بولسا، ەكىنشىسى ۇلانبەلدىك اسحات دىنمۇحامەدوۆ دەپ جازادى Qamshy.kz اقپارات اگەنتتىگى.  اتالعان قوس بالۋان دا بۇعان دەيىن الەم، ازيا چەمپيوناتتارىندا جۇلدەلى ورىننان كورىنىپ جۇرگەنىن ەل جاقسى بىلەدى. اسحات وليمپيادا ويىندارىنا دا قاتىسىپ، شەبەرلىگىن شىڭداسا، قورلان ازيانىڭ كۇمىس جۇلدەگەرى.

استانادا ءوتىپ جاتقان الەم چەمپيوناتىندا قورلان قانات ۇلى 55 كەلى سالماقتا بوزكىلەمگە كوتەرىلىپ، اقتىق اينالىمعا دەيىن قارسىلاستارىن قوعاشا جاپىردى. الايدا فينالدا ساتتالىك جولداس بولماي، گرۋزيا ەلىنىڭ بالۋانىنا ەسە جىبەرىپ قويدى. دەسە دە بۇل ءبىز ءۇشىن التىنعا بەرگىسىز جۇلدە. سوندىقتان قورلاننىڭ الاتىن قامالى ءالى الدا دەپ سەنەمىز.

«مەن اقتىق ايقاستا ءسال اسىعىستىق جاسادىم. سونىم دۇرىس بولمادى»-دەدى قورلان جۋرناليستەرگە بەرگەن سۇحباتىندا. الايدا ونىڭ جارتىلاي فينالدا 2018 جىلعى الەم چەمپيونى ازەربايجاندىق بالۋاندى ويسىراتا ۇتقانى ەل ەسىندە قالدى. بالكىم وسى كەزدەسۋدە ول كوپ كۇش جۇمساپ قويدى ما دەگەن ويدا كەلەدى. قورلان ەگىزدىڭ سىڭارى. ونىڭ ەكىنشى سىڭارى باعلان دا كۇرەس سپورتىمەن اينالىسىپ، ۇلكەن جەتىستىكتەرگە جەتىپ جۇرگەن جامپوز.

ال مويىنقۇمدىق ەكىنشى بالۋان اسحات دىنمۇحامەدوۆ بولسا، ازىرگە ءۇش قارسىلاسىن تىزە بۇكتىرىپ، ايدى اسپاننان شىعارىپ وتىر. ول اسىرەسە رەسەي ەلىنىڭ وليمپيادا چەمپيونىن تۇقىرتا ۇتىپ، جەرلەستەرىن ءبىر قۋانتتى. ونىڭ الداعى جەكپە –جەكتەرىندە دە جەڭىسكە جەتىپ، التىن مەدالعا قول جەتكىزۋىن تىلەيمىز. بوز كىلەمدە اسحاتتى تەك جەڭىس تۇعىرىنان كورەيىك.

ءيا، كەيىنگى جىلدارى جامبىلدىق جامپوزدار الەمدىك ەرانالاردا اتوي سالىپ عانا قويماي، تورتكۇل الەمدى تالانتتارىمەن ءتانتى قىلۋدا. اسىرەسە شالعاي اۋىلداردان شىققان جاستار جارىستاردا جاسىنداي جارقىلداپ، جۇزدەن جۇيرىك شىعىپ جاتىر. شىندىعىنا كەلگەندە الىستاعى مويىنقۇم ەلدى مەكەنىندە اۋىلدار بىلاي تۇرسىن، اۋدان ورتالىعىندا جاستاردىڭ سپورتپەن شۇعىلدانۋىنا بارلىق جاسالعان دەي المايسىز. مىنە وسىنداي جايتقا قاراماستان جالىندى جاستارىمىز توپ جارىپ كەلىپ جاتقانى ءسوزسىز قۋانتادى. بۇل جامبىل سپورتىنىڭ جۇلدىزى اركەز جارىق ەكەنىن تاعى ءبىر ايعاقتاپ تۇرعانداي.