ءسۇيىنشى، اعايىن! ءۇندىستان مەملەكەتىنەن اقجولتاي حابار جەتتى. قارشاداي قىزىمىز ەليزات ايازبەك ازيا چەمپيونى اتاندى. سامبودان جالاۋى جەلبىرەگەن دودادا قاراكوزىمىز قارسىلاستارىن قوعاشا جاپىرىپ، سارى قۇرلىق تورىندە ءانۇرانىمىزدى شىرقاتتى دەپ جازادى Qamshy.kz اقپارات اگەنتتىگى. ەليزات 2001 جىلى جامبىل وبلىسى تالاس اۋدانى اققۇم اۋىلىندا دۇنيەگە كەلگەن. بالا كەزىنەن سپورتقا زەرەك وسكەن بولاشاق چەمپيوندى بىلىكتى باپكەر باربول ءجاۋىش سپورتقا باۋلي باستايدى. كەيىننەن ەليزات تاراز قالاسىنداعى №7 بالالار-جاسوسپىرىمدەر سپورت مەكتەبىنە اۋىسىپ، وسىندا شەبەرلىگىن شىڭداي تۇسەدى. حايرۋللا لۋكمانوۆتىڭ تاربيەسىنە كەلگەن قاراكوزىمىز ۇستىمىزدەگى جىلى اقتوبە قالاسىندا جاسوسپىرىمدەر اراسىندا وتكەن الاماندا توپ جارادى. ەندى مىنە ءۇندىستان مەملەكەتىنىڭ نيۋ-دەلي قالاسىندا تۇندىگىن تۇرگەن بايراقتى باسەكەدە ايى وڭىنا تۋىپ، ازيا چەمپيونى اتانىپ وتىر.

تارازدىق سپورتسۇيەر قاۋىم ءۇندىستاننىڭ نيۋ-دەلي قالاسىندا سامبودان وتكەن ازيا چەمپيوناتىندا التىننان القا تاققان ەليزات ايازبەكتى زور قوشەمەتپەن قارسى الدى. بۇل كۇنى قاراپايىم عانا اۋىلدىڭ سپورت مەكتەبىندە جاتتىعىپ، سارى قۇرلىق بىرىنشىلىگىندە جەڭىس تۇعىرىنان كورىنگەن ەليزاتقا جانكۇيەرلەرىمەن بىرگە ءوزى ءبىلىم الاتىن ەرجان امىربەك ۇلى باستاعان تاراز مەملەكەتتىك پەداگوگيكالىق ۋنيۆەرسيتەتى مەن №7 وبلىستىق بالالار مەن جاسوسپىرىمدەر سپورت مەكتەبىنىڭ ۇجىمى دا قۇرمەت كورسەتتى.

14 جاسىنان باستاپ تالاس اۋدانىنىڭ اققۇم اۋىلىندا جاتتىعىپ ازيا چەمپيونى اتانعان ارۋدى سامبونىڭ قىر-سىرىنا بوستاندىق بالالار مەن جوسپىرىمدەر سپورت مەكتەبىنىڭ جاتتىقتىرۋشىسى باربول ءجاۋىشوۆ باۋلىعان.

–ەليزاتتىڭ سپورتقا قارىم-قابىلەتىن بالا كۇنىنەن بايقاعام. كەيىن اتا-اناسىنان سامبو ۇيىرمەسىنە قاتىسۋىنا رۇقسات سۇرادىم. العاشىندا اناسى قارسى بولدى. كەيىننەن ەليزاتتىڭ بويىنداعى بۇلا كۇشتىڭ سپورتتا جەتىستىككە باستايتىندىعىنا كوز جەتكىزدى. ول مەكتەپتە وقىپ ءجۇرىپ بىرنەشە رەت رەسپۋبليكا بىرىنشىلىكتەرىندە توپ جاردى، –دەيدى ب.ءجاۋىشوۆ.

ال ەليزاتتىڭ ءوزى ءۇندىستان جەرىندەگى سايىستا ەلدە قالىپ تاقىمىن قىسقان اتا-اناسىنىڭ، باۋىرلارىنىڭ جالپى جانكۇيەرلەرىنىڭ قولداۋىن سەزگەنىن ايتادى.

–ارينە ازيانىڭ 15 مەملەكەتىنەن چەمپيون اتانۋعا ءۇمىتتى ەڭ مىقتى سپورتشىلار كەلگەن سايىستا قارسىلاستىڭ قاي-قايسىسىدا وسال ەمەس. ونىڭ ۇستىنە ءا دەگەننەن مەن سامبو سپورتىنان ازيادا ۇزدىك سانالاتىن وزبەك، قىرعىز سپورتشىلارىمەن بەلدەستىم. ماعان ءۇمىت ارتقان ەلىمنىڭ قولداۋىنا ارقا ءسۇيىپ بارلىق بەلدەسۋلەرىمدە قارسىلاستارىمنان باسىم ءتۇستىم،–دەيدى ەليزات ايازبەك.

اۋىلدان شىققان ازيا چەمپيونىنىڭ ەندىگى مۇراتى كەلەسى ايدا وزبەكستاندا الەم چەمپيوناتىندا ولجا سالۋ بولىپ وتىر. ول بۇل ەندىگى كەزەكتە جاتتىعۋ جۇمىستارىن تاراز قالاسىنداعى №7 وبلىستىق بالالار مەن

جاسوسپىرىمدەر سپورت مەكتەبىنىڭ جاتتىقتىرۋشىلارىمەن جۇرگىزبەك. سونداي-اق باپكەرلەرى ەليزاتتىڭ ءوز باعىن وليمپيادالىق سپورت سانالاتىن دزيۋدودا سىناپ كورۋگە نيەتتى ەكەندىگىن اتاپ ءوتتى.

مەملەكەت ماقتانىشىن تولايىم تابىسىمەن شىن جۇرەكتەن قۇتتىقتايمىز! الار اسۋىڭ بيىك بولسىن، ەليزات!