ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان «جاڭا گۋمانيتارلىق ءبىلىم: قازاق تىلىندەگى 100 جاڭا وقۋلىق» جوباسى اياسىندا اۋدارىلعان ءدىنتانۋشىلاردىڭ ەڭبەكتەرى جامبىل وبلىسىنداعى ءدىن سالاسى ماماندارىنىڭ كومەكشى قۇرالىنا اينالىپ كەلەدى، دەپ جازادى Qamshy.kz اقپارات اگەنتتىگى. 

ەلباسى ماقالاسىنان تۋىنداعان مىندەتتى ىسكە اسىرۋ ماقساتىندا قولعا الىنعان جوبا اياسىندا قازاق تىلىنە اۋدارىلعان ۇلىبريتانيالىق ءدىنتانۋشى كارەن ارمسترونگتىڭ «يدۋايزم، حريستاندىق پەن يسلامداعى 4000 جىلدىق ىزدەنىس: قۇداي تانۋ بايانى» كىتابى الەم مويىنداعان تۋىندى سانالادى. سوندىقتان بۇل كىتاپ قازاق تىلىمەن بىرگە الەمنىڭ 30-دان استام تىلىنە اۋدارىلىپ، ميلليونداعان تارالىممەن باسىلىپ شىققان. كارەن ارمسترونگتىڭ بۇل كىتابى ءقازىر الەمگە ايگىلى براۋن، كورنەل، يەل، گارۆارد، كولۋمبيا، دارتمۋت، م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتتەرىندە وقۋلىق رەتىن كادەگە جاراۋدا.

–بۇل كىتاپتا اۆتور قۇدايعا سەنۋ، جاراتۋشى تۋرالى كوزقاراستىڭ وزگەرۋى، الەمدىك دىندەردەگى جاراتۋشىنى تانۋ سيپاتتارى سىندى ماسەلەلەر جايىندا ءسوز قوزعايدى. سونداي-اق دىندەردىڭ قالىپتاسۋ تاريحى جايلى دا تولىق مالىمەتتەر قامتىلعان.

شىندىعىندا بۇل كىتاپتىڭ جارىق كورۋى قازاقستانداعى ءدىنتانۋ عىلىمى ءۇشىن ايتۋلى جاڭالىق. سايكەسىنشە كارەن ارمسترونگتىڭ «يدۋايزم، حريستاندىق پەن يسلامداعى 4000 جىلدىق ىزدەنىس: قۇداي تانۋ بايانى» كىتابىن ءدىن سالاسىندا ەڭبەك ەتەتىن جاستار، ءدال وسى سالاعا ماماندانىپ جۇرگەن ستۋدەنتتەر، عالىمدار مەن وقۋشىلاردىڭ ۇستەل كىتابىنا اينالىپ ۇلگەردى. سول سەبەپتەن دە «جاڭا گۋمانيتارلىق ءبىلىم: قازاق تىلىندەگى 100 جاڭا وقۋلىق» جوباسى قوعامدىق سانانى جاڭعىرتۋ، قازاق ءتىلىن عىلىم تىلىنە اينالدىرۋعا زور سەپتىگىن تيگىزەدى دەپ بىلەمىن،–دەيدى وبلىس اكىمدىگىنىڭ ءدىن ىستەرى باسقارماسىنىڭ باس مامانى ەلنۇر اسكەن ۇلى.

ايتا كەتۋ كەرەك، قولعا الىنعان ەكى جىل ىشىندە الەم ويشىلدارىنىڭ 19 كىتابى قازاق تىلىنە اۋدارىلدى. ءبىزدىڭ وبلىسقا بۇگىنگى كۇنگە قازاق تىلىنە اۋدارىلعان 19 كىتاپتىڭ 7000 داناسى كەلگەن. ءوز كەزەگىندە بۇل تۋىندىلار ءارتۇرلى سالادا ەڭبەك ەتىپ جۇرگەن، ءبىلىم الۋ جولىندا جۇرگەن جاستار ءۇشىن پايدالى ادەبيەتكە اينالعان. ال جوبا اياسىندا ءدىنتانۋشى-عالىمداردىڭ ەڭبەگى شىن مانىندە قازاقستانداعى قازىرگى ءدىني احۋالدى جان-جاقتى زەردەلەۋگە مۇمكىندىك بەرمەك.