ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى قوعام ءومىرىنىڭ بارلىق سالاسىمەن بىرگە ءبىلىم بەرۋ ىسىنە دە سونى سەرپىن اكەلگەنى جاسىرىن ەمەس. بۇگىندە جامبىلدىق وقۋشىلار ەلباسى ماقالاسىنان تۋىنداعان «تۋعان ەل»، «تۋعان جەر» جوبالارى اياسىندا «ولكەتانۋ.جامبىل وبلىسى» كۋرسىن وقىپ، «ءوز جەرىڭدى تانى» تۋريستىك ەكسكۋرسيالارىنا قاتىسۋدا ، دەپ جازادى Qamshy.kz اقپارات اگەنتتىگى. 

جاھاندانۋ زامانى جاستارىن پاتريوتيزمگە باۋلۋدىڭ بىردەن ءبىر تەتىگى ەلباسى ماقالاسىنان تۋىنداعان «تۋعان ەل»، «تۋعان جەر» باعدارلامالارىن ناتيجەلى ىسكە اسىرۋ ەكەنى بەلگىلى. سايكەسىنشە بۇل جوبالاردى ءبىلىم بەرۋ ىسىندە قولدانۋ ۇرپاق ساناسىندا تۋعان ەل مەن جەرگە دەگەن سۇيىسپەنشىلىك سەزىمىن دارىتۋدىڭ جارقىن كورىنىسى بولماق.

–وتكەن جىلى وبلىس مەكتەپتەرىندە وقيتىن 5-7 سىنىپتار ءۇشىن قازاقستان تاريحى، قازاق ادەبيەتى، گەوگرافيا، مۋزىكا پاندەرىن تولىقتىراتىن «ولكەتانۋ. جامبىل وبلىسى» وقۋلىعى ازىرلەندى. سايكەسىنشە 2018-2019 وقۋ جىلىنىڭ ءىىى توقسانىن باستاپ بۇل وقۋلىقپەن ءوڭىر مەكتەپتەرىنىڭ 5،6،7 سىنىپتارىندا ءبىلىم الاتىن 66 582 وقۋشى قامتىلدى، –دەيدى وبلىس اكىمدىگىنىڭ ءبىلىم باسقارماسىنىڭ باسشىسى راحيا تۇرماعانبەتوۆا.

ءبىلىم باسقارماسىنىڭ باسشىسى ءوز سوزىندە وقۋشىلارعا تۋعان ولكە تاريحىن تانىتۋدا مۇراجايلار مەن مادەني-تاريحي ورىندارعا ەكسكۋرسيالار ۇيىمداستىرىلىپ جاتقاندىعىن دا تىلگە تيەك ەتتى.

–«ءوز جەرىڭدى تانىپ ءبىل» جوباسى اياسىندا بيىل 65 900 بالاعا تۋريستىك ەكسكۋرسيالار ۇيىمداستىرىلدى. جازعى ماۋسىمدا بۇل كورسەتكىش 81 مىڭعا دەيىن ۇلعايادى. وسىناۋ شارالارعا كوللەدج وقىتۋشىلارى مەن وقىتۋشىلارى دا بەلسەنە قاتىسۋدا. اتاپ ايتساق، ءبىلىم سالاسىندا «رۋحاني جاڭعىرۋ» باعدارلامالىق ماقالاسىنان تۋىنداعان مىندەتتەرىن ىسكە اسىرۋعا 339 098 مەكتەپ وقۋشىسى مەن كوللەدج ستۋدەنتتەرىن قامتىماق،–دەيدى راحيا سەيىتبەك قىزى.

مۇنان بولەك وبلىس مەكتەپتەرى مەن ارناۋلى ورتا ءبىلىم بەرۋ ۇيىمدارىندا «Oqy، tap» ونلاين بايقاۋى دا وتكىزىلدى. www.oqy،tap.kz سايتىندا ءۇش كەزەڭ بويىنشا ۇيىمداستىرىلعان بايقاۋعا 3 مىڭعا جۋىق وقۋشى نيەت بىلدىرگەن. ءۇش كەزەڭنەن تۇرعان سىننان ولاردىڭ جەتەۋى ۇزدىك شىعىپ، «بالداۋرەن» ساۋىقتىرۋ ورتالىعىنا دەمالىس جولداماسىن جەڭىپ الدى. سول سەكىلدى بەينە-چەللەندج بايقاۋلارى دا وقۋشىلاردىڭ تۋعان ولكە تاريحىنا قىزىعۋشىلىعىن ارتتىرىپ، ونىڭ قادىر-قاسيەتىن باعالاي بىلۋگە شاقىردى.