جامبىل وبلىسىندا ەلباسىنىڭ «ۇلى دالانىڭ جەتى قىرى» باعدارلامالىق ماقالاسى اياسىندا مادەنيەت سالاسىندا ءبىرقاتار اۋقىمدى جوبالار قولعا الىنىپ، ءوز ناتيجەسىن بەرۋدە. اتاپ ايتقاندا، ەلباسى ايتقان كينويندۋسترياسىن دامىتۋ ىسىنە ەرەكشە ءمان بەرىلدى. وتكەن جىلى وڭىردە جاس رەجيسسەر ەلجان جارمۇحامەدوۆتىڭ «ساعىم» ءفيلمى كوپشىلىكتىڭ كوز ايىمىنا اينالسا، الداعى ۋاقىتتا «ابسەنت» دەپ اتالاتىن جاڭا تۋىندىنىڭ ءتۇسىرىلىم جۇمىستارى قولعا الىناتىن بولادى، دەپ جازادى Qamshy.kz اقپارات اگەنتتىگى. 

1960 جىلى يتاليانىڭ ريم قالاسىندا وتكەن حVII جازعى وليمپياداسىندا التىن مەدال يەلەنگەن ابسەنتتىڭ اتى سول كەزدە كەڭەس وداعىندا دۇركىرەپ تۇردى. اراعا ءتورت جىل سالىپ توكيو وليمپياداسىندا كۇمىس مەدال ەنشىلەگەن ابسەنت شىن مانىندە الەمدىك ات سپورت تاريحىندا اڭىز بولىپ بولعان تۇلپار. ال بۇل تۇلپار 1952 جىلى جامبىل وبلىسىنداعى لۋگوۆوي اسىل تۇقىمدى زاۋىتىن مال زاۋىتىندا دۇنيەگە كەلگەن. ونى بايگەگە ءدال وسى زاۋىت ماماندارى باپتاعان. ابسەنتتى بالا كۇنىنەن تانىپ باپتاعان جاننىڭ ءبىرى كارىم اسەنوۆ ەسىمدى ۇلى وتان سوعىسىنىڭ ارداگەرى ەدى. مايدان دالاسىندا اتتى اسكەر ساپىندا ءجۇرىپ ءوتىپ، پولك كومانديرىنىڭ ورىنباسارلىعىنا دەيىن كوتەرىلگەن مايدانگەر سوعىستان سوڭ سانالى عۇمىرىن ات باپتاۋعا ارنايدى.

سول سەكىلدى تانىمال جۋرناليست قالىبەك اتجان جازعان «ابسەنت» ماقالاسىندا دا اتى جەر جۇزىنە تانىلعان تۇلپار جايىنداعى ءبىرقاتار تىڭ دەرەكتەر كەلتىرىلگەن. ماقالا تانىمال تۇلپاردى باپتاعان موداش امىرەيەۆ ەسىمدى اقساقالدىڭ سۇقبات تۇرىندە ءوربيدى. وندا اقساقال ابسەنتتىڭ ارعى تەگىنەن باستاپ كىندىگىنەن تاراعان ۇرپاقتارىنىڭ تاعدىرىنا دەيىن ءبىرشاما قۇندى دەرەكتەردى تىلىنە تيەك ەتەدى.

«اقالتەكە اتالاتىن جىلقى تۇقىمىنى اتاعى الىسقا كەتۋi بويناۋ اتتى باستاۋ الادى. مىنە ءدال وسى بويناۋ احالتەكە تۇقىمداس جىلقىلاردىڭ اتاسى سانالادى. ابسەنت بويناۋدىڭ ءتورتىنشى ۇرپاعى. ال بۇل اقالتەكەلەردىڭ توزىمدىلىگىمەن شىدامدىلىعىنا كەڭەس وداعى باسشىلارىنىڭ كوز جەتكىزۋىنىڭ وزىندىك سىرى بار. 1935 جىلى 34 اقالتەكەنى تاقىمعا باسقان شاباندوزدار اشحاباتتان ماسكەۋگە دەيىنگى 4 مىڭ 300 شاقىرىمدى اتپەن ءجۇرىپ وتكەن. مىنە وسى جورىقتا كوزگە تۇسكەن «اراب» سايگۇلىگىنەن ابسەنت دۇنيەگە كەلدى. وسى سايگىۇلىكتى مارشال سەمەن بۋدەننىي №49 اۋليەاتا جىلقى زاۋىتىنا سىعا تارتقان. كەيىن بۇل جىلقى زاۋىتى جابىلىپ ونىڭ بۇكىل بازاسى لۋگاۆوي اسىل تۇقىمدى زاۋىتىنا كوشىرىلدى. مىنە ابسەنتتىڭ تاريحى وسى جەردەن باستالدى» دەيدى اقساقالعا ءوز سۇقباتىندا.

تاعى ءبىر مالىمەتتەردە ابسەنتتىڭ كىندىگىنەن تاراعان 70-كە جۋىق قۇلىننىڭ ىشىندە اباقان، ايدار ەسىمدى تۇلپارلاردىڭ بولعاندىعى داي ايتىلادى.

فيلمدە ءدال وسى دەرەكتەر پايدالانىلسا ونىڭ مازمۇنى مەيلىنشە بايي تۇسەر ەدى.