ەلباسى نۇرسۇلتان ءابىش ۇلى نازاربايەۆتىڭ «ۇلى دالانىڭ جەتى قىرى» ماقالاسىندا «تاريحتىڭ كينو ونەرى مەن تەليەۆيزياداعى كورىنىسى» تاراۋى وتاندىق كينويندۋسترياسى ءۇشىن سونى مۇمكىندىكتەر بەرۋدىڭ باستاماسى بولعانى ايان. سوندىقتان ەندىگى كەزەكتە ەل تاريحىنان سىر شەرتەتىن تانىمدى دەرەكتى فيلمدەر، تەليەۆيزيالىق سەريالدار، كوركەم فيلمدەر كينوسۇيەر قاۋىمنىڭ كوز ايىمىنا اينالماق. بۇل باعىتتا جامبىل وبلىستىق كينو ورتالىعىمەن جاسالىنعان جۇمىس جۇيەلى، دەپ جازادى Qamshy.kz اقپارات اگەنتتىگى. 

شىنتۋايىندا سايىن دالا توسىندە تاۋەلسىزدىك پەن ازاتتىق ءۇشىن بولعان كۇرەستىڭ كەز كەلگەن قاھارمانى، ولار جايىندا ايتىلاتىن اڭىز اڭگىمەلەر تالاي كينوتۋىندىنىڭ سيۋجەتىنە اينالا الادى. وعان قوسا كينو تەك تاريحتى تانىتىپ قانا قويماي ونى الەمگە ايان ەتىپ، تۋريستەردى تارتۋدىڭ قۇرالىنا اينالۋى دا زاڭدىلىق. بۇل ورايدا تالاي تاريحي-مادەني ورىندارىمەن اڭىزعا اينالعان كيەلى ورىندارىمەن تانىمال اۋليەاتا وڭىرىندە تالاي شەديەۆرگە ارقاۋ بولارلىق دۇنيەلەر جەتەرلىك. ءارى بۇل جوبانى جۇزەگە اسىرۋدان وبلىستىق كينو ورتالىعى ايانىپ قالمايدى.

–ەلباسىنىڭ «ۇلى دالانىڭ جەتى قىرى» ماقالاسىنان تۋىنداعان مىندەتتەردى جۇزەگە اسىرۋدىڭ ارنايى جوسپارى جاسالىنعان. ول جوسپارعا ءتيىستى قاراجات كوزى قاراستىرىلعانشا ورتالىق ماماندارىنىڭ كۇشىمەن «قىزعالداقتار» دەپ اتالاتىن شاعىن كوركەمفيلم تۇسىردىك. ءقازىر بۇل بەينەتۋىندى مونتاجدالۋ ۇستىندە. بۇل كينوكارتينادا قىزعالداقتىڭ ءوڭىرىمىزدىڭ سيمۆولى رەتىندە رولىنە ايرىقشا باسىمدىق بەرىلدى. فيلمدەگى العاشقى ديالوگتىڭ ءوزى كورەرمەندى تارتىپ كەتەدى. تۋىندى جاقىن ارادا كينوسۇيەر قاۋىمنىڭ نازارىنا ۇسىنىلادى.

جالپى وبلىستىق كيون ورتالىعى ءوز مارتەبەسىن 2012 جىلى الدى. العاشىندا بۇل قۇرىلىم بەينەقورداعى تۋىندىلاردى كوپشىلىك نازارىنا ۇسىنۋمەن عانا اينالىسىپ كەلدى. ال 2017 جىلدان باستاپ شاعىن روليكتەردى ءتۇسىرۋ جۇمىستارىن قولعا الدىق.سودان بەرگى ەكى جىلدا سان ءتۇرلى الەۋمەتتىك ماسەلەنى قاۋزايتىن 40 روليك كورەرمەندەرگە ۇسىنىلدى. سونىمەن قاتار قورىمىزدا 2 قىسقا مەتراجدى كوركەم فيلم، 1 تولىق مەتراجدى كينو بار، – دەيدى وبلىس اكىمدىگى مادەنيەت، ارحيۆتەر جانە قۇجاتتاما باسقارماسىنا قاراستى وبلىستىق كينو ورتالىعىنىڭ باسشىسى سايلاۋ لەسبايەۆ.

قازىرگى تاڭدا ورتالىقتىڭ شىعارماشىلىق ۇجىمى ءوڭىر باسشىسىنىڭ تاپسىرماسىمەن وبلىستىڭ 80 جىلدىق مەرەيتويىنا وراي دەرەكتى فيلم تۇسىرۋگە جۇمىلدىرىلعان.