ەلباسىنىڭ «بولاشاققا باعدار:رۋحاني جاڭعىرۋ»، «ۇلى دالانىڭ جەتى قىرى» باعدارلامالىق ماقالالارى وبلىستىڭ مادەنيەت سالاسىنىڭ دامۋىنا تىڭ سەرپىن بەردى.اعىمداعى جىلى وبلىس اكىمىنىڭ قولداۋىمەن 6 جاڭا جوبا جۇزەگە اسىرىلىپ جاتىر، دەپ جازادى Qamshy.kz اقپارات اگەنتتىگى. 

وبلىس اكىمدىگىنىڭ مادەنيەت، ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىبايەۆتىڭ ايتۋىنشا ەلباسىنىڭ باعدارلامالىق ماقالالارى مادەنيەت سالاسىن ىلگەرىلەتۋ ىسىنە سەرپىن بەرگەن.

–بيىل مادەنيەت سالاسىندا 6 جاڭا جوبانى جۇزەگە اسىرۋ كوزدەلگەن. ناتيجەسىندە وسى كۇنگە دەيىن ءبىرقاتار جوبالاردى جوعارى دەڭگەيدە اتقارىپ شىقتىق. اتاپ ايتار بولساق، «جامبىل – مەنىڭ جاي اتىم، حالىق مەنىڭ –شىن اتىم» رەسپۋبليكالىق اقىندار ايتىسى جاڭا سيپاتتا جالعاسىن تاپتى. رەسپۋبليكالىق ايتىستا ءوڭىر نامىسىن قورعايتىن اقىندار اۋىلدىق، اۋداندىق ىرىكتەۋدەن وتكىزىلدى. بۇل جىر دوداسىنا قاتىسقان 31 اقىن وبلىستىق ايتىسقا جولداما الدى. وبلىستىق ايتىستا وزگەلەردەن وزا شاپقان 8 ايتىسكەر ءوڭىر نامىسىن ءسوز سايىسىندا جوعارى دەڭگەيدە قورعاي ءبىلدى،–دەدى باسقارما باسشىسى.

ءوز سوزىندە دۇيسەنالى دىبىسالى ۇلى «اۋليەاتا بوياۋلارى»، «كونە تاراز كۇمبىرى» جوبالارىنىڭ ناتيجەلىگىن تىلگە تيەك ەتتى.

–«اۋليەاتا بوياۋلارى» ءبىرىنشى حالىق شىعارماشىلىق فەستيۆالىندە 300 سۋرەتشى مەن ءفوتوتىلشىنىڭ البومدارى سارالاندى. ەڭ ۇزدىك 80 جۇمىس «شاحريستان» مادەني-تاريحي ورتالىعىنداعى كورمە زالىنا قويىلادى. «كونە تاراز كۇمبىرى» جاڭا جوبانىڭ وبلىستىق ىرىكتەۋى وتكىزىلدى. ىرىكتەۋدەن ۇزدىك شىققان 6 فولكلورلىق انسامبل رەسپۋبليكالىق كەزەڭدە ب ا ق سىنادى. اتالعان ونەر ۇجىمدارىنا ءقازىردىڭ وزىندە برازيليا، مالايزيا مەملەكەتتەرى ارنايى شاقىرتۋ جاسادى،–دەيدى باسقارما باسشىسى.

ەلباسىنىڭ قوعام ساناسىن رۋحاني جاڭعىرتۋ، قوعام ساناسىنا سىلكىنىس اكەلۋدى ماقسات ەتكەن ماقالالارىنان تۋىنداعان مىندەتتەردى جۇزەگە اسىرۋدا مادەنيەت سالاسىنا زور جاۋاپكەرشىلىك ارتىلعان. ءدال وسى سەنىمنىڭ ۇدەسىنەن شىعۋدا جامبىلداعى مادەنيەت سالاسىندا «عيبراتتى ونەر كەرۋەنى»، «تالاس تولقىندارى»، «تاراز سيمفونياسى» فەستيۆالدەرى ۇيىمداستىرىلعان. ال وبلىستىڭ 80 جىلدىق مەرەيتويىنا وراي «تاراز مۇرالارى» سەرياسىمەن كوپ تومدىق كىتاپتار باسپاعا ازىرلەنۋدە. اتالعان كوپ تومدىقتى مالىمەتتەرمەن تولىقتىرۋ جۇمىستارىنا «تاريحي تانىمدىق عىلىمي-زەرتتەۋ»، «حالىق شىعارماشىلىعى» توپتارى جۇمىس جاساپ جاتىر.