جامبىل وڭىرىندە حالىق كيە تۇتىپ، كيەلى دەپ سانايتىن ورىندار از ەمەس. سونىڭ ءبىرى تۇرار رىسقۇلوۆ اۋدانىنداعى اقىرتوبە اۋىلى ماڭىنداعى توپاعاش دەپ اتالاتىن جەر. جەرگىلىكتى تۇرعىندار بۇل جەردە ايگىلى بايدىبەك ءبيدىڭ بايبىشەسى بولعان دومالاق انا ورنەك توقىعانىن ايتادى. سونداي-اق جاقىن ماڭداعى «سۇمقايتتى» جەرىن قازاقتار جوڭعارلاردى ويسىراتا جەڭگەن، دەپ جازادى Qamshy.kz اقپارات اگەنتتىگى. 

ەلباسى ءوزىنىڭ «بولاشاققا باعدار: رۋحاني جاڭعىرۋ» ماقالاسىندا قوعام ساناسىنداعى جاڭعىرۋدىڭ، قازاقتى قۇرمەتتەۋدىڭ ەڭ اۋەلى ولكەنىڭ تاريحىن تانۋدان باستالاتىندىعىن جازادى. راسىندا بۇگىنگى ۇرپاق ولكەنىڭ تاريحىنا جەتىك بولۋ ارقىلى عانا بابالار اماناتىنا ادالدىق تانىتا الماق. سول سەكىلدى باتىرلار مەن اۋليە انانىڭ ءىزى قالعان توپاعاش جەرى تۋراسىندا ادام ايتسا نانعىسىز اڭىز-اڭگىمەلەر وتە كوپ.

–ونىڭ بىرىندە بۇل ماڭدا اتاقتى ماقتىم اعزام قوجانىڭ نەمەرەسى نۇريلانىڭ ورنەك توقىعانى ايتىلادى. سونداي-اق بۇل وسى ماڭعا تاياۋ جەردە ورنالاسقان سۇمقايتتى جەرىندە بوگەنباي باتىر باستاعان قازاق قولى جاۋدىڭ بەتىن قايتارعان كورىنەدى. وسى ءبىر كەسكىلەسكەن شايقاستا كوز جۇمعان باتىرلاردىڭ دەنەسى دە وسى ماڭدا جەر قوينىنا تاپسىرىلىپتى، –دەيدى توپاعاش جايىندا شىراقشى عالىمجان ۇزاقبايەۆ.

شىراقشىنىڭ ايتۋىنشا بۇل جەرگە ءتاۋ ەتە كەلگەندەر ەڭ اۋەلى قۇدىقتان سۋ ءىشىپ، توپتانا وسكەن اعاشتاردىڭ تۇبىندە تۇرىپ تىلەك تىلەيدى ەكەن. ءدال وسى توپتانا وسكەن اعاشتاردىڭ جاپىراقتارىنىڭ ءار ءتۇرلى بولۋى دا بۇل جەردىڭ كيەلىلىگىن اڭعارتىپ تۇر. ءتىپتى توپاعاشتا توعىز ەمدىك قاسيەتى بار تاس، ءۇش تاي، ءۇش قاسقىر، ءۇش ۇكى، ءۇش اق جىلان، ەكى ەلىك بولعاندىعى دا ايتىلادى. توپ اعاش دەگەن اتاۋى دا مۇندا اعاشتاردىڭ توپتانا وسۋىنە بولا ايتىلعان. شىراقشى عالىمجان ۇزاقبايەۆ بۇل اعاشتاردىڭ و دۇنيەلىك بولعان كىسىلەردىڭ مۇردەسىنەن ءوسىپ شىققانىن تىلگە تيەك ەتەدى. ءتىپتى بۇل قاسيەتتى ورىنعا كەلگەندەر بۇل ورىنعا قاتىستى تىلسىم دەرەكتەردى جالىقپاي ايتۋعا ءازىر. ولاردىڭ ءبىرى مۇندا ءوز قولىمەن تۇسىرىلگەن فوتو سۋرەتتە ناماز وقىپ تۇرعان كىسى سۇلباسى انىق كورىنىپ تۇرعانىنا نازار اۋدارادى.

جەرگىلىكتى تۇرعىندار بار تىلسىم سىرىن ىشىنە بۇككەن وسىناۋ ورىندا جان-جاقتى عىلىمي زەرتتەۋ جۇمىستارى جۇرگىزىلىپ، بۇل ورىننىڭ دومالاق اناعا قاتىستىلىعى ناقتىلانسا دەگەن ۇسىنىستارىن ايتادى.