ادامزات وركەنيەتىندەگى عىلىمي-تەحنيكالىق پروگرەستىڭ العىشارتى مەتالل ءوندىرۋ بولدى. مەتالل وندىرۋمەن ادامزات جىلقىنى قولعا ۇيرەتتى، قۇرال-سايماندار جاساپ ەگىن شارۋاشىلىعىنا دەن قويدى. قارۋ-جاراقتىڭ جاڭا تۇرلەرىن پايدالانۋ ارقىلى اڭشىلىق مەيلىنشە تابىستى بولا باستادى. بۇل جايىندا ەلباسى «ۇلى دالانىڭ جەتى قىرى» ماقالاسىندا مازمۇندى بايانداعان. سايكەسىنشە، قازاقستاندا ەڭ العاشقى ادامداردىڭ ءىزى قالعان جامبىل وڭىرىندە دە ەجەلگى مەتاللۋرگيانىڭ دامىعانىن انىق اڭعارۋعا بولاتىن قۇندى جادىگەرلەر تابىلعان، دەپ جازادى Qamshy.kz اقپارات اگەنتتىگى.
ەلباسى ماقالاسىندا ايتىلعانداي جامبىل وبلىسى اۋماعىندا دا تاۋ-كەن ءوندىرىسىنىڭ وشاقتارى پايدا بولدى. ءتۇرلى مەتالل قورىتپالارىنان جاسالعان تۇرمىستىق زاتتارى مەن قارۋ-جاراقتارىنىڭ تابىلۋ اتا-بابالارىمىزدىڭ مەتاللۋرگيادان حابارى بولعانىن بىلدىرەدى. تاريحشى عالىمدار جامبىل جەرىندە مەتاللۋرگيا ءوندىرىسى قولا داۋىرىندە كەڭىنەن قانات جاياعانىن مالىمدەيدى.
–وڭىرىمىزدەگى شۋ وزەنى القابىندا، حانتاۋىنىڭ ەتەگى، شاتىركول ايماعى، قولا داۋىرىنەن باستاپ مەتاللۋرگيا ءوندىرىسى دامىعان. ەڭ العاشقى كەن ورىندارى دا وسى ايماقتاردا اشىلعان. ارحەولوگ-عالىم مارياشيەۆ اتالعان كەن ورىندارىندا بولىپ وبلىستاعى مەتاللۋرگيا تاريحى قولا داۋىرىنەن باستاۋ الاتىندىعىن عىلىمي تۇرعىدان دالەلدەپ بەردى. بۇل مالىمەتتى تاريحشى عالىم كارل بايپاقوۆ تا راستادى. كۇنى بۇگىنگە دەيىن وسى ماڭداعى شاتىركول ايماعىنان مىس وندىرىلەدى.
قولا داۋىرىنەن سوڭ ادامزاتتىڭ تەمىردى يگەرۋىمەن باستالعان ەرتە تەمىر داۋىرىندە دە جامبىل وبلىسىندا مەتاللۋرگيا جاقسى دامىدى. بۇعان جەتىتوبە مەن بەرىكقارا وبالى قورىمدارىنداعى زيراتتار مەن وبالارداعى ساپالى وڭدەلگەن تەمىر بۇيىمدارى مىسال بولا الادى. ءتىپتى بەرىكقارا وبالى قورىمىندا جۇرگىزىلگەن ارحەولوگيالىق عىلىمي زەرتتەۋ جۇمىستارى كەزىندە تابىلعان جادىگەرلەر ءقازىر رەسەيدىڭ سانكت-پەتەربۋرگ قالاسىنداعى ەرميتاجدا تۇر، –دەيدى ارحەولوگ-عالىم ساۋران قالييەۆ.
عالىمنىڭ ايتۋىنشا بەرىكقارادان تابىلعان ەر ادامنىڭ بەلبەۋىندەگى قاپسىرمالار تولىعىمەن اڭ ستيلىندە جاسالعان. ماسەلەن ارنايى ۇلكەيتكىش قۇرالدارمەن قاراعاندا وندا بۇعى بەينەسى بايقالعان.
جامبىل وبلىسىنداعى ەجەلگى مەتاللۋرگيانىڭ ورتالىعى رەتىندە تاراز قالاسىنىڭ ماڭىندا تالاس وزەنىنىڭ جوعارعى اعىسىندا ورنالاسقان جىكىل قالاسىنىڭ اتى كوپ اتالادى. الايدا بۇل قالا عىلىمعا بەلگىسىز كۇيدە قالدى. ويتكەنى بۇل قالا ورنىنا كەيىننەن كيروۆ سۋ قويماسى سالىنىپ كەتتى.
پىكىر قالدىرۋ