«ءورت قاۋىپسىزدىك ايلىعى» اياسىندا تاراز قالاسى توتەنشە جاعدايلار باسقارماسىنىڭ جانە جامبىل وبلىسى «ءورت ءسوندىرۋ جانە اۆاريالىق قۇتقارۋ قىزمەتى» مەكەمەسىنىڭ قىزمەتكەرلەرى بىرلەسە وتىرىپ بارلىق ءبىلىم بەرۋ مەكەمەلەرىندە ورتكە قارسى وبەكتىلەردى قورعاۋ دەڭگەيىن ارتتىرۋ جانە ءورت ءسوندىرۋ-قۇتقارۋ ءىسىن تانىمال ەتۋ بويىنشا پروفيلاكتيكالىق جۇمىستارىن جۇرگىزۋدە.
وسىعان بايلانىستى قالالىق №1 ماماندادىرىلعان ءورت ءسوندىرۋ ءبولىمى جانە №4 ءورت ءسوندىرۋ بولىمىندە مەكتەپتەردىڭ 9-10 سىنىپ وقۋشىلارى ءۇشىن «اشىق ەسىك» كۇنىن ۇيىمداستىردى. توتەنشە جاعدايلار قىزمەتكەرلەرىنىڭ شارا بارىسىندا بالالاردى شتاتتان تىس جاعدايلاردا دۇرىس ءجۇرىس-تۇرىس پەن ءورت قاۋىپسىزدىگى ەرەجەلەرىنە ۇيرەتتى.
ءورت سوندىرۋشىلەر بالالارعا مەكتەپتە جانە تۇرمىستا ءورت شىققان كەزدەگى قاۋىپسىزدىك شارالارى تۋرالى ايتىپ بەردى، 112 شۇعىل قىزمەتتەردىڭ ءبىرىڭعاي شاقىرۋ ءنومىرى، 101 ءورت ءسوندىرۋ قىزمەتىنىڭ ءنومىرى تۋرالى ايتتى. سونداي-اق، ءورت سوندىرۋشىلەر قالانىڭ ءورت ءسوندىرۋ قىزمەتىنىڭ تاريحىنا توقتالدى.
مۇنداي شارا تاراز قالالىق №1، №15 مامانداندىرىلعان ءورت ءسوندىرۋ ءبولىمىنىڭ جانە №4 ءورت ءسوندىرۋ ءبولىمىنىڭ اۋماقتارىندا دا وتكىزىلدى. اتالعان شارا بارىسىندا جامبىل وبلىسى توتەنشە جاعدايلار دەپارتامەنتىنىڭ ءورت ءسوندىرۋ مەكەمەسى جاراعىنداعى زاماناۋي قۇتقارۋ تەحنيكالارى مەن قۇتقارۋ جابدىقتارىنىڭ كورمەسى وتكىزىلدى.
وقۋشىلار ەكسكۋرسيا بارىسىندا ءورت سوندىرۋشىلەر مەن قۇتقارۋشىلاردىڭ كاسىبي جۇمىستارى تۋرالى قىزىقتى اڭىگەمەلەرگە قانىق بولدى. قىسقا مەرزىم ىشىندە بيىك قاباتتى عيماراتتارعا شىعۋ، ءتىلسىز جاۋمەن الىسۋ ايلا-تاسىلدەرى، ءورت ءسوندىرۋ جانە قۇتقارۋ تەحنيكالارى مەن قۇرال-جابدىقتارى، ۇيىندىلەر استىنداعى زارداپ شەگۋشىنى الىپ شىعۋ، كۇردەلى ورىندارعا كىرۋ تاسىلدەرى وقۋشىلاردى ءتانتى ەتتى. بارلىق قۇتقارۋ تەحنيكالارىن تاماشالاعان بالالار، ءوز كەزەگىندە ءتۇرلى سيپاتتاعى قۇتقارۋ جابدىقتارى مەن قورعاۋ دۋلىعالارىن قىزىعۋشىلىقپەن كيىپ كوردى.
سونداي-اق وقۋشىلار سالا بويىنشا ارنايى مۇراجايعا باس سۇعىپ، ورتكە قارسى قىزمەتىنىڭ قۇرىلۋ تاريحىمەن كەڭىنەن تانىستى. سونىمەن قاتار بۇگىندە كونەنىڭ كوزىنە اينالعان ءورت ءسوندىرۋ-قۇتقارۋ جاراقتارىن قولدارىمەن ۇستاپ كورىپ تاڭدانىستارىن جاسىرمادى. ءىس-شارا سوڭىندا وقۋشىلار ازاماتتىق قورعاۋ قىزمەتكەرلەرىمەن ەستەلىككە سۋرەتكە ءتۇستى .
پىكىر قالدىرۋ