ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا تۇيمەكەنت اۋىلدىق وكرۋگى اكىمشىلىگىنىڭ ۇيىمداستىرۋىمەن ەرەجەسىز جەكپە-جەكتەن الەمنىڭ ءۇش دۇركىن چەمپيونى ارداق نازاروۆپەن كەزدەسۋ ءوتتى.

تاربيەلىك مانگە تولى باسقوسۋعا اۋدان اكىمدىگىنىڭ ىشكى ساياسات ءبولىمى مەن اۋداندىق جاستار رەسۋرستىق ورتالىعىنىڭ ماماندارى، تۇيمەكەنت ورتا مەكتەبى مەن عازيز بايتاسوۆ اتىنداعى تىرەك مەكتەبىنىڭ ۇستازدارى، وقۋشىلارى، جاس سپورتشىلار جانە جەرگىلىكتى بۇقارالىق اقپارات قۇرالدارىنىڭ وكىلدەرى قاتىستى.

ارداق نازاروۆ – شارشى الاڭدا جۇزگە جۋىق كەزدەسۋ وتكىزىپ، ونىڭ باسىم كوپشىلىگىندە قارسىلاستارىن تىزە بۇكتىرگەن بەيبىت كۇننىڭ باتىر ۇلى. ءوزىن تەك سپورتتىق جاعىنان ەمەس، تاريح پەن ادەبيەت سالاسىنان دا بىلىكتىلىگىن كورسەتىپ، جاستاردى ۇلتجاندىققا تاربيەلەپ جۇرگەن سپورتشى. تۇيمەكەنت اۋىلىنداعى جاس ۇرپاقتىڭ سالاۋاتتى ءومىر سالتىن ۇستانۋىمەن قاتار، اتا-انانى قۇرمەتتەۋ، يماندىلىق، ىزەتتىلىك، ادامگەرشىلىك سەكىلدى قۇندىلىقتاردى بويلارىنا ءسىڭىرۋ ماقساتىن كوزدەگەن جيىننىڭ باستاپقى ءسوزىن تۇيمەكەنت اۋىلدىق وكرۋگىنىڭ اكىمى قانات سماعۇلوۆ اشتى. ءوز سوزىندە قانات ەرۋباي ۇلى ۇيىمداستىرىلىپ وتىرعان اتالمىش جۇزدەسۋدىڭ ماڭىزدىلىعىنا توقتالدى.

كەزدەسۋ بارىسىندا ساڭلاق سپورتشى جاستارمەن وتباسى قۇندىلىعى جانە بىرلىك پەن ىنتىماق تاقىرىبىندا وي ءبولىستى. كىشى بۋىن وكىلدەرىن جىگەرلەندىرىپ، نامىستارىن قايرايتىن سوزدەر ايتىپ، ولاردى ۇلتجاندىلىققا، وتانسۇيگىشتىككە شاقىردى.

سونداي-اق، چەمپيون جاستارعا تاريحتا وتكەن باتىر بابالارىمىزدىڭ ەرلىكتەرىن بايان ەتىپ، تاۋەلسىزدىكتىڭ قانداي قيىنشىلىقپەن كەلگەنىنە توقتالدى. كيەلى دالانى مەكەن ەتكەن كوشپەلى بابالاردىڭ جاۋىنگەرلىك ەرلىكتەرى تۋرالى تاريحي قيسسالاردى جاستارعا شەبەر جەتكىزىپ، سول باتىرلاردىڭ جەكە-جەكە ەسىمدەرىن ەسكە الدى.

بۇگىندە الەم مويىنداعان چەمپيون – كوپكە ۇلگى. وسكەلەڭ ۇرپاققا ساليقالى سوزدەر ايتىپ، ورامدى وي ءبىلدىرىپ ءجۇر. الاشتىڭ نامىستى ازاماتى ارداق نازاروۆ بايزاقتىق جاستارعا ەر جىگىتتەرگە قانداي قاسيەتتەر ءتان بولۋ كەرەكتىگىن ايتىپ، جاستاردى ءوز ەلىنىڭ پاتريوتى بولۋعا شاقىردى. «اللا تاعالا بەرىپ تە سىنايدى، الىپ تا سىنايدى. دۇنيە بۇگىن بار، ەرتەڭ جوق. ءبىراق، ادامزاتتى سۇلۋلىقپەن، مانساپپەن، بايلىقپەن، دۇنيەمەن ولشەۋگە بولمايدى. ادامزاتتىڭ ولشەمى - ونىڭ رۋحانياتىندا، ونىڭ تەكتىلىگىندە، مارتتىگىندە، ادامي قۇندىلىعىندا»، - دەپ قورىتىندىلادى ول ءسوزىن.

كەزدەسۋ سوڭىندا اۋىل اقساقالدارى ەل نامىسىن الەمدىك ارەنادا قورعاپ جۇرگەن ساڭلاق سپورتشىعا العىستارىن ايتىپ، باتالارىن بەردى.