جامبىلدىق سپورتشىلار الەمدىك دەڭگەيدەگى ءتۇرلى جارىستاردا كوك تۋىمىزدى جەلبىرەتىپ، ەل ابىرويىن اسقاقتاتىپ جۇرگەنى بارشامىزعا بەلگىلى. بۇل – ولارعا كورسەتىلىپ وتىرعان قولداۋدىڭ جانە ءوز شەبەرلىكتەرىن شىڭداۋىنا جاسالعان جاعدايدىڭ ناتيجەسى دەسەك، ارتىق ايتقانىمىز ەمەس. ءوز كەزەگىندە جامبىلدىق جامپوزدار بايراقتى باسەكەلەردە وزا شاۋىپ، جۇلدەلى ورىنداردى يەلەنۋدى جاقسى داستۇرگە اينالدىرعان.

ماسەلەن، وبلىس سپورتشىلارى جىل باسىنان بەرگى ۋاقىتتا حالىقارالىق جانە رەسپۋبليكالىق جارىستاردا بارلىعى 696 مەدال يەلەندى. ونىڭ ىشىندە 267التىن، 196 كۇمىس، 233 قولا مەدال بار.

جىل باسىنان وبلىس سپورتشىلارى ءىرى حالىقارالىق جارىستارعا قاتىسىپ، جاقسى سپورتتىق كورسەتكىشتەرگە قول جەتكىزدى.

مىسالى، انەل نۇرجانوۆا مەن يۋليا پروسۆەتوۆا – سپورتتىق اكروباتيكادان الەم كۋبوگىنىڭ قولا جۇلدەگەرلەرى اتاندى. ال، قورداباي مەيىربەك – گرەك-ريم كۇرەسىنەن 23 جاسقا دەيىنگى ەرەسەكتەر اراسىنداعى ازيا چەمپيوناتىنىڭ قولا جۇلدەسىن يەلەندى. سول سەكىلدى. ەلدوس سمەتوۆ – دزيۋدودان الەمدىك گران-پري تۋرنيرلەرىنىڭ جەڭىمپازى، الەم چەمپيوناتىنىڭ قولا جۇلدەگەرى، نۇرقانات سەرىكبايەۆ – دزيۋدودان جاسوسپىرىمدەر اراسىندا ازيا كۋبوگىنىڭ جەڭىمپازى اتانسا، قازىبەك راقىشيەۆ، اياۋلىم قۋانىشيەۆا جانە شاپاعات داۋلەت قولا جۇلدەگە يە بولدى.

جاستار اراسىنداعى ۇلتتىق ات سپورتى تۇرلەرىنەن ءبىرىنشى ازيا چەمپيوناتىنىڭ «كوكپار» سپورتىنان قازاقستان رەسپۋبليكاسىنىڭ قۇراما كومانداسى جەڭىمپاز اتاندى. ۇلتتىق قۇرامانىڭ ساپىندا جامبىل وبلىسىنىڭ 5 سپورتشىسى قۇرمانبەك تۇرعانبەك، ەرنار جارىلقاسىن، ەرنۇر كامەلحان، ەرسۇلتان ازىمبايەۆ جانە ەرنەت ءمالىمباي ويىن كورسەتتى. جامبى اتۋ سپورتى بويىنشا قازاقستان رەسپۋبليكاسىنىڭ قۇراما كومانداسىنىڭ ساپىندا جامبىل وبلىسىنىڭ سپورتشىسى باباجان باقداۋلەت ءى ورىندى جەڭىپ الىپ، ازيا چەمپيونى اتاندى.

«اۋليە-اتا» كوكپار كومانداسى – قازاقستان رەسپۋبليكاسى چەمپيوناتىنىڭ جەڭىمپازى اتانىپ، قازاقستان رەسپۋبليكاسىنىڭ 10 دۇركىن چەمپيونى اتاندى.

عالىمجان قىرىقباي – ۋنيۆەرسيادا ويىندارىندا دزيۋدو كۇرەسىنەن ابسوليۋت سالماق دارەجەسىندە جەڭىمپاز اتاندى. ايتا كەتەتىنى، بۇل مەدال ۋنيۆەرسيادا ويىندارىندا قازاقستان تاريحىندا دزيۋدو كۇرەسىنەن تۇڭعىش رەت يەلەنگەن جانە وسى جارىستاعى جالعىز التىن مەدال بولدى.

ەربولات كارىباي – پارا پاۋەرليفتينگتەن 49 كەلىدە جاستار اراسىنداعى الەم چەمپيوناتىنىڭ قولا جۇلدەگەرى.

سونىمەن قاتار، جىل باسىنان بەرى سپورت تۇرلەرىنەن وتكەن قازاقستان رەسپۋبليكاسىنىڭ چەمپيوناتتارىندا وبلىس سپورتشىلارى جوعارى ناتيجەلەرگە قول جەتكىزدى.

بۇگىنگى تاڭدا جامبىل وبلىسىنان – 893 سپورتشى سپورت تۇرلەرىنەن قازاقستان ۇلتتىق قۇراما كومانداسىنىڭ مۇشەلەرى. ولار، وزدەرىنىڭ سپورتتىڭ جەڭىستەرى ارقىلى قازاقستان رەسپۋبليكاسىنىڭ كوك بايراعىن كوككە كوتەرىپ، ەل ابىرويىن اسقاقتاتۋعا ءوز ۇلەستەرىن قوسىپ كەلەدى.