مەملەكەت كاسىپ اشىپ، ىرزىق تابۋعا ىقىلاستىلاردى قاشاندا قولداپ كەلدى، قولداي دا بەرمەك. پرەزيدەنت ءوز جولداۋىندا شاعىن، اسىرەسە، ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقاراتىندىعىن اتاپ ءوتىپ، ول ەڭ الدىمەن، اۋىل تۇرعىندارىنا تۇراقتى جۇمىس بەرىپ، جۇمىسسىزدىقتى ازايتاتىندىعىن باسا ايتقان بولاتىن.

ايتا كەتۋ كەرەك، بۇل تۇرعىدا «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىنىڭ ىسكەر ازاماتتارعا تيگىزەر پايداسى مول. بيىل اتالمىش باعدارلاما اياسىندا جامبىل وبلىسى بويىنشا وسى جىلى 11،6 ميلليارد تەڭگە، ونىڭ ىشىندە رەسپۋبليكالىق بيۋدجەتتەن – 7،4 ميلليارد، جەرگىلىكتى بيۋدجەتتەن 4،2 ميلليارد تەڭگە ءبولىنىپتى. سونداي-اق 1 قىركۇيەكتەگى مالىمەت بويىنشا جۇمىسپەن قامتۋدىڭ بەلسەندى شارالارىنا 22906 ادام تارتىلسا، ونىڭ ىشىندە ۆاكانتتىق بوس جۇمىس ورىندارىنا – 8842 ادام، قىسقا مەرزىمدى كاسىپتىك وقۋعا – 3081 ادام، الەۋمەتتىك جۇمىس ورىندارىنا – 1440 ادام، جاستار پراكتيكاسىنا 2108 تۇلەك جولدانىپ، اقىلى قوعامدىق جۇمىستارعا 4609 جۇمىسسىز تارتىلعان. ال 1208 ادام «باستاۋ-بيزنەس» جوباسىمەن كاسىپكەرلىك نەگىزدەرىنە وقىسا، «جاس كاسىپكەر» جوباسى بويىنشا 575 ادام وقۋعا جولدانىپتى. 597 ادام شاعىن نەسيە الىپ، كاسىپ باستاپ كەتكەن.

سونداي قولداۋعا يە بولىپ، ءوز كاسىبىن دوڭگەلەتىپ وتىرعان ازاماتتاردىڭ ءبىرى- مۇراتبەك نىسانبەكوۆ.

ول 2013 جىلى جۋالى اۋدانىنىڭ ورتالىعى ب.مومىش ۇلى اۋىلىنان ءوز كۇشىمەن حالىققا ەڭ قاجەتتى تەحنيكالىق جوندەۋ ورتالىعىن اشقان. كولىك سانى كۇن ساناپ ارتىپ كەلە جاتقان قازىرگى شاقتا ونىڭ اشقان ورتالىعىن كەڭەيتۋ قاجەتتىگى تۋىنداعان. ارينە، مىنا زاماندا قارجىسىز شارۋاڭدى تىكتەۋ مۇمكىن ەمەس. سوندىقتان جەكە كاسىپكەر اۋداندىق جۇمىسپەن قامتۋدى جانە الەۋمەتتىك باعدارلامالار بولىمىنە قايىرىلىپتى. ونداعى ماماندار كاسىپكەرگە «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى ارقىلى جەڭىلدەتىلگەن نەسيە الۋعا مۇمكىندىگى بار ەكەندىگىن ايتقان. وسىلايشا، ورايى كەلىپ تۇرعان جەڭىلدىكتەن قاعىلعىسى كەلمەگەن مۇراتبەك نىسانبەكوۆ 2017 جىلى 3 ميلليون تەڭگە نەسيە الىپ، «اسەم» تەحنيكالىق جوندەۋ ورتالىعىن قايتا اشىپتى. ءسويتىپ وندا كورشىلەس جۇڭگو ەلىنەن جاڭا قوندىرعىلار ساتىپ اكەلىپ، كولىك جۋۋ، موتور جوندەۋ، دوڭگەلەك تۇزەتۋ، كومپيۋتەرلىك تەكسەرۋ، كولىكتىڭ قوزعالتقىش بولىگىن جوندەۋ سىندى قىزمەت تۇرلەرىن ءبىر ساتتە ۇسىنا باستاپتى. بۇگىندە جۇمىسى جاندانىپ، اۋدان ورتالىعىنداعى ءبىرشاما تۇرعىنداردىڭ كولىكتەرىن جوندەپ بەرىپ، العىس ارقالاپ ءجۇر.

– بۇگىنگى زاماننىڭ تالابى – كاسىپ اشىپ، جۇمىسسىزدارعا جۇمىس تاۋىپ بەرۋ. بۇل ورايدا، مەن دە ءوز كۇشىممەن كاسىپ اشقان ەدىم. ءبىراق سۇرانىس ارتقاننان كەيىن كەڭەيتۋ مۇمكىن بولمادى. وسى تۇرعىدا مەملەكەتتىك باعدارلامالاردىڭ شاراپاتىن سەزىنىپ، «ەڭبەك» مەملەكەتتىك باعدارلاماسى ارقىلى نەسيە الدىم. مۇنىڭ تيىمدىلىگى – 6 پايىزبەن 5 جىلعا دەيىن بەرەدى. ءارى قارجى قولىما تيگەننەن كەيىن 6 ايلىق كانيكۋل بەردى. ياعني، تىرشىلىگىم العا باسقانشا بانككە ەشقانداي قارجى قۇيمادىم. جارتى جىلدان كەيىن عانا كەستە بويىنشا اي سايىنعى اقشامدى سالا باستادىم. ءقازىر جۇمىسىم العا باسىپ كەلەدى. قوسىمشا دانەكەرلەۋ سەحىنىڭ ىرگەتاسىن قۇيىپ، قابىرعاسىن قالاپ قويدىم. الداعى ۋاقىتتا ول دا ىسكە قوسىلماق. بۇگىندە تەحنيكالىق جوندەۋ ورتالىعىندا 12 ادام تۇراقتى جۇمىس ىستەپ ءجۇر، – دەيدى م.نىسانبەكوۆ.