الماتى اكىمدىگىنىڭ باسپا ءسوز ورتالىعىندا وتكەن بريفينگتە ەنەرگوتيىمدىلىك جانە ينفراقۇرىلىمدىق دامۋ باسقارماسى سۋ رەسۋرستارىن باسقارۋ جانە گازداندىرۋ سىزباسىن جۇزەگە اسىرۋ ءبولىمى باسشىسىنىڭ مىندەتىن اتقارۋشى نۇرلان ومارحانوۆ 2018 جىلى قالادا 228 كم سۋ قۇبىرلارى مەن 207 كارىز جەلىلەرىنىڭ سالىنعانىن جانە جوندەلگەنىن ايتتى، دەپ جازادى www.almaty.gov.kz سايتى. 

ناتيجەسىندە، 90 مىڭ قالا تۇرعىنى ورتالىق سۋ جۇيەسىن (قالقامان، دوستىق، شاڭىراق-1،2، دارحان، بايبەسىك، جاس قانات، قاراسۋ، التىن بەسىك، العاباس، كوكقاينار، ۇلجان-1،2، راحات-مادەنيەت، ترۋدوۆيك، تاۋگۇل-3 ىقشاماۋداندارى، ز.كوسمودەميانسكايا، گورنوۆوستوچنىي، گرانوۆسكيي كوشەلەرى) پايدالاناتىن بولدى.

قازىرگى كەزدە بۇل جەلىلەر پايدالانۋعا بەرىلەدى جانە جوعارىدا اتالعان ەلدى مەكەندەردەگى ۇيلەر ورتالىق سۋ جەلىسىنە قوسىلادى. «الماتى سۋ» مكك مەن تۇتىنۋشى اراسىندا كەلىسىم جاسالعان سوڭ ابونەنتتەر ورتالىق جەلى قىزمەتىن قولداناتىن بولادى.

بيىلعى جىلى 167 كم سۋ جانە 147 كم كارىز قۇبىرلارىن سالۋ جوسپارلانعان، ءقازىردىڭ وزىندە 8 كم سۋ جانە 75 كم كارىز جەلىلەرىنىڭ قۇرىلىسى (دۋمان، ايگەرىم، جۇمىسشى كەنتى، قۇرىلىسشى، وجەت، شاڭىراق-5، قايرات، قاراسۋ، شاپاعات (زاريا-ۆوستوكا)، كوكشوقى ەلدى مەكەندەرى مەن رادۋگا، قازىبايەۆ، بورالداي، گاليلەي كوشەلەرى) اياقتالدى.

بۇلاردان وزگە، الماتى تۇرعىندارىن ۇزدىكسىز ساپالى سۋمەن قامتاماسىز ەتۋ ءۇشىن كۋست-19، زاپادنايا-1، گنتك-2، بالقاش سۋ بوگەتتەرى مەن كارىزگە ارنالعان ناسوستى ستانسالاردا ( تاستاك، بەكماحانوۆ، كوكقاينار، ترۋدوۆيك) جوندەۋ جۇمىستارى جۇرۋدە.

8 ىقشاماۋداننىڭ (قۇرامىس، جايلاۋ، تاۋجولى، كولحوزشى، المەرەك، ءبىرىنشى ماي، العاباس، بورالداي) 40 مىڭ تۇرعىنىن سۋمەن قامتاماسىز ەتۋ ءۇشىن جەلىلەر سالۋ جۇمىستارى باستالدى. ولارداعى سۋ قۇبىرلارىنىڭ جالپى ۇزىندىعى 142،8 كم، كارىز جەلىلەرىنىكى – 106،9 كم.

3 ىقشاماۋداننىڭ (اقجار، كامەنسك شاتقالى، كولساي) 18 مىڭ تۇرعىنىن سۋمەن قامتۋ ءۇشىن قۇرىلىس-مونتاج جۇمىستارىن جۇرگىزۋگە بايقاۋ بايقاۋ جاريالاندى، بۇلارداعى سۋ قۇبىرىنىڭ ۇزىندىعى 50،1 كم، كارىزدىكى – 23،3 كم.

53 مىڭ تۇرعىندى قامتيتىن 8 ىقشاماۋدان بويىنشا (شۇعىلا، قارعالى، قاراعايلى، تاستىبۇلاق، تاۋسامالى-كامەنكا، سۇلۋساي، بۋتاكوۆكا، تەرەكتى) جوبالىق-سمەتالىق قۇجاتتار ازىرلەنۋدە. مەمساراپتاما وڭ ۇسىنىس بەرسە، جىل اياعىنا دەيىن 117،6 كم سۋ، 110،2 كم كارىز جەلىلەرىن تارتۋ جوسپارلانعان.

«الماتى سۋ» مكك باس ديرەكتورىنىڭ ورىنباسارى – ءوندىرىس جونىندەگى ديرەكتور بەرىك جامبىلوۆ 2019 جىلى كاسىپورىن تاراپىنان سۋمەن جابدىقتاۋ شارالارىنا 2 ملرد. تەڭگەدەن استام قارجى جۇمسالعانىن ايتتى. 11،7 كم سۋ قۇبىرلارى جوندەلدى، توزعان 2،8 كم جەلىلەر، ءورت سوندىرەتىن 142 گيدرانتتار بىرلىگى، 337 جىلجىعىشتار جاڭاردى.

500 كم استام سۋ قۇبىرلارى مەن 300 كم استام كارىز جەلىلەرى، 70 كم كارىز قۇبىرلارى، 22 مىڭ قۇدىق جۋىلىپ، تازارتىلدى. ءورت سوندىرەتىن 881 گيدرانتتار، 2250 شەكتەۋلى ارماتۋرالار جانە 566 ناسوستى قوندىرعى بىرلىگى، 248 جابۋ كلاپاندارى بىرلىگى جوندەۋدەن ءوتتى.